[LeLou]

بآكــ..

*النقطة الاخرى اللي فهمته من جوابك للاخ سملق انه مثلا لو شخص عاش 15 سنه على الارض او عاش 15 سنه على القمر . بالنسبة للشخص نفسه هو نفس مقدار الزمن وعمره راح يزيد 15 في جميع الاحوال . ولا راح يرجع او يقدم في زمنه هو ولكن في قياس الارض راح يكون يتعدى اكثر من 15 سنه بكثير ! اوك طيب وش علاقة الجاذبيه في الزمن ؟ اللي فهمته انه الجاذبيه من عوامل اختلاف الزمن ولو اهلمنا عامل سرعة الضوء والدوران الزمن نفسه يكون ثابت للشخص زي ماقلنا , ولكن قياسه من مكان الى مكان اخر راح يختلف ايضا باختلاف الجاذبيه , هل هذا الكلام صحيح ؟

من الخطأ انه أنا أحسب باليوم لأنه اليوم مدته تختلف من كوكب لآخر تبعًا لاختلاف قطر الكوكب و سرعة دورانه حول نفسه و بعده عن الشمس و ما إلى ذلك..
لكن احنا عشان نكون أكثر دقة راح نحسب بالثواني..

أنا مو قصدي كذا،، لأنه لو قلت كذا معناها حنرجع لاعتقاد نيوتن القديم أنه الزمن مطلق و اعتقاد وجود ساعة الكون كله ماشي بيها..
و اعتقاد التكتكة الكونية الموحدة..

أنا قصدي أنه مو المكان اللي راح يؤثر في مرور الزمن..
إللي بيأثر على مرور الزمن لجسم بالنسبة لنا في الواقع هو سرعة الجسم المتحرك و الجاذبية..
الجاذبية في الواقع لها تأثيرات جدًا رهيبة غير اللي اكتشفها نيوتن..
طبعًا الكلام عن الجاذبية يعني الكلام عن النظرية النسبة العامة..

أممممم،، أنا راح أبدأ بالسرعة بعدين نرجع للجاذبية..
أنا كان قصدي في الموضوع،، انه المسافر عبر الزمن مو بالضرورة يكون على كوكب ثاني..
الشخص لما ينتقل بالزمن ممكن يكون موجود قدامنا زي مثال الإلكترون اللي ذكرته سابقًا و دي هي الحقيقة في الواقع..
احنا دايمًا نقول مسافر الزمن يطلع الفضاء و يروح يرجع يلقى نفسه في المستقبل ليش؟!
لأنه أنا عشان أتحرك بسرعة جدًا عالية لدرجة ممكن تحدث تغير في الزمن،، لازم أركب مركبة فضائية لأنه هي المركبة الآكثر سرعة قدرنا نخترعها احنا البشر..
و طبعًا مستحيل حأمشي بمركبة فضائية على الأرض،، دي ما لها مسار يوسعها و حتكسر الدنيا..
عشان كدا دايمًا نقول نرسله للفضاء،، لأنه دا اللي نقدر عليه،، لكن مو هو دا شرط حدوث فرق في الزمن..
يعني المركبة الفضائية تعتبر كأنها آلة زمن لأنها هي اللي راح تحركنا بالسرعة الكبيرة دي..

معلومة: يوجد مركبة فضائية - لا أذكر اسمها - تتحرك بسرعة 17000 ميل/الثانية،، و كان راكبها شخص اسمه (Sergei Krikalev)..
بعد أن قضى 803 أيام يتحرك بدي السرعة خارج مجال الجاذبية،، مما يعني أن الزمن كان يمر بالنسبة له أبطأ مننا..
انتقل دا الشخص للمستقبل..
و لكن كم تعتقدوا انتقل للمستقبل؟!
فقط 48 جزء من الثانية..
دا عشان تستوعبوا قد أيه السرعة لازم تكون عالية..

و آخر حاجة،، المكان بيأثر في حالة انه انتقلنا لكون غير الكون اللي نعيش فيه..
الشي اللي بيسمى Parallel universes..
ما أعرف أيش ممكن يكون اسمها بالعربي يمكن أكوان موازية..
المهم،، في نظريات كثيرة في الفيزياء من ضمنها ميكانيكا الكم و نظرية الخيوط،، بتتكلم عن وجود أكوان غير الكون اللي بنعيش فيه..
و اللي ممكن لو انتقلنا لدي الأكوان راح نلقى فيها أشياء غريبة..
طبعًا الاحتمالات لا نهائية،، ممكن نلقى نفسنا مرة ثانية،، ممكن نقدر نشوف المستقبل،، ممكن نرجع نشوف الماضي،، ممكن نلقى الزمن يتحرك أسرع أو أبطأ،، أو يتحرك بالمعكوس..
و اللي أعتقد شخصيًا و الله أعلم أن يوجد أكوان موازية،، و لكن أيش اللي فيها،، الله أعلم..

