[خالد9921]

وعليكم السلام ورحمة الله وبركاته

موضوع مهم ويمكن الكثير منّا ناقشه
لكن أسلوب الطرح الأنيق اللطيف يجبرك على النقاش .. كثير عجبني أسلوب هالطرح

بدايةً فعلاً الأمر خطير أنا أشبّه بالعلاقة العكسية في الفيزياء
زيادة المُغريات الحرام ووسائل التواصل .... نقص شديد في سُبل ووسائل الزواج
وهذا أمر خطير للغاية .. وهو سبب الكثير من النكسات الأخلاقية لنا
انا ما أدري كيف حنّا عايشين زمان أوّل أيّام ما كان فيه صعوبات إقتصادية
آبائنا وأمهاتنا تزوجوا بسهولة .. والحين مع الصعوبات المادّية نصعّب الزواج !!

غير كذا حصلت لي مواقف أثبتت لي إنّنا مجتمع غبي في قضية الزواج مع إحترامي
الموقف الأوّل كان مع هندي يشتغل في محل ما وعاد أنا أطقطق عليه
هالهندي في عمري تقريباً عمره 25 .. وشفته حاط دبله قلت إنت بوجهك متزوّج ؟
قال ايه متزوّج شي عادي .. كيف الزواجات بالسعودية عندكم كم تكلّف ؟
قلت أبد والله إنسان جامعي مثلي ومن طبقة متوسطة أكيد أقل شي بيصرف 150 الف ريال
الهندي فكّ فمّه على طريقة إنتم خبلان يالسعوديين ؟ معقولة ذا وضعكم ؟؟
قلت اي والله هذا حنّا .. قال الهندي لا لا حنّا توصل إن الحرمه تعطي الزوج المهر !!!
موقف ثاني بعد مع سوّاق تاكسي نيبالي مُسلم جلست اسولف معه
قال انا عمري 27 ومتزوّج من سنتين والله رزقني بولد بعد .. ليش إنتم تدفعون فلوس كثير للزواج ؟
قلت مدري .. ثم قال لي كلمة هزّتني ما انساها
قال إنتم مب بلد الإسلام والرسول كيف كذا ما تخافون ولد بنت سوّي حرام ؟؟
حتى الكفّار في النيبال يقول الزواج عندهم ما يكلّف شي .. ومازال مذهول من وضعنا !!

فما أدري حنّا كيف عايشين

حنّا ما ينفع نتناقش ونتكلّم بدون إيمان حقيقي بالقضيّة يجعلنا نشتغل مب نتكلّم
ما ينفع أنا يالأب وإلا الأم عندي عيال عاطلين ومب قادرين عالزواج
ويوم تنخطب بنتي أقول لا معليش لازم أنواع التكاليف بنتي مب أقل من بنات الناس !!
على أولياء الأمور إنّهم يكونوا أكثر وعي ولعلّ الجيل القادم وعيّه أكثر ان شاءالله
بالإضافة حتّى البنت أو الولد اللي مؤمنين بهالمشكلة لازم يكون لهم كلمة في زواجاتهم
شفت أهلي يبون تكاليف اتدخّل واقنعهم وامنعهم عن التبذير وهالأمور الفاضية ..

أيضاً القضية ماهيب موظّف حكومي وقطاع خاص
فيه ناس بالقطاع الخاص رواتبها تسوى عشرات الحكوميين وفيه الحكوميين الفرّاشيين
القضية قدرة على الزواج وتسيير أمور الحياة الزوجية مستقبلاً فقط

* ما رائيك في عرف المجتمع الحالي من ناحية الاهتمام بفخامة القاعة والمبالغه في حفلات الزواج والتكاليف الماليه؟

كلام فاضي حدّه 5 ساعات بالكثير للأسف
ياخي إذا بصرف هالصرفية على قل الفايدة
ابركلي اصرفها في أثاث فخم للبيت وسفرية بطلة للعسل !!

* ماهو أفضل طريقة لتسهيل امر الزواج من وجهت نظرك؟

والله هو أوّل شي وعي العوائل وإيمانهم بوجود هالمