[أثير العالم]

بسم الله الرحمن الرحيم

السلام عليكم ورحمة الله و بركاته ..



اليوم طبعاً كان في إجتماع للطالبات مع عميدة الكلية + رئيسات الأقسام ..

كان نقاش مفتوح و إجابة على استفسارات البنات من ناحية الحذف و الإضافة و المشاكل اللي واجهوها.



بس أهم شيئين تكلمو عنها هي :

( وحدة الإبداع و البحوث + التدريب الميداني و الطريقة الجديدة للتسجيل )



وحدة الإبداع و البحوث :

هذي الوحد تخدم أي طالبة عندها أي فكرة إبداعية أو بحث, تروح لهم و يساعدوها على نشر بحثها و طبعاً هذي الشي يفيد في السيرة الذاتية.
د.ندى قالت انهم ينشرو البحث بإسم الطالبة وهذا شي حلو, و طبعا مو لازم يكون بحث طويل و معقد.
بإختصار الوحده تدعم أي طالبة عندها أفكار أو أبحاث ..

الوحدة بإشراف د.جهاد يوسف - قسم الكيمياء الحيوية.

رابط الوحدة على موقع الكلية

+

رابط الإشتراك في وحدة الإبداع و البحوث



التدريب الميداني :

التسجيل للتدريب الميداني صار إلكتروني عن طريق موقع الكلية - شعبة التدريب الميداني

الشعبة بإشراف أ.د.أميرة العطاس و حاطين إيميلهم في الموقع و قالت أي سؤال أو استفسار تقدرو ترسلوه ع الإيميل بشرط تكتبين اسمك + رقم جوالك ..

يعني النظام الجديد صار اللي تبغى تتدرب فصل ثاني أو فصل صيفي تسجل إلكتروني من الآن و التسجيل مفتوح إلى الأربعاء 3 / 11 / 1433 هـ
د.أميرة قالت انهم يتبعو نظام صارم و أي طالبة يفوتها التسجيل في المده المحددة للتسجيل فتدريبها يتأجل للفصل الأول من السنة الجاية ..

في شي كمان قالته إنه لو عندكم أماكن مقترحة للتدريب و تضمنو انه يفتحو لكم المجال ممكن تقترحوها عليهم و يتواصلو مع الجهه و ينسقو معاهم لإستقبال الطالبات.

وقالت إنه ما تلجئي لشعبة التدريب الميداني إلا في حالة واجهتي مشكلة ما قدرتي تحليها مع مشرفة الإرشاد تبع القسم أو رئيسة القسم ..

رابط شعبة التدريب الميداني




تنبيه مهم ع الحذف و الإضافة :

الأرقام المرجعية هي أساس الحذف و الإضافة و ما تقدري تضيفي أي مادة إلا بالرقم المرجعي فـنبهوا على انه لازم نتأكد من الرقم المرجعي قبل ما نسجله في ورقة الإضافة لأن بعض البنات لما يبحثو عن الشعب ما يحددو فرع الفيصلية فتطلع لهم شعب من السليمانية أو السلامة أو الرحاب و يصير في أخطاء في التسجيل ..



تقريبا هذا أهم شي تكلمو عنه لو في أحد حضر اللقاء و تذكر غير هذا الكلام يا ليت يقوله لأنه في أشياء مهمة زي التدريب و التسجيل له لازم البنات يعرفوها ..


و بس

تعمدت أكتب بالعامّي عشان اخذ راحتي و أقدر اعبر