رد: اللي تبغا تحول .. تجي هنيا
شوكرياااا أنثى >> صوماليين الأخوات
المهم يا تويلات العمر .. انا قبل ما تبدأ الدراسه بأسبوع رحت يوم الإثنين لـ مبنى 8 قسم الإعلام
و كلمت د. حنان آشي .. رئيسة قسم الإعلام و قلتلها إني حابه القسم و معدلي 3.40 قالتلي والله إحنا بيجونا بنات معدلاتهم 4 و فوق .. جتني خيبة أمل .. بعدين قالتلي طيب أكتبي إسمك في الليست و احنا نشوف بناخد على حسب المعدلات قلتلها طيب .. و رجعت البيت ..
رحت بعد يومين >> نشبتلهم نشبه بطاله
رحت بعد يومين .. و قلت هااااااا إيش صار على مووضوعي ? >>> تحسو إنهم شغالين عندها خخخخ
المهم قالو لسه بناخد على حسب المعدلات ولسه ما خلصنا .. بس روحي مبنى الجوهره أول غرفه على يدك اليسار
رحت و دخلت عند أستاده فريده إللي هيا المسئوله عن التحويل و طلعتلي ورقه فيها طلبات التحويل و مره تانيه حطيت إسمي و رقمي الجامعي و معدلي و التخصص المطلوب و قالتلي تعالي السبت أو الأحد ( بداية الدوام الرسمي )
رحت السبت ... دخلت عند أستاده فريده ..
ها أستاده فريده أنا طلبت تحويل إعلام معدلي 3.40 طلت فيا قالت والله ما أعتقد تنقبلي بس روحي قسم الإعلام مبنى 8 و شوفي .... و أنا رايحه قابلت دكتوره حنان قدامي و كلمتها قالت والله لسه قاعدين ناخد البنات إللي 4 و فوق .. :(
جتني خيبة أمل و رحت طلعت عند سكرتيرة وكيلة كلية الأداب و كلمتها و اتناقشت معاها و أخدت و أديت معاها إلين ما خليتها تتصل على أستاده فريده ( حقت التحويل ) و تقولها و قالتلها فريده نفس الكلام إحنا بناخد على حسب المعدلات خليها تستنى و برضو رجعت رحت عند دكتوره حنان قولتلها ( أقولك انتو بتقبلوني ولا كيف ترا تعبتوني ) خخخ جوكينق جوكينق
قولتلها : دكتوره حنان في أمل تقبلوني :( يعني لسه قاعدين تقبلو بنات :( .. قالتلي و هيا مسكينه تحسوها مره حزنانه عليا بس مابيدها شي .. قالت والله يابنتي احنا قاعدين ناخد دحين بالمعدلات .. قلتلها طيب انا معدلي قريب من المطلوب و انا حابه القسم مره .. قالت طيب ايش اسمك .. قلتلها إسمي ... قالت خلاص راجعينا يوم الربوع و ان شاءلله خير
رجعت البيت و أنا فاقده الأمل .. بعد ما كتبت إسمي في قائمتين إنتظار و بعد حوسه و وحده تقول راجعينا الإتنين و وحده الربوع و وحده تقولي مافي أمل
اليوم الصبح أفتح الأوديس أحصل مكتوب ( التخصص : إعلام )
الحمدلله تعبي و بثارتي و نشبتي ما راحت عالفاضي
و الحمدلله الحمدلله الحمدلله
و الله يوفقني و يوفق الجميع
|