بسم الله الرحمن الرحيم
اول شي السلام عليكم و رحمة الله و بركاته
دفعة 13 العزيزة انا الحين ابا اكتب لكم تجربتي عن السنة التحضيرية
اول ما تسجلت في الجامعة كان عادي و فرحانة و لمن جات المدارس كان عندنا الاحد اليوم التعريفي و كنت مو ناوية اداوم الاسبوع الاول بس في الليل وصلتني رسالة على جوالي انو لازم التحضيري يبدأوا يداوموا من السبت ( الله يسامحهم ) رحت السبت ما اعرف و لا شي بالدنيا دخلت الجامعة و سألت السكيرتي راحت صرفتني و قالت لي روحي 13 الشؤون و دا كان يمكن الساعة 7 و لسا ما احد من المسؤولين جا رحت 13 قالولي انتي علمي روحي كلية العلوم و رحت هناك قالولي اطلعي الدور التاني و روحي للشؤون رحت لهم ما في احد سألت بنت الله يسعدها دنيا و اخرة يا رب كل ما افتكرها ادعيلها قالتلي وين جدولك و فهمتني كل حاجة في الجدول و انا اصلا ما كنت شي في و قالتلي الحين الساعة 8 عندك محاضرة حاسب مبنى 2 و وصفت لي وين القاعة المهم رحت ل 2 سألت سكيرتي قالت لي روحي مكان ما البنات متجمعين و رحت لقيتهم بنات التخصص و ما لهم دخل في التحضيري وقتها انا بدأت ابكي و خلاص انهرت كل وحدة تصرفني و لا احد فادني غير البنت الله يسعدها المهم طلعت من مبنى 2 لقيت صحبتي و خلاص ما صدقت اشوف احد اعرفوا و في المغامرة السابقة غير انو رجولي تكسرت من المشي الجزمة الله يكرمكم كانت جديدة و رجلي انجرحت و صارت يألمني الم مو طبيعي و ابويا عصب جالس برا قريب ساعة مو عارف يمشي و يسيبني و لا رح ارجع البيت المهم جلست مع صحبتي و لمن جات الساعة 11 حسيت بجوع مو طبيعي و رحت للكفتيريا المقر الرئيسي 18 و ابا شي آكله و ما في غير طعمية اشتريتها و الله لا يوريكم جاني غثيان مو طبيعي و سخنت 38 و نص و خمول لدرجة انو ما لي خلق اروح لليوم التعريفي دي قصة اول يوم ....
و لو بتكلم عن الايام المأساوية ما رح اخلص اليوم و ترا الجامعة مرة مرة مرة غير عن المدرسة المدرسة مرة احلى بكتير انا اول ما دخلت الجامعة و اول الايام فيها دائما ابكي لازم ابكي ما يعدي يوم بدون ما ابكي لسبب غير معروف ...
السنة التحضيرية سنة سهلة جدا للي يذاكر اول بأول و من الملخصات انا اول كنت ما ادري عن ملخصات و لا عن شي و الاختبارات الدورية الاولى رحت فيها مع انها كانت مرة سهلة .
خطة أ
الفيزياء :
انا درست عند وفاء الخطيب بصراحة ما كنت افهم منها الا قليلا
الكتاب ابدا ما لو داعي و ما تستفيدي منو ابدا و الدفتر تبع المحاضرات ذاكري منو الملاحظات اللي تكتبيها مع الاستاذة
الملخصات تبع يوسف زويل مررة كويسة و جربتها و أشرف بركات كمان كويس بس ما جربتوا
منسقة المادة لبنى سندي
الدكاترة اللي كويسين سناء اباظة
الرياضيات
انا درست عند منية ناغي مررة شرحها حلو بس سريعة في الكلام يعني اللي ما تفهم بسرعة انصحها تغيرها و هيا طيبة صح انها ما تبتسم بس و الله طيبة
الكتاب مهم و مرجعك الاول و الاخير صح انو رح تكتبي مع الاستاذة بس برضوا في اشياء تتأشر من الكتاب
الملخصات تبع جمال السعدي مرة روعة صح انو يكتب بكحل او بقلم مو مبري بس مررة حلوة و أي شي مو فاهمتي ارجعي للملخصات تلاقي مشروح
الاستاذات الكويسات منية ناغي انا مررة كنت افهم منها و كمان دعاء قاروت البنات مررة يمدحوها بس ما جربتها
الحاسب
مادة مرة سهلة و سخيفة يعني تجيبي a+ بالراحة لانو كل دروسها برامج اوفس بس اخر فصل طويل و غثيث شويتين
الاستاذة اللي درستني ميادة المصري مررة حبوبة و طيوبة
الاتصال
مادة غثيثة ما تعرفي اش فايدتها بس سهلة هيا كلام كتير بس يوم الاختبار اقريها مرتين بتركيييييييييييز و روحي اختبري و تضمني a+