بالنسبة للجاذبية::
أمممم،، مسألة الجاذبية و ما فيها،، أوضح شي أقدر أقوله،، أنه العلماء لاحظوا أنه لما نبعد الساعة عن مركز الجاذبية التيك تبعها يصير أسرع..
أنا حقيقة ما اتعمقت في الموضوع دا مرة كثير،، لكن أعتقد و الله أعلم أن السبب يرجع لأنه الجاذبية تقوس الــ (Spacetime) تبعًا للنظرية النسبية العامة لآينشتاين..
ما أبغى أخوض كثير لأني ما أحب أتكلم في شي ليس لي فيه العلم الكثير،، لكني نقلت لكم التجربة اللي شفتها انعملت..

وهنا ندخل بالشق الثاني بالموضوع وهو نظرية الانفجار والزمن . بالنسبه لي الموضوع اشبه بالثقب الاسود , اللي فيه تتعظم كتله الكوكب الغازي لحد ماينفجر بسبب التفاعل الهدروستاتيكي ويصبح الجسم ضئيل جدا ومضغوط بكثافه عاليه لدرجة انه يسبب اختراق في الابعاد الاربعه وينكسر فيه الضوء وتنعكس كل قوانين الفيزياء اعتقد ان الزمن له علاقه بالجاذبيه الي حدثت من الانفجار الكبير .واللي بها يتمدد الكون ويدور الى ان يتم الانفجار والعودة الى مركز البدايه (يوم نطوي السماء كطي السجل للكتب كما بدأنا أول خلق نعيده وعدا علينا إنا كنا فاعلين) ( الأنبياء) وزي مانعرف في الاصل الكون كان مادة مضغوطه صغيره . وبالانفجار بدا الكون والماده بالتوسع والحركة ومن هنا نشأ الزمن من بعد حركة المكان حول مركز ثقل الكون.

أنا ما أبغى أتكلم كثير في موضوع الانفجار العظيم عشان من جد لا تحصل لخبطة و ندخل في الشبهات..

بس على حكاية الثقب الأسود،، هو يبتلع الضوء و يخليه يتقوس إذا مر قريب منه مو يكسره على حد علمي..
عمومًا احنا ما نقدر نجزم أيش اللي بيحصل في وسط الثقب الأسود لأنه حاجة احنا ما نقدر نوصل لها لأننا حنموت طبعًا..
البعض يقول أنه بوابة بين الأكوان المتوازية اللي اتكلمت عنها أول و أفكار مرة كثيرة غير كدا،، لكن إلى الآن ما في كلمة أكيدة..
لأنه طبعًا مافي حاجة قدرت تدخل و تطلع عشان نعرف أيش اللي صار بالداخل..

كمان شغلة ثانية بعلق عليها،، الكون بيتمدد مو بفعل الجاذبية،، و الجاذبية ما لها دخل بالانفجار العظيم؛؛ لأنه الجاذبية قوة تنتج عن وجود كتلة و ما لها دخل بأي شيء آخر..
الكون بيتمدد بفعل شي يسمى الطاقة المظلمة (Dark energy) إللي هي مو موضوع حديثنا لذلك ما راح أتكلم عنها..
أعتذر لكني انسانة أركز على التفاصيل الصغيرة في الكلام ..

مره اخرى . اشكر اختي LeLou , استفدت منك فعلا

العفو،، و دا شي يسعدني أني أقدر أفيد غيري باللي بتعلمه..
و بكذا نكون انتهينا من التعقيب على رد الأخ أكتوبر||~

راح أنتقل لرد الأخ سملق:~

أكتوبر : بخصوص نقطة مهمة ذكرتها في كلامك ( انك تستغرب ذكر بعض الاشياء المستقبلية بصيغة الماضي ) انا بعد أستغربت هذا الشيء ! موجود في القرآن الكريم ، يذكر الله تعالى يوم القيامة والاحداث اللي تحصل من نعيم وجحيم بصيغة الماضي !!!!!!!!!!!!! وكأن هذا الشيء قد حدث وأنتهىىىى !! نقطـــــة مهمة جداُ ...+ هل لهذا تفسير ؟؟

رديت بخصوص دي النقطة + ما أظن أنه عندي تفسير ليش كل شي مذكور بصيغة الماضي،، لازم نقرأ الآيات في الأول و نرجع لكتب التفسير عشان نفهم معناها مزبوط و أنا لست شخص على علم قوي بالدين..

