[فتافت]

السلام عليكم ورحمة الله وبركاته ..

اخباركم ؟؟

انا ان شاء الله بقدم للماجستير هذي السنة للترم الثاني وبرغم كثرة الأحباط الي لقيته هنا بالقسم بشد حيلي واملي بالله كبير جدا جدا .. وعلى فكرة انا تأخرت يعني من خريجات عام 1425 رغم اني كنت بقدم من بداية تخرجي بس الضروف والحمد لله على كل حال ..

اجي للموضوع انا خريجة قسم تغذية واحب قسمي جدا جدا وما تخيل نفسي في غيره بس برضوا مايمنع اني استفسر يمكن اغير تخصصي فاللي عرفته انه اقدر اسجل بقسم تاني طيب ايش التخصصات الي ممكن ادخلها غير التغذية وتسمح لي الجامعة اني اسجل فيها .. رغم انه نفسي موت اسجل تغذية علاجية لأنه هذا كان هدفي من يوم كنت ادرس بالكلية ومثل ماقلت يمكن الاقي قسم تاني والاقي نفسي فيها .. هذا استفساري الأول ..

امممممممم بالنسبة للاستفسار التاني صدق اقدر اقدم للماستر بدون اختبار التوفل لأني لقيت موضوع هنا يقول كذا بس محد جاوبني .. طيب كيف بالله علموني بالتفصيل الممل ؟؟

وطيب لو طلع استفساري التالت صحيح وربي اكرمني وانقبلت بالماجستير بدون الامتحان تبع التوفل لازم يكون امتحاني تبع الجامعة ولا اي اختبار توفل ينفع يعني الي تسويه المراكز او اختبرت من نفس الموقع تبع التوفل يعني اسدد الرسوم وادخل اختباراتهم الي يحددونها لنا بجدة واخذتها عادي تقبله الجامعة ؟؟

امممممممممم اما استفساري الأخير انا نسبتي 79.57 % هدا العام ونسبتي بمواد التخصص 80.47 % هل يوجد لي امل اني اكمل ماستر .. ياناس والله لآخر ترم وانا جيد جدا وبمرتبة الشرف كمان بس القهر جتنا دكتورة بمادة عامة وودتنا كلنا بدهية وضيعة علينا المعدل والمرتبة وبعد مارسبتنا طردوها من الكلية لأنه الرسوب كان كتير بس بعد ايش بعد ماضيعة معدلنا والمرتبة الله يسامحها دنيا وآخرة ..

سامحوني اعرف اني طولت بالهرج عليكم بس ماقدرت من القهر والله ..

ويارب الاقي جواب عندكم ..

والله يوفقكم جميعا ..