[سفيرة الاحلام]

اليوم راح احكي لكم تجربتي الشخصية مع المقابلة والتوظيف..
الحمدلله انا خرّيجة بكالوريوس مايكرو (احياء دقيقة ) 1432 هـ
عملت مساعدة باحث في كليتي كمتعاونة بنظام الساعه لمدة سنه..
حبيت شغلي مرررره صح ان راتبي 1500 بس كنت مستمتعه
مرره بالشغل.. كان طموحي العمل بالمختبرات والابحاث والتقديم بالماجستير..
فتحت المسابقة الوظيفية في جامعة الملك عبد العزيز بشهر شوال الماضي وقدمت فنية مختبر
كل اللي حولي اعترضو ..ولااا وكيف تدخلي بالمرتبة الخامسة والمفروض شهادتك المرتبة السادسة بس ماكان يهمني لان فعلا
كنت حابه هالشغله واحس ان طموحي ورغباتي بتتحقق بالمعمل والمختبر وراح ازيد من خبراتي واكتشافاتي
المهم ترشحت للقبول مبدئيا وتم بعد ذلك تحديد موعد الاختبارين
واجتزتهم الحمدلله وتم ترشيحي للمقابلة الشخصية وكانت بشهر 2 الماضي.. برسالة نصية
اخبروني باليوم والموعد ..
الموعد كان 11 الصباح وحضرت من 8 طبعا قبل الموعد بساعتين ..كنت مستعده لاي سؤال لان لي ثلاث ايام اقرا بصفحات الويب ..غير اني كنت اقرا بكتاب لغة الجسد ..
كان بداخلي خوف بسيط ..
اهتميت بشكلي ولبسي وكان جدا رسمي.. تركت الموضوع لربي وتوكلت عليه وكنت اتمنى تكون من نصيبي لاني فعلا كنت حابه هالشي ..
دخلت غرفة المقابلة كانت الساعة 12 ظهرا مقابلتي..الابتسامه البسيطة مافارقت شفاتي ..كانو خمسه حريم ..لو قلتوا لي مين هما راح اقول لكم مااعرف..
لاني مااعرف الا دكتورة وحده واعرف شكل اللي كانت تراقبني وانا بالممر انتظر اسمي لدخول المقابله..
قلت السلام وجلست ..قالو عرفينا عن نفسك ..عمرك ومؤهلاتك..
خبراتك ودوراتك..سالوني كم سؤال وكنت معاهم صريحه وكنت
اتكلم باادب..سالوني ايش هوه طموحك ..قلت ادرس ماجستير واعمل بمختبر واكتشف كل شي جديد..قالو لو وقعناك على تعهد بعدم طلب العمل كمحاضر راح توافقي..قلت ايه راح اوافق
شغل المختبر ممتع وانا مااحب التدريس واشوف متعتي بالشغل ويمكن وانا اشتغل يعجبكم شغلي وعقليتي وانتم من نفسكم تقولو
والله ذي الادميه حرام تكون هنا والافضل لها تروح مكان يستاهل
الشغل اللي تعمله..
انا على يقين تام ان الانسان الناجح يحب يزيد من رتبه ويترقى ويكون افضل من السنة اللي قبلها..
وهالشي ان شاء الله راح تلاحظوه ..
قالو والماجستير ..قلت بااذن الله راح احاول ان ادارتي توافق ان احصل عليه لان هالشي بصالحي وصالحهم واقدر ان شاء الله
اوفق بين العمل والدراسة وربي معانا ومايضّيع عباده ..
قالو هل تستطيعي الدوام الى 5 العصر ؟ قلت اكيد لان الطالبات ينتهي دوامهم غالبا بالمعامل 5 وطبيعي المحضرة تخرج بعدهم للتاكد من سلامة المختبر..
قالو تداومي الخميس ؟ قلت اكيد وهم ماراح يكلموني اداوم الا لان هالشغله انا المطالبة بالاشراف عليها والقيام بها..
سالوني عن نقاط القوة والضعف..قلت اعمل بشكل ناجح كفرد مستقل واحب العمل ضمن فريق ..لااحب تاجيل الاعمال..اهتم بترتيب المكان..احب ان اسال عن كل شي يحدث معي غريب واحب ان ابحث عنه بالمواقع العلمية.. جيده بالاشراف واحب
تطبيق مايطلب مني برووح رحبه وسعيده ..اكتم مشاعري السيئة وقت الدوام ولااجعل هالشي يأثر على دوامي..عملي لمدة سنه بهالمجال علمني الكثير من الامور اولها الصبر والارادة وانجاز المطلوب في الوقت المحدد..تنمية مهاراتي العلمية والعملية واكتشاف العديد والعديد ولله الحمد ..
وذكرت ان نقطة ضعفي الوحيده هي اني عندما اكون متضايقة فاني اكتم هالشي وانهي العمل المطلوب مني بااقل من الوقت المحدد او بزيادة نص ساعه وتظهر لي نتائج افضل من عملي وانا رايقه بكثيير..
كانت اجاباتي منطقية وعقلانية وكنت على مصداقية تامة معاهم..
ردودي واضحة ..اجاباتي صريحة وبحدود الادب
بعد ماانهوا الاسئلة قلت لهم تشرفت بمعرفتكم ولنا لقاء اخر ان ربي كتب لي نصيب بالعمل معكم وقلت لهم ان معاي نسخة من الملف والسي في ان كانو بحاجته..
سالوني هل هناك شي جديد غير الموجود لديهم..فااخبرتهم بنعم هناك دورات حصلت عليها مؤخرا ولم ارفقها بالملف الذي لديكم ..
اخذوا السي في المعدّل ونسخ من شهادات الدورات وخرجت وانا بقمة سعادتي..
حسيت براحة غريبة وكأنها كانت عقبة وتم اجتيازها بنجاح..
استفدت كثير من هالتجربة ..صحيح اني مااعرف ايش صار بخصوص هالوظيفة ولا اعلم ان كانت من نصيبي او لا
والدكتورة اللي اعرفها رافضة تعطيني اي شي مفيد.. والجهات المختصة لم تعطي الرد الكافي..
ولكن كل شي في علم الغيب ..والارزاق بيد الله ..انا عملت اللي
علي وربي كريم ..الاختبارات ماكانت سهله ..كانت متعمقة مرره
ولو ماكان عندي خبره ماكان اجتزتها والمقابله عدت بخير..
ولكن لليوم هذا انا مااعرف اي شي يتعلق بهالوظيفة..
اغلب اللي عندي كانو يقولو المفروض ماتقولي انك تبي تدرسي ماجستير ..
وناس كثير قالت ماراح تاخذها الا من تمتلك واسطة..
وانا اقووووووووووول املي بربي كبييير خصوصا اني اعتمدت على نفسي ومااقصرت ابد ولا اضطريت اجاوب كذب او حتى
اخبي طموحاتي..اذا جهة العمل ماسمعت رغباتي مين بيسمعها..
والحمدلله اديت اللي علي على اكمل وجه واتمنى يجي رزقي بعيد عن الواسطة لجل مااقطع رزق وحده مؤهلها يمكن يكون افضل مني..
ارجع واقول لكم تجربة ناجحة حتى لو ربي ماكتبها من نصيبي.
اتمنى تعتمدوا على نفسكم عشان تشعروا بطعم الفرح اللي حسيته بعد القبول المبدئي واجتياز الاختبارين النظري والعملي واجتياز المقابلة وصدقوني كل وحده ربي كاتب لها وين يكون رزقها..
وربي يقول اسعى ياعبدي وانا معاك..
معليش طولت عليكم فااعذروووني..ربي يوفقكم ويسعدكم