[noonz]

كلمة قبل ما نبدأ التجارب وندخل فـ العميق =) مـن : Dr. B E B O بسم الله الرحمن الرحيم كلنا نعرف انه طريق الألف ميل يبدأ بخطوة = يوم ما حضرتكم تنورا الجامعة رح تكونوا بدأتوا خطوة مهمة في حياتكم ،، التحضيري سنة جدن مصيرية رح تقرر مصير ديكا الأهداف اللي من صغركم تبغوها و تتمنوها من قلوبكم ،، أو ممكن تحدد مصير الأشياء اللي لما كبرتوا حسيتوا أنكم حابين تتعلموا عنها اكتر و تكونوا متمكنين منها بشكل أكاديمي ،، سو التحضيري فرصة واضحة و دقيقة رح توصلكم للي تتمنوه عشين كدا لازم تشتغلوا فيها بإلتزام ع نقاط قوتكم و نقاط ضعفكم ،، السؤال الجميل يا فيلسوفة طيب كيف ؟ يب يب حأحكيكم كيف بس قبلها أبغاكم تعرفو "حقيقة" ما أحد يقدر يناقش فيها , منهج التحضيري والمعلومات اللي فيه سهلة وبكل صراحة أسهل من الثانوي مافي شيء جديد وعجيب - وع فكرة دا بالنسبة للبشر اللي متخرجين من ثانويات الكتاب يتذاكر فيها من الجلدة للجلدة مو ورقتين والله صلي وسلم - إذا هادي رح تكون نقطة قوة ليكم , ابتسموا كدا وبـ كل روح تحدي وقوة =) فإننا الان سوف نتحدث عن الكلاكيع اللي رح تواجهكم في التحضيري أول كلكوعة / اللغة إحنا المعلومات وعارفينها وقديمة ومي داك الشيء اللي يخوف بس إحنا مانعرف هاديك المصطلحات العلمية اللي بالأنجليزي راح أزبدلكم : المصطلحات ما رح تواجهوا فيها مشكلة لا في الرياضيات ولا في الفيزياء ولا في الكيمياء ولا في الاحصاء , تابعوا أول بأول مع الدكاترة الكتاكيت واعرفوها في نفس المحاضرة رح تلاقو نفسكم اتعودتو عليها . أما الجميل الاحياء , دا تكّوا عليه شوية يتذاكر أول بأول أول بأول خلاص ذاكرتوه أول بأول كدا حطو فـ جيبكم A+ واعتبروا نفسكم قضيتوا تقريبا بإذن الله على أول كلكوعه جمييل أيووون إلى الكلكوعة التانية واحتلت المركز التاني / الأفكااااار العجيبة للمسائل اللي تجينا غالبا في مواد الفهم فالاختبارات , طيب والحل يا حسن ابن الهيثم يا نيوتن يا أينشتاين يا جابر بن حيان يا بويل ياا خلاااص فهمنا الحل هوا " التمرس " ! في كتاب قرأته كان فيه عبارة مني فاكرتها بالنص بس أنه العقل لا ينموا إلا بثلاث : إدامة التفكير و مطالعة كتب المفكرين و اليقظة لتجارب الحياة . عقولكم الجميلة شيء طبيعي أنها لازم تعرف الآفكار أول بأول وبشكل واضح ودقيق بس دا الشيء يمكن ما يكون كافي عشان تتحصلوا ع الدرجة اللي تبغوها لأنه الاختبار يكون فيه أفكار جديدة يمكن ما قد مرت مرت عليكم سوو رح تدوروا ع أسئلة للمواد اللي زي الكيميا والفيزيا والرياضيات والاحصاء من كل مكان ولا من مواقع الدكاترة من ملخصات من مكتبات وتحلوها عشان تمرنوا العقل وتعلموه إنه يشتغل ما يتربس ويسير مخكم كدا مية مية ويعرف يتعامل مع أي فكرة عجيبة في الاختبار ^^ و بـ كدا رح نحط الدرجات حقت مواد الفهم فـ جيبنا ولله الحمد . أما الكلكوعة الاخيرة فـ دحين رح أتكلم معاكم فيها كـ أخت كبيرة لي هما أصغر مني المفترض بواحد سنة :P ترى مجتمع الجامعه كبير ومتفتح وحر مو صغير زي المدرسة إذا أنتِ ناس مسؤولة رح تلتزموا ورح توصلوا للي تبغوه , خلاص مافي أستاذ أو أستاذة رح تجري وراكم عشان الواجب , مافي داك الالتزام القاتل في أنك تحضر المحاضرات لو عارف الاستاذ ما رح يسأل فينك هنا الحل ممكن سؤال تسألوه لـ نفسكم ؟ أنآ اللي بسويه رح يساعدني أوصل لـ هدفي ؟ لا تدوروا عن أسهل الطرق اللي تبسطكم يمكن لأنها مو دائمًا آمنة . أنآ منجد أعني دا الكلام أصحكم تضيعوا أهدافكم الحلوة اللي أنتو حابين توصلو لها عشان انبهاركم بالحرية اللي رح تلاقوها فالجامعه , أنتو ناس كبار عاقلة عارفة اش بتعمل ومسؤولة عن نفسها "التزموا" هنا تكمن الكلكوعه التالتة , أبدؤوا مستعينين بالله والنهاية رح تلاقوها في أهدافكم وأحلامكم في أفكاركم في عقولكم . "أبدأ والنهاية في ذهنك " موفقين