[رفّات حُلم]

الحمدلله،
خلصت خُطة أ
وتراها سهلة؛ لكني للأسف ما كنت أزاكِر اول بأول

الرياضيات؛ لازم تِزاكره أول بأول، وما تجي المحاضرة التانية الا وانت مزاكر اللي قبله..
عشان يعتمد ع بعضه
افضل الدكاترة؛ هتون شعيب، وليندا الزبن بالنسبة للبنات
طبعًا ترجع زاكر اللي اخذته، وموقع ( رانيا الحربي ) بالنسبة للبنات منسقة المادة فيه الأشياء والدروس اللي داخلة معانا، فيه ع كل درس أمثلة محلولة، بس شرح الكتاب مو مفصل فوقت شرح الدكتور فصل الحل ( جيب الأوراق اللي تلصقها في الكتاب ) وفي نفس الورقة اللي تحملها من موقع المنسق اللي في توزيع المنهج فيها تمارين وواجبات.. طبعا استاذتنا ما كانت تحل الواجبات وتقول لو عندكم أسئلة اسئلوني فيها! فبعد كل درس حل الواجبات والتمارين.. وكل أسبوع متلًا، حل الوورك شوب للدروس اللي اخذتها، تلاقيه في موقع منسق المادة. وكمان قبل الدوري مهم تحل الأسئلة الموجودة في موقعه.

الفيزياء، برضو زاكره اول بأول، اغلب الأشياء نعرفها.. ويعتمد على بعض،
افضل الدكاترة؛ سناء أباظه ثم سناء أباظه ثم سناء أباظه! للبنات
زاكر اللي أخذته من الدفتر اللي تكتبه مع الدكتور في المحاضرة، وفيه ملخص لـ هناء فرحان في موقعها ( فيزياء 110 علمي - ملخصات المسار العلمي ) من افضل الأشياء شرح ڤيديو يوسف زويل، الحمدلله بعد توفيق الله جبت درجات ممتازة في الفيزياء، فيه سكشن كل أسبوع تحله في البيت وتتاكد من النتائج بس في المحاضرة حق السكشن ( افضل وحدة اسمها مها دفتردار بالنسبة لنا، ممتازة حتى لو ما حليتي مررررة تفهم )، وفيه اهم شي ملزمة هناء فرحان للاختبارات اطلبها من خوارزم ( فيه الدوري الاول، والثاني، والنهائي ) تجئ أفكار كتيرة مرررة منها، ممكن ملخصات يوسف زويل pdf تلاقيها في النت لانه فيه أسئلة ما يشرحها في الڤيديو، وزيادة لك، وملخص أشرف بركات وصراحة استخدمته بس في الدوري الثاني.

الاتصال، مادة مررررررة سهلة، ترفع المعدل،
فيها 30 درجة ع دوري واحد يكون 3 أبواب، و30 درجة تطبيقات
افضل دكتورة؛ د/ اميرة النمر
المادة مرة سهلة ومنطقية، كلامها كتير بس تفتكر شرح الدكتور وقت المُزاكرة
نصيحتي لك كل ما تخلصو باب اقراه قراءة لانه المادة مزاكرتها قراءة
نجي للتطبيقات؛ احنا كانت تطبيق الإلقاء والعرض، والسيرة الذاتية، والإنصات والقراءة، المادة ممتعة ومفيدة في الحياة.

الحاسب، مادة سهلة والأشياء اللي تاخذيها نفس منهج الثانوي البسيط، اول باب وآخر باب حفظ، طبعًا فيه اختبار نظري في المادة وعملي، العملي 25 " بابين " - 25 " بابين " - 15 " بابين " ، النظري 10 درجات " 3 أبواب " - 10 " بابين " - 15 " 3 أبواب " مزاكرتها عن طريق الـ سلايدات اللي موجودة في موقع وحدة مهارات الحاسب الآلي، ومع الكتاب.. حاول تزاكرها اول بأول، في العملي عادي بس زاكر العملي اللي في السلايدات والكتاب،، اما النظري زاكر نظري وطبق عشان ما تنسي المعلومة، واحفظ رموز الادوات
طبعا المادة تعتمد عليك انت، كانت أستاذتي بسمة السلمي طيبة صراحةً، وتفهم بالنسبة للبنات.


الله يوفقك ويوفّقنـا،
كتبت بالتفصيل، عشان أفيد البنات اللي حيصيرو خطة أ
وياريت تفيدوني في خطة ب