انا درستني سمر الخليفي مرة حبوبة و تتساهل في وقت الخروج
الاساتذة الكويسين اميرة النمر تخلي الكلاس اكتر من روعة
مواد الترم التاني
الاحصاء
بالنسبة لي هوا اختصار لمعنى كلمة لغوصة بس و الله سهلة و البنات درجاتهم مررة عالية و انا خسرت درجات في اشياء هبلة و سخيفة مررة
انا درست عند سماح سندي شرحها حلو و افهم معاها بس لمن ارجع البيت اراجع المحاضرات و اذاكرها لا افقه شيئا في الاحصاء
الملخصات اشرف بركات مرررة حلو انا جربت السعدي ما عجبني مع انو الترم الاول في الرياضيات مررة فادني
الدكاترة الكويسين ما اعرف و لا احد بس استاذة شفياء الحضيرة هيا منسقة المادة و كانت تمشي مع البنات حبة حبة و تأشر معاهم و تحل تمرين عشان التطبيق اما نحنا سماح ما كانت كدا انا حضرت معاها اول كلاس بس
منسقة المادة شفياء الحضيرة
الكيمياء
مادة سهلة و روعة بس طويلة يعني لازم تمسكيها اول بأول و اسئلة الاختبار مو بس سهلة و مباشرة و كل حاجة يعني مررة خسارة لو ما اخدتي فيها a+ و كل قسم الكيميا طيبين و حبوبين
انا درست عند نها وزان مررة كويس شرحها بس عندها تدقيق على وقت حضورك للمحاضرة يعني لمن تتاخري 10 دقايق تسألك وين كنتي و ما تحب الشوشرة في المحاضرات و اللي تتكلم تببها اول مرة و بعدين طرد ما سوتها الا مرة وحدة مع بنات بصراحة لو اقول يجيبوا الغثا قليل
الاستاذات الكويسات ليلى الحربي منسقة المادة و استاذتي دول اللي اعرفهم بس و سمعت البنات يقولوا عائشة قنش كويسة
منسقة المادة ليلى الحربي
الاحياء
المذاكرة من السلايدات طبعا السلايدات كل عرض في تقريبا 100 سلايد و فوق
انا كنت ادرس عن نفين طه الله لا يجعلكم عندها حرام هيا تشرح من قلب بس انا ما افهم منها شي
بالنسبة للتحضير عندها مررة مهم بس انتي متى ما تبي تدخلي عادي ما يهمها ان شاء الله لو تجلسي ربع ساعة عادي تحسبك تحضير .
الاستاذات الكويسات حنان الشاذلي روعة شرحها
منسقة المادة سالينا بس انا من الحين اقول لكم عمركم ما حتلاقوها في مكتبها ارتاحوا
و انا كنت احضر احياء كل يوم السبت و الاثنين و الاربعاء عشان التحضير و الاحد و التلوت مع حنان عشان افهم و ابدا ما ندمت اني حضرت الاحياء يوميا صح انو تعبت بس بعدها استفدت و لو ما سويت كدا ما كان جبت دي الدرجة ابدا <<< اللي يسمعني يقول الدرجة عالية
و نصيحة لا تصدقوا اللي يقولوا لكم مادة حفظ و لا تحضروا و اسحبوا و معرف ايش ترا مررة مهم الحضور تفهمي السلايدات تتكلم عن ايش تسمعي الكلمات عشان شوي ترسخ في بالك
بس باختصار قسم الاحياء ما يسوي و لا شي و لا لو فايدة لانو قسم الاولاد يتحكموا في كل شي
الانقلش
انا درست لفل 1 مع شرين الديب استاذة مررة طيبة و تشربك الكتاب شرب بس عندها الوقت مررة مهم
و لفل 2 مع عهود المطيري بصراحة كنت ما اتحملها
و لفل 3 مع ملاك و منى بصراحة يشرحوا و يفهموا و الوقت عندهم مرررة مهم بس انا كنت دائما في كلاس الانقليش نعسانة لاني صاحية من النوم و جاية و ما لي خلق افهم شي
و لفل 4 مع هديل شيخ مرررة حبوبة و روعة الاستاذة دي الكلاس معاها متعة اول مررة اشوف استاذة فلة زيها و الوقت عندها مو مهم يعني متى ما نخلص تطلعنا
دا الكلام من تجربتي الخاصة لا احد يتقيد فيي و بعدين يقول انتي السبب في فشلي
اول شي شوفي استاذتك اذا ما فهمتي معاها حولي لانو الناس يختلفوا في فهمهم
و بس خلاص كدا بعد ما كتبت الكلام دا كلو اتحذف و رجعت كتبتوا مرة تانية كرمال عيونكن و شكرا
دعواتكن لي انو يقبلوني في الهندسة