اكتشفت أمر مؤخرًا وكلما تقدم الوقت تأكدت منه !
أنا أميـّة في الزينة بالنسبة لغالبية البنات !!
طبعًا فيه عدة عوامل لهالشيء
أولًا ما أحب أنزل السوق ولو نزلت أحس إني على راسي أمشي
وما آخذ راحتي غالبًا فبالتالي ما أنتبه للموديلات والحركات الجديدة النازلة
يعني أحط في بالي موديل لبس محدد أروح دغررري اشتريه هو حتى لو فيه أحلى منه /:
ولو ما حصلته غالبًا غالبًا خلاص أشيل الفكرة من راسي نهائيًا وأرجع البيت بدون شيء
ثانيًا بطيييييييئة جدًا في تقبّل الجديد ، يعني مثلًا نزلت موضة جديدة وحلوة ومناسبة لذوقي
اشتريها بعد فترة طويلة من نزولها وبعدما يستهلكوها كل من حولي وإذا اشتريتها ولبستها
أنششششب فيها خلاص أجلس فترة طويييييلة ما أشتري إلا هي ولا ألبس إلا هي ولاأفكر أبدا أدور غيرها
دامني ارتحت لها وناسبتني كثير خلاص ما أغيرها إلا إذا نزل شيء جديد يعجبني ويناسب ذوقي
ثالثا أقع تحت حصار في التنويع في اللبس والألوان مثلا ألوان الشنط والشوزات لازم ما تكون ألوان ملفتة
لذلك خلاص أقلمت نفسي وكيفت نفسي على الموديلات والألوان الي مسموحة لي فقط عشان ما أتهزأ ويتنكد خاطري
ورغم إنه في السنين الأخيرة بدأت تمنح لي بعض الحرية ، لكن سبحان الله تعودت على ما رُبيت عليه بداية
رابعًا استخسر اني أدفع مبالغ مالية كبيرة في مجرد قطعة لبس أو شنطة أو شوز أو اكسسوار أو مكياج
أو عطر أو أي شيء ثاني من أمور الزينة التي تتزين بها نساء العالمين لذلك مو أي شيء يعجبني اشتريه
خامسًا ما أحب الأشياء اللي تتعلق بوجهي !!
ومنها المكياج أحسه شيء معلق بوجهي خاصة لو كان مكياج للسهرات وحفلات الأعراس
لذلك آخر مرة رحت لكوافيرة بزواج أختي قبل 5 سنوات وطبعا أعذذذبها عشان تحط لي مكياج خفيف
وصرت أنا أحط مكياج بنفسي بالقوة يبين إني حاطة مكياج لأنه مررررة خفيف حتى لو بحفل زفاف أحطه بنفسي
لا وكمان ما استخدم كريم أساس المخصص للمكياج اللي يكون ثقيل ، أستخدم كريم ثاني من ضمن استخداماته
انه ينفع كريم أساس ، وهو خفيف جدا جدا وريحته حلوة ويرطب البشرة وبس أكتفي فيه بدون بودرة
ومسحة روج وكحل سايل أثقله شوية لأن العين رسمتها تشكل فرق كبييييير في الشكل وشوية بلاشر وبس
وأي شيء يتعلق بالوجه من ضمنها المكياج الثقيل مررررة ما أحبه ، الرموش الصناعية الخزام
الفصوص اللي تنحط قريب من العين والحواجب ، ممكن أحط عدسات نادرا لأنها مع السهر تحمر بالعين
سادسا رغم كل هذا أحرص اني أكون أنيقة جدا جدا ولكن غالبا بنمط معين بدون تغيير ولا تجديد
بس الصراحة أحيانا أتمنى أني أكون مغامرة وألبس موديلات وألوان وأعمل تسريحات جديدة وغير نمطية /:
وش اقتراحاتكم لي ، والا ماشي حالي وما يحتاج أغير شيء ؟