السلام عليكم ورحمة الله وبركاته
أنا طالب هندسة مستجد شمال جدة حصلت لي ظروف لم استطع أن احظر يوم الخميس بخصوص الجدول
فوجئت يوم الأحد أنهم نزلولي جدول فيه بس 4 مواد 9( ساعات فقط)
الدوام يوم الاثنين و الأربعاء من 8 إلى 1
ويوم الأحد والثلاثاء والخميس من 10 إلى 11 مادة واحدة (ساعة وحدة فقط )
و أنا ساكن في جنوب جدة (مدائن الفهد )
وليس لدي سيارة
كلمت راعي الحافلة قال لي الساعة 8 نوصل الجامعة والساعة 1 الظهر نرجع الفرع الرئيسي ( يوميا )
قريت ردود بعض الطلاب في موضوع ثاني أني اقدر ازبط جدولي
رحت اليوم الاثنين شمال جدة على أساس ازبط الجدول ودخلت عمادة القبول والتسجيل (مجاور كلية الهندسة) أول مكتب على اليمين دخلت وقلت له ظروفي
قال لي الجدول ثابت وما يتغير ولا احد أصلا يقدر يعدل فيه أي شيء
المهم قلت له في طلاب جو يوم الخميس وزبطوا الجدول
قال مستحيل الجدول ثابت
ومن هنا الى هنا قال لي روح عند المدير (السلمي)
رحت له وقال لي نفس كلام الموظف اللي قبله
بس هذي هي قصتي
لكن عندي كم سؤال لكم يا ليت أي احد يفيدني فيها
س1/ هل في احد قدر يسوي جدولة ؟وكيف؟
س2/ هل 4 مواد (9 ساعات )طبيعية ؟اقصد أني رح اخلص الهندسة خلال 8 أترام ؟
س3/ هل المكان اللي أنا رحت له غلط ؟ اقصد عمادة القبول و التسجيل ؟
س4/ هل في احد من المسئولين ممكن يحل مشكلتي ؟
س5/ في احد عنده رقم أو ايميل احد يقدر يفيدني؟
ادري أني طولت عليكم لكن من الضرر اللي أنا فيه طلعت اللي بقلبي و أنا ما كتب هذا الموضوع إلا لأني اعتبركم مثل إخواني
تكفون يا إخوان اللي عنده اي معلومة لا تبخل عليه لأنك ماتدري قد ايش المعلومة ممكن تفيدني
وأتمنى لكم سنة مليئة بالفرح والسرور
والسلام عليكم ورحمة الله وبركاته