[حليمه احمد]

المشاركة الأصلية كتبت بواسطة سديم١ الله يعطيك العافيه ياقلبي ماقصرتي .. بس المشكله هي إن نفس الشي اللي سويته بالتدريب يتكرر كل يووم يعني روتين بس ادرس الحالات موادهم 'مناهجهم' وحتى غآلبآ تتكرر الحاله نفسها يعني نفس البنت اللي مسكتها امسكها اليوم الثاني واعطيها نفس المواد عشآن كذآ محتاره مره يعني عادي اكرر نفس التفرير كل يووم بنفس الصيغه ؟؟ *انا تدربت في مركز سأكون ونظآمهم تدريس مواد للطالبات المعاقات* والدكتور خالد ماطلب دراسة حاله بس تقارير يوميه عشآن كذآ فقط قاعده اسوي اللي تطلبه المشرفه ع تقييمي وهو التدريس فقط ومثل ماقلت روتين وتكرار عشآن كذا احترت بالكتابه حقت التقارير مره ): فمره ثانيه اسألك عادي اكرر نفس التقرير يوميآ بما إنه مافي جديد بس تدريس ؟؟

^ يب يب وانا زيك في مركز ساكون وبكرا حيكون اخر يوم ليا

يب فااهمتكك ووربي بس انتي حاولي حتى لو مسكتي حالة نفس البنت يومين او اكتر تحطي طفل تاني في راسك ولاحظيه وحاولي تاخدي اهدافو وتكتبيهاا عشان في التقرير تكتبي انك تدربتي على حالتو

بس حاولي ماتكرري نفس الصيغه عبري باسلويك واكيد مو نفس اليوم حيتكرر تراا

يعني مثلا اكتبي عن الطفله دي انو بداتو معاها حلقة التحصين بعدين اديتيها الاهداف منهج فروستنج وتكتبي ايش فايدتو وكيف كان تجاوبها واتقنت ولا لا والمنهج التاني مثلا الاشكال الهندسيه
بعدين اكتبي انها راحت مثلا جلسة تخاطب ازا كانت حالتها محتاجه وتكتبي ايش فايدة التخاطب لعلاج الصعوبات الكلاميه وبعدين اكتبي مثلا وقت الفسحه وعلى ايش دربتيها تاكل بنفسها وتمسك الكوب وبعدين وقت الترفيه واكتبي ايش لاحظتي عليها متعاونه في اللعب وتعتمد على نفسها اجتماعيه او لا

وبعدين حتكتبي انو رجعتو الفصل ومثلا سويتي معاها الاهداف اليدويه الي هيا الواح الاشكال والخرزات وهل اتقنتها في الوقت المناسب او لا وبعدين انو انتهى اليوم ..

واليوم التاني اكتبي عن طفل اخر لانو الدكتور خالد طلب منكم كل يوم حاله مختلفه وحاولي تغيري شوياا في التقرير ومثلا تخلي المناهج انك درستيها له في اخر الدوام عكس الطفله الي قبلو في اول الدوام

انا مسكت طفلين بس من 9 اطفال ترا هما الي كنت ماسكتهم وادرسهم بس برضو كنت الاحظ الاطفال التانيين واخدت اهدافهم وكتبتها وكنت اراقب المتدربات كيف معاهم وكيف تجاوبهم

وفي التقرير كتبت عن ال9 كلهم وصدقيني انا كنت محتاره زيك بس لمن كتبت طلع عندي كل يوم يختلف عن التاني والاطفال برضو كانت استجابتهم وشخصياتهمم مختلفه كتبت عن بعضهم استجابتو ممتازه وكان حبوب والتاني كان لاباس به وعدواني وفيه حاله كتبت عنها انو كان مرا مايستجيب وحالتو صعبه جداا ودا الي لاحظتو وبكدا صارت تقاريري متنوعه وفيها حالات مختلفه
حتى اهدافهم الي كتبتها من الفصل كانت المعلمه معلقتها في اللوح تختلف , كل طفل وله اهداف تتناسب وطبيعة مرضو واضطرابو ومو بس مناهج فيه اهداف تختبر المساعده الذاتيه والجانب الاجتماعي والادراكي والجسماني هي اهداف ل جوانب كتيرا غير المناهج الي تقولي عليها

إن شاء الله اكون افدتك ي قللبي ومعليش عشان استرسلت في الشرح بس حبيت افيدك وافيد البنات الي يبغو مساعده ومررا شكراا لانك نبهتيني على الموضوع مراا نسيتوو

واي سؤال حبيبتي انا في الخدمه

وبالتوفيق ي رررب