[noonz]

* تجربة العضوة : smsm السلام عليكم ورحمة الله وبركاته هنا حكتب لكم تجربة عن اللي مريت فيها بالتحضيري . زي ماكتبوا لنا الي قبلنا ومن جد استفدت منه.. لازم تعرفوا المواد وطبيعتها وأفضل الاساتذة والملخصات قبل ماتبدأ الدراسة .. بس قبل كل شيء أهم شيء • اعتبروا التحضيري رحلة ,مغامرة ااو تجربة تمر سريعة في غمضة عين .. • احضروا كل المحاضرات .. • قفلوا أذنيكم (اذا ماكان الكلام من دكتورتك وسمعتيه بنفسك طنشيه ).. • لا تفكروا بالبونص أبدا عشان لاتتحطموا في النهاية .. • لاتقارنوا نفسكم كدفعة 13 بالي قبلكم أبدا هادي جامعة ولها الحق تغير أنظمتها كل سنة زي ماتبغى بداية خطة أ هي 4 مواد بدون الانقلش ..بس كنت أعتبرها مادتين !! نبدأ بالدسم 1- الرياضيات المادة حلوة بس يبغالها كرف محترم لازم تكوني فاهمة مره كويس وتحلي تمارين كثير وقسم الرياضيات يحبوا يخترعوا في الاسئلة بس كثير بنات جابوا +A و100... المصادر:- الكتاب وملخص السعدي وشرف بركات والأفضل أشرف يركات لانه أفكاره أكثر من السعدي.. الدكاترة:- درستني أ/ هتون الشعيب مره كويسة شرحها حلو ومرتب ومنظم ودقيقة في الوقت .. ويمدحون أ/دعاء قاروت بس صراحة ما اعرفها.. 2- الفيزيا مادة أسهل من الثانوي بكثير حبيتها بالجامعة مره بسيطة بس كتابها سوا فيا مقلب محترم أول ماشفته قلت مستحيل انجح في المادة دي بس اكتشفت انه الكتاب ماله داعي وكلامه زايد طبعا المادة سهلة بس يبغالها تركيز وفهم وقسم الفيزيا يحبون ينسخون اسئلة السنوات الي فاتت فعليكم بنماذج الاختبارات . المصادر :- ملخص طلعت سالم كنت اذاكر منه النظري & أشرف بركات المسائل .. واهم شيء نماذج الاختبارات فيه نماذج محلولة بالتفصيل في خوارزم 7 تنزلها أ/هناء فرحان مره كويسة ... الدكاترة:- درستني د/ لبنى سندي وهي منسقة المادة شرحها حلو مررره مفصل أحيانا يوصل لحد الملل بس تعتبر كويسة يحضر معانا بنات من شعب تانية لدرجة يجلسون في الأرض مالهم كراسي. أنا حضرت لـ أ/ سناء أباظة شرحها حلو ومختصر تعطيك المفيد باختصار بس تراها شديدة جدا. . ويمدحون أ/ هناء فرحان .. 3- الحاسب مادة سهلة يبغاللها حفظ وفهم كتابها ممل حبتين..ركزوا فالنظري والعملي . المصادر :- الكتاب وكنت أذاكر من سلايدات أستاذتي كانت تسهل لي الحفظ .. الدكاترة:- درستني أ/حليمة سمرا أستاذة فريدة من نوعها تهتم بدرجات الطالبات بشكل مو طبيعي وتراجع وتعطينا تمارين.بصراحة أستاذة أخلاق وذوق وتفهم ... 4- الاتصال ماودي أتكلم فيها عشان لاتخافوا بس بالنسبة لي مادة غثيثة جدا وماحبتها أبدا أهم شيء سوا التكاليف كاملة وسلموها في وقتها وكدا عندك 30 درجة في جيبكم.. وكدا خلصنا مواد الترم الآول مجملا سهلة بس لاتستهينوا فيها كنت اعتبرها مادتين لاني كنت بس اذاكر الرياضيات والفيزيا دايما أما الحاسب والاتصال ليلة الاختبار .. أعرف بنات كثير جابوا فيها 5 ماشاء الله بس انتوا شدوا حيلكم فيها وفالكم طيب .. الترم الثاني , 3 مواد بس ثقيلة دم ... 1- الاحصاءمادة اذا مافهمتها مزبوط أنسي أمرها أهم شئ الفهم خاصة في الاحتمالات هي سهلة للفهمها صح .. المصادر :- الكتاب مهم جدا وملخص السعدي وكمان أشرف بركات وكان في المنتدى هنا ملخص قاسم مضوي جيد اختاروا الي يناسبكم..وقسم الاحصاء يحبون نماذج الاختبارت كثير فعليكم بها .. الدكاترة :- درستني أ/ سماح سندي شرحها مره كويس واكتبوا الملاحظات معها وشعبها مرررره زحمة,, وكمان يمدحون أ/ شفياء يقولوا كويسة .. 2- الكيمياء مادة مدري كيف طار مني A+!! مادة تتعب في المذاكرة بس اختباراتها سهلة .... نفس كلام الثانوي مع بهارات بسيطة ... المصادر :- سلايدات د.نهى وزان وملخص السيد وملخص يوسف زويل .. الدكاترة :- درستني د.نهى وزان شرحها جيد وتقولك المهم والمفيد ... يمدحون د.ليلى الحربي يقولون شرحها حلو ... 3- الأحياء محا أتكلم عنها لاني العبرة تخنقني فلحت فيها بصعوبة تامة .. بتركها لغيري يتكلم عنها... وكدا خلصنا مواد الترم الثاني , حبتين غثيثة بس لوشديتوا حيلكم فيها بتمشون فيها ... نجي للمادة المشتركة بين الخطتين English لو تقتدروا تتفكوا منها افضل لكم عادلوها بالتوفل ... دوامها مره طويل بس لو ماقدرتم تتفكوا منها ترى حتتحسن لغتكم الانجليزية مزبوط .. وترى أغلب اسئلة اختباراتها من الكتاب.. وبكذا الحمد الله خلصت رحلتي مع التحضيري وطلقتها بالثلاث خخخخ...وعقبالكم . ومن هنا أشكر كل طلاب وطالبات دفعتي لانو كنتوا كقلب واحد ولا احد يـأنى عن مساعدة الثاني صح أحيانا عندكم مشادات فيما بينكم بس في النهاية تبقون اخوان واخوات .. وأتمنى اذا احد زعل مني ولا قصرت معه السموحة فما بدر مني فغير مقصود.. دعواتي لكم بالتوفيق والنجاح دوما وأبدا ..