[LeLou]

السلام عليكم ياليت أحد يفيدني لأني مررررة محتارة،،، أنا احب الفيزياء كتييير وأميل للكيمياء كمان لكن المشكلة في الفيزياء إني كل ما أسأل أحد عن تخصص الفيزياء يقولوا صعب وماراح تنجحي فيه الا بالدف وخصوصا في جامعة عزوز يعني هل الفيزياء صعب لهذي الدرجة ؟ طيب ،، أنا ابغى اتخصص فيزياء بهدف أكون معيدة لأنه نسبة المعيدات بالفيزياء قليل ففرصتي أكبر بإذن الله...

و عليكم السلام و رحمة الله و بركاته..

بصي يا حلوة أنا حأتكلم عن قسم الفيزياء لأنه تخصصي و الحمد لله وصلت لمرحلة متقدمة فيه..

بصراحة التخصص مو سهل أبدًا - و لا أظن أنه يوجد تخصص سهل - يعني إنتي في الجامعة عديتي التحضيري أي تخصص راح تدخليه أتاكدي أنك حتواجهي نوع من الصعوبات..
و لو في أي جامعة ثانية أظنه راح يكون أسهل عليكِ،، لأنه جامعتنا مخففة و حاذفة مناهج بسبب نفور الطلاب من دا التخصص بحجة أنه صعب..

المشاكل الحقيقية إللي راح تواجهيها فعلاً في القسم:
أولاً: أنه راح تطلعي من عدد لا بأس به من الكورسات لا تفقهين شيئًا،، و لكن دا مو معناه أنك ما راح تقدري تعدي،، في ناس كثير بتعدي و بدرجات عالية كمان،، لكن مع الأسف بدون معلومات مفيدة..

ثانيًا: مستوى المناهج مو مرة عالي،، و أغلب الدكاترة بيشتكوا من الخطة و ما أعرف أيه..
لكنه في نفس الوقت مو في الحضيض الأسفل..
لذلك لازم تختاري مواد اختيارية تقوي حصيلتك العلمية،، و بعد ما تتخرجي تقرأي و تعوضي إللي ما فهمتيه و إللي ما هو موجود أصلاً..
لكني أسمع أنه مناهج الماجستير قوية و الله أعلم..

و إذا راح تشتغلي معيدة،، دا شي مرة كويس لأنك راح ترجعي تحاولي تفهمي إللي ما فهمتيه و راح تكون عندك فرص قوية لاكتساب الخبرات و تثبيت المعلومات..
و راح يمشي معاكِ الحال إن شاء الله،، أنا لما أنظر لدكتوراتي و أفكر أنهم درسوا في نفس الجامعة دي أكتشف أنه الواحد عنده أمل..
يعني لا تطالعي بس في السلبي،، الواحد لو عنده هدف مصمم عليه،، يتوكل على ربنا و يخلص النية و ربنا بإذنه و قدرته راح يكون معاه..

//

نصيحة أخيرة لك:: الفيزياء تخصص محتاج شغل،، حطي في بالك إنك لازم تشتغلي على نفسك و شغل قوي كمان،، لذلك إذا ما عندك دي الاستعدادية من بدري أنصحك فكري لك في تخصص ثاني..
و كمان يحتاج مهارات رياضية كويسة،، فلو إنت مو ماشية في الرياضيات ما أنصحك بيه أبدًا..
هو تخصص للي عندهم فضول الاكتشاف و يحبوا يعرفوا طريقة عمل الأشياء..

لا تنفجعي من كلامي بس أنا قلت لك الشي اللي أنا شايفته بعيني عشان تكوني عارفة الإيجابيات و السلبيات..
و أكبر إيجابية نظرتك في المعيدات،، بالفعل عندنا عجز في المعيدات و الدكتورات كمان،، و أنا كمان عندي نفس التفكير دا..
إذا اتخرجت بمعدل عالي راح يكون عندك فرصة كبيرة إن شاء الله..

أي استفسار يا حلوة احنا حاضرين..
استخيري أولاً و أخيرًا و ربنا يقدم اللي فيه الخير..
و تقبل الله صيامكم و قيامكم||~