شعور الشخص بالزمن ماراح يتغير ،، لانه يعيش الزمن " بالنسبة لنفسه " راح يحس هذا الشخص انه عاش 15 سنة .. ويزيد في عمره 15 سنة بس المشكلــة في " شعور أهل الارض " بالزمـــــــن فهو لو يرجع الارض ،، يمكن راح يلاقي اهل الارض ما مشوا الا 5 سنوات فقط ( خلال هذي الـ 15 سنة ) !!! وهذا يرجع للأختلاف في الشعور بالزمن " المجال الزمني " للكوكبين المجال الزمني للأرض يختلف عن المجال الزمني للقمر .. وهكذا

ما أعرف بالزبط أيش قصدك الرد دوخني لكني رديت على نفس الاقتباس..
أتمنى أكون وصلت وجهة النظر،، اللي هي بالمناسبة ليست وجهة نظر شخصية و إنما ما يقوله العلماء..

خلوني أقول لكم بداية ما فكرت في هذا الامر بطريقة جديّة : كنت مره جالس افكر او بالاحرى كنت جالس " أوسوس " المهم جتني فكرة جهنمية وهي الزمن = السرعة * المسافة قلت في نفسي / لو المسافـــــــــــــة = ثابته كلما زدنا السرعة فأن الزمن يقل !

معليش أنا ممكن أكون وقحة شوية و أعتذر عالوقاحة..
إنت من فين جبت العلاقة الرياضية دي،، ممكن تحاول تثبت لي وجهة النظر؟!

مسألة لو المسافة ثابتة كلما زدنا السرعة فانه الزمن يقل دا شي يعرفه أبدأ مبتدئ في الفيزياء حتى من أيام المدرسة..
و كمان بحسب العلاقة الرياضية اللي سبق ذكرها المفروض العلاقة بين الزمن و السرعة طردية يعني كل ما زودنا السرعة زاد الزمن لأنهم الاثنين في بسط طرفين المعادلة..
و العلاقة بين السرعة و المسافة هي اللي عكسية لأنهم في بسط نفس الطرف..
مو معقول للآن ما نعرف نحدد العلاقة طردية و لا عكسية من شكل المعادلة الرياضية..
كمان أنا عشان أخترع صيغة رياضية لازم أول شي أراعي علاقات التناسب فين الطردي و فين العكسي،، و أراعى الوحدات،، و أحاول أكتشف ثابت التناسب..

كمان صح بالفعل زي ما قلنا لو المسافة ثابتة كل ما زودنا السرعة قل الزمن..
لأنه العلاقة بينهم عكسية بحسب العلاقة المعروفة من الإبتدائي: الزمن = المسافة/ السرعة
لكن اللي بيقل هو الزمن الازم لقطع المسافة دي و ليس القصة أنه تكتكة الساعة حتبطآ..
أنا بعدين راح أشرح بتفصيل أكثر تأثير السرعة على الزمن..
هي فعلاً بتأثر و لكن مو بالشكل اللي إنت ذكرته..
و أعيد يوجد علاقات رياضية خاصة بحساب الشغلات دي،، علاقات انحطت و اختبرت و اتجربت و اثبتت صحتها..

* ثم راودتني الفكرة :: هل يمكن الوصول لسرعة كبيرة جداً ،، بحيث يصل الزمن لـ نقطة الصفر ! ننتظر تعلقياتكم على هذه النقطة

دي ما يبغالها تخمين..
دي يبغالها ورقة و قلم و آلة حاسبة..
لو لقيت تشجيع راح أسويها << تتغلى كمان ..
أعتذر بس أنا مع الأسف مشغولة بالترم الصيفي..

و أعتذر مرة أخرى أخ سملق على الرد القاسي و لكن أنا بصراحة حبيت انك تتعلم و الأخطاء دي أثارت جنوني..

لي عودة مرة أخرى زي ما قلت عشان أشرح مسألة تأثير السرعة على الزمن،، إذا لقيت الموضوع لسا مفتوح ||~