[Meso0o12]

ما شا اللله الناس كفوا ووفوا

شوفو انا عن نفسي بدات بخطة الف فكنت مرة شادة حيلي و متحمسة و زاكرت اول باول و الحمدلله

بالنسبة للترم التاني كان دسم اكتر و انا طفشت من هرجة اول باول

فكنت مثلا احسبها قديش بقي عالمد و اقسم وقتي بناء على كدا

تقريبا كان تقسيمي تلاتة اسابيع ، فكنت احيانا الاقي اسبوع او اسبوعين اجازة ما ازاكر فيهم لانو مثلا يكون بقي على النصفي خمسة اسابيع

بصراحة دي الطريقة نفعت معايا كمان بس اهم حاجة التخطيط و تقسيم الوقت مو نمشي سبهللة

تاني شي احب اقولو انو لا تسمعوا لهرجة الانجليزي يرفع المعدل
ازا انتا او انتي شاطرين في الانجليزي و ما تحتاجوا قرامرز و كان اساسك طيب

لا تقول اخد انجليزي ارفع معدلي حتى لو كان بس لفل فور

لانو مرة ياخد وقت و مجهود و احسلك تحط وقتك و مجهودك في مزاكرتك للمواد الاساسية بدالو

اما ازا تحتاج انجليزي عاد دا شي تاني طبعا لازم تدرسوا

بالنسبة للفيزياء الكتاب مافيه مسائل كتير و عشان تجيب درجات عالية لازم تحل كتير فانا كنت اجيب ملخصات اشرف بركات كانت جميلة و طفحانة بالمسائل و كنت ازاكر الكتاب عشان الكلام النظري

الرياضيات كان الكتاب و اسئلة الواجب و ملخصات جمال السعدي

حاسب و اتصال ما يحوجو

احياء سلايدات تتقسم مثلا كمية النصفي كانت 285 سلايدز نقسمها على تلاتة اسابيع كلل يوم عشرين سلايد او شي زي كدا و طبعا لازم التريننق بعد كل فصل اللي هوا اسئلة حطها قسم الاحياء لانو فيه اسئلة عجيبة

كيمياء كنت ازاكر سلايدات نهى وزان و بس
هيا مادة طويلة و ليها مليون مصدر للمزاكرة
بدات اول شي بالكتاب و زاكرت سلايدز ليلى و زاكرت سلايدز نهى

لقيت انو اللي كان احسن و اسهل و افضل سلايدز نهى فانصح بيها
بالاضافة ترا الكيميا مرة سهلة حتى مو لازم ملخصات

اخر شي الاحصاء كان الكتاب و الاسئلة حقت الواجب تكفي برضو مو لازم ملخصات
هيا مادة دمها تقيل بس لمن تفهمها تسير سهلة

بس في النهاية انصح بحل نماذج قديمة ترا مرة شي مهم

و بس

لو افتكرت شي تاني حاقولكم

الله يوفقكم و يعينكم