[اقتصادي لغوي]

اختبرت أمس

الاختبار كان حلو بشكل عام ( سهل - متوسط .. من وجهة نظري )

الا الاستماع ما كان واضح عندنا بالشكل الكافي

وبعدين مقاطع صوتية طويلة نوعا ما ومقاطع قصيرة

تلاحظ مافي تنسيق

حتى المقطع الطويل مرات ما يكون عليه الا سؤال واحد

المشكلة انو الدرجات اللي تضيع بالاستماع أكثرها بسبب رداءة الصوت من وجهة نظري

مدري الى متى حتفضل مؤسسة قياس تعتمد على القاعات المستأجرة

والى متى حيفضل الاختبار ورقي ووقتنا يضيع في تظليل دوائر الاجابة

عندهم مثلا تجربة سابقة موجودة على أرض الواقع اللي هيا اختبار التوفل من خلال الانترنت TOEFL iBT

متى يتعلموا منها ...

ومتى راح يضيفوا قسم التحدث speaking وقسم الكتابة writting لاختبار ستيب عشان يكون متوازن نوعا ما

لأنو ستيب حاليا مافيه الا استماع بسيط جدا والباقي كلو قراءة

وهادي في مجال تعليم اللغات تعتبر مهارات استقبالية اذا جازت العبارة

المهارات الارسالية هيا التحدث والكتابة وما تقل أهمية عن الاستماع والقراءة

لأنو كل المهارات الأربعة مهمة وتتكامل مع بعض عند استخدامنا للغة الأجنبية

وأنا متأكد انو قياس عارفين الشيء هادا أحسن مني :)

إذن انا متأكد انو قياس مستقصدة انو الاختبار يكون من هادي النوعية

الخلاصة المهمة انو الى متى حنفضل نقيس الاستماع والقراءة وما نقيس التحدث والكتابة ...

لمتى حنفضل نقرأ ونستمع وما نكتب ولا نتكلم ؟؟؟

أتذكر مره زميل لنا خريج بكالريوس English لما جا يقدم على الجامعات الكندية وكان يبغى استثناء من شرط اللغة ( اللي هوا انو لازم الواحد يكون جايب درجة معينة في اختبارات كفاية اللغة الانجليزية مثل التوفل والآيلتس عشان يكون مؤهل للدراسة في الجامعات الكندية ) ...

قالولو لازم تجيبلنا اثبات انك درست بكالريوس الـ English باللغة الانجليزية مو بالعربية !!!

طبعا القصة هادي ما تحتاج للتعليق وتخيلو قديش كنت متفاجيء وقتها لما سمعتها من زميلنا هادا

وما ودي اضحك قدامه عشان لا ينحرج أو يتضايق بس فيه ابتسامات طلعت يمين يسار ما قدرت أمسك نفسي بصراحة

بس سويت نفسي حطيت اللوم على الجامعات الكندية وانو معقولة ماهم مصدقين انك درست الانجلش بالانجلش يا ابني ههههههه

طبعا أنا خريج بكالريوس اقتصاد ودرستو بالعربي لكن أخونا خريج انجلش يا جماعة ...

طبعا لا يزال فيه علامة استفهام كبيرة على اختبار ستيب طالما انو دراسة بعضنا للماجستير حتكون باللغة العربية !

أخيرا وبصراحة أكبر مشكلة واجهتني في اختبار ستيب هيا مسألة انو الاختبار كلو ورى بعض ( قروشه )

ما يمديك تاخد نفس وهادا الشيء بالتأكيد راح يؤثر سلبا على النتيجة :(

المهم ان شاء الله درجاتنا تطلع حلوة ونرتاح وما نضطر نختبره مرة ثانية في نهاية جماد تاني

ربنا يحققلنا اللي نتمناه