[أنجليكا]

صباحكم ورود ونجاح لأبعد مدى بإذن الله ،
كنت داخله أسأل سؤال بس لما شفت الناس حاطين تجاربهم تحمست وقلت بشارك تجربتي انا كمان :d
انا بكلية الإقتصاد والإداره إنتساب تو خلصت سنه رابعه ، تخرجت من الثانوي بنسبة 98% وكنت ناويه أدخل كلية عمليه ،
لكن شاء القدر إني ما أدخلها وتحطمت ونفسيتي صارت في الأرض ودخلت الكليه هذي بـ دَفْ من أهلي
وبالغصب كنت أمسك الكتاب لإني كارهه الكليه وكرهت الجامعه كلها ، مرت 3 سنين وأنا ماأعرف أحد بالجامعه
ولا عمري ذاكرت إلا قبل الإمتحان بيومين وكمان كنت اذاكر من الملخصات مو من الكتب > متعيجزه :d
وما كنت أفهم إيش يعني معدل ولا أهتم أشوفه ، وبدأت سنه رابعه وربي حط في طريقي أشياء كثير خلتني أوعى للوضع إلي أنا فيه
أصدقاء و مواقف وتجارب وكتب ، خلوني أنتبه وسألت نفسي إيش فايدتي في الحياه ؟ بس أتخرج بنسبه معفنه وأجلس في البيت أبكي على حالي ؟
وين طموحات زمان بالشغل والسفر والدراسه لأخر لحظه في حياتي ؟ وإذا يعني ما دخلت الكليه إلي أحبها إنتهت الدنيا ؟
عادي راح أدخلها بعد ما أخلص هذه الكليه ، بس بدل ما أضيع عمري وأنا جالسه أتندم ومصاريف ووقت رايح ع الفاضي خليني ع الأقل أطلع بفايده ،
وقمت فتحت الأودس وشفت نسبتي كانت في أول ترم 4 وشوي والحين قربت توصل لـ 2 :( > الكلام دا سنه ثالثه
وكل المواد يا إنها d يا c وكمان فيه ماده انجليزي اخذتها وجلست استخف فيها ورسبت لأول مره في حياتي أرسب بماده :(
المهم قررت أتغير ونزلت الـ 6 مواد تبع الترم الأول وبدأت أذاكر من الكتاب وأخطط وأكتب وسمعت المحاضرات لأول مره > كنت اسمع عن السنترا بس ماعمري دخلته
وخلصت سنه رابعه وفوجئت من درجاتي ، جبت a و b بعد المقبول والضعيف ونسبتي إرتفعت صارت 3.36
ولسا باقيلي 8 مواد منها مادة البحث والتدريب ومواد حره وإن شاء الله يارب أقدر أوصل لنسبة جيد جدا 3.75 تتوقعي يا د.نوره راح أقدر أوصل لها النسبه في الترم الجاي ولا مستحيل :( ؟
الموقع هذا : http://www.qu.edu.sa/gpa.aspx#
طلعلي إنه حتى لو جبت في كل المواد A أو B
نسبتي هتظل على ماهي عليه جيد .. زعلت مره لكن ان شاء الله مو صح حسابه


تعقيب :

ساعات المعدل 120
والساعات المجتازه 117
المعدل 3.36
عدد ساعات الترم 24 من ضمنها البحث والتدريب