رد: توظيف أول 30 سعودية عاملات منازل بمرتب 1500 ريال شهريا
مبدأ عمل المرأة السعودية كخادمة شي غريب عالمجتمع
فعشان كدا من المتوقع انو يكون مرفوض مع إنو كل الدول التانية في عاملات من نفس الجنسية ماعدا دول الخليج
طيب ليه؟؟؟
خلونا نكون صريحين
عندنا عدد كبير جدا من البيوت يعامل الخادمة كنوع من أنواع الحيوانات
والله في ناس تعامل البسس الي عندها بالبيت وتدللها اكتر من الخادمة
عندنا الخادمة = امرأة مهانة
عشان كدا مو متقبلين فكرة عمل المرأة السعودية كخادمة
أنا عن نفسي أشوف انو عمل المرأة السعودية كخادمة مافيها شي
مو أحسن من شحتة الشوارع؟؟
وزي ما قلت دافنشي
اللي معترض يدبرلها شغلة احسن ولا يدفع من جيبو
بس الشروط اللي حطها المكتب مررررا كويسة
انها تشتغل بدوام 8 ساعات مع تعهد بعدم التعرض لها
يعني ازا الشغالات الجاويات والفلبينيات والسيرلانكيات يتعرضوا من بعض "ذكور " العوايل اللي يشتغلوا فيها للاذية
لانو حرام يتسموا رجال
كيف حيصير بس يشوفوا امرأة سعودية فالبيت؟؟
يعني لازم مع السماح بعمل المرأة السعودية كخدامة تشديد العقوبات على من يمتهنها أو يمس كرامتها او انوثتها
اعتقد انو جا الوقت انو نفكر في الخادمات بعد ماكنا ساكتين طول الوقت على اللي تعرضولو من أذى
ولازم طبعا توعيتهم بحقوقهم اللي لهم واللي عليهم
الله يوفقهم يارب ويرزقهم خير يااارب
|