[خجوـوـولة]

السلام عليكم ورحمة الله وبركاته

الدمية الفاتنة اول حاجه الف مبروك ياقلبي ع درجة التوفل

وعقبال اختبار القسم :)

ومبروك للكل عموما

دحين انا ابغا اسردلكم معاناتي مع التقديم للماستر وابغاكم تساعدوني بحكم انكم اخواتي

اول حاجه اختبرت توفل واخدت اول مره 393 وتاني مره 395 يعني مره كلفت على نفسي وزدت درجتين كانو اشتريت كل درجة ب100 ماعلينا

المهم قلت حدخل اختبار القسم بدي الدرجه ووقت المفاضله
لو مشوني اوكي

مامشوني براحتهم خيره من ربي

المهم طبعا انا كنت حاطه فبالي 3 خيارات للماستر عشان اختار واحد منهم واكمل فيه

1- اول شي كان فبالي ادارة خدمات صحية وطبعا شلتو من راسي لمن عرفت انو اختبار القسم كلو مصطلحات طبية وبالانقلش فاستبعدتو من راسي معنو مره نفسي فيه

2- حطيت فبالي ادارة واقصاد ( ادارة اعمال ) ولمن شفت المتقدمات مره كتير قلت درجتي اكيد حتكون متدنية بحكم انو مو تخصصي وخايفه الأسئله يجي فيها عك كتير فقلت بلاشي يضيع عليا التقديم وتروح السنة كدا فطيرتو برضو من راسي

3- اخر شي قلت خلاص حرجع لتخصصي واكمل فيه اللي بديت منو فكلية الهنا ( كلية الإقتصاد المنزلي ) تخصص تغذية ،، (( تراني خريجة السنة دي احد معايا )) المهممممم انا مره كنت مستبعده التغذية لسببين ،، الأول انو شفت التغذية في الكلية تدريسها مره سيء وما أكلني عيش كل ماقدم على مكان مايقبلوني

ثانيا انو الجامعه بس الماستر في التغذيه تغذيه عامه ،، مره كان نفسي يكون في تخصصات اكتر ،،
يعني اخاف تكون فكرتي غلط اتمنى احد يصححها وتكون في اقسام تانية

فمن دا المنطلق ومن دا المنبر اتمنى انكم تساعدوني فاختيار تخصصي في الماستر لأني بجد محتاااره
وهل تنصحوني اختبر للمره الثاثه في التوفل عشان اخد ال400 ؟؟
<< ماتبغا تدفع 600 ريال للجامعه خلاص خلصت فلوسي وطفشت اختبر
المفروض صراحه يعفونا من الدفع كل مره
المهم يابنات قولولي وانصحوني ايش اختار ؟؟
مابغا الوقت يضيع عليا ،،
واتمنى من اي بنت تدخل الموضوع وتعرف كيف نظام اختبار المفاضله للأقسام اللي ذكرتها فوق تدينا ولو نبذه بسيطة عنها

واعذرو كثرة كلامي
اتمنى القى رد فاقرب وقت
فمان الله