رد: الطالبات اللي انقبلوا طب وجراحة أو طب أسنان ابغاكم شوي :)
أهلا حبيبتي أول شي مبرووك لقبولك وعقبال ما نشوفك في التخصص اللي تبغيه يارب
بالنسبة للمزاكرة هي تختلف من بنت لبنت
بالنسبة ليا خطة أ ما كان فيها تعب كتير كنت أزاكر في الويكيند بس لأن المعلومات في المنهج تقريباً متشابهة بس انه طرق مختلفة وأسلوب جديد
بالنسبة للرياضيات والفيزيا لازم تحلي نماذج قد ما تقدري خصوصاً نماذج الاختبارات السابقة ومذكرة هناء فرحان في الفيزيا عشان تتعودي على الأسئلة الصعبة واللي فيها لف ودوران ولا تفوتي السيكشن
والرياضيات برضو يبالها حل تمارين أكثر من المزاكرة وانتي حتشوفي لما تبدأي دراسة مافي معلومات جديدة بس لازم تكوني نبيهة في الحل لأنه في الاختبار حتلاقي كل الاجابات اللي تتوقعيها
مصادري في الفيزيا كانت الكتاب + ملخصات أشرف بركات + السيكشن + نماذج اختبارات هناء فرحان
الرياضيات الكتاب + دفتر المحاضرة + الوورك شوب + نماذج اختبارات سابقة
الاتصال والحاسب الكتاب بس
بالنسبة للدكتورات
الفيزيا ما كانت ماشية معايا عشان كدا لجأت لملخصات أشرف بركات عشان أفهم المنهج أكثر
الرياضيات كنت مع الأستاذة هتون شعيب وكانت مره ممتازة شرحها كافي ووافي وما يحتاج تعتمدي على أحد جنبها أسلوبها سلسل وسريع وتفهمنا كويس
الاتصال والحاسب مو مهم الأستاذة كيف كله على الكتاب وأشياء ما يحتاجلها فهم مره
خطة ب لازم المزاكرة اول بأول معلوماتها مره كثيره خصوصاً الأحياء والكيمياء جداً طويلين
الأحياء ممكن أسهل عشان اللي نختبره ما نرحعله تاني بس الكيميا الشابترات مره كتيره وبعد الاختبار الدوري الثاني حتنصدمي انه ممكن لسا باقي من المنهج 4 شباتر جديدة ولازم تزاكريهم مع اللي فات
بالنسبة ليا تعبت في مزاكرة الكيميا أكتر شي في الترم التاني عشان ما كنت أمسكها أول بأول.
الاحصاء أسهل مادة في خطة ب وكتير جايبين فيها a+ بس عيبها انها زي الرياضيات الأسئلة تلخبط مرره لازم تكوني مركزة ونبيهة
مصادر الأحياء السلايدات والأسئلة المساعدة بس
الكيميا تمارين الكتاب وسلايدات المنسقة و التيست بانك
الاحصاء أهم شي الكتاب + تمارين السيكشن + نماذج سابقة وحل تمارين قد ما تقدري عشان تتعودي على الأسئلة
بالنسبة لاستاذات خطة ب
الكيميا كانت مع دكتورة إكرام وكانت كويسة وطريقة ترتيبها للسلايدات ممتازة, النقاط اللي تلخبط وممكن تتشوشي فيها تحطهم مع بعض وتفرق بينهم بس عيبها انها بطيئة شويا وبس تعيد , بس فادنا دا الشي في الشباتر اللي يبالها تركيز
الأحياء الدكتورة ما تفرق يعتمد على حفظك
الإحصاء كلهم ممتازات ما مرت عليا أي بنت تشتكي من أستاذتها
وزي ما قولتلك هو حيختلف من بنت لبنت , والسنة التحضيرية مو صعبة بس يبالها تنظيم وقت صح ممكن يجيكي أوقات تتعبي وتطفشي فيها بس اتذكري انها السنة المصيرية تتعبي دحين بس ترتاحي في تخصصك
والله يوفقك ويحقق اللي تتمنيه يارب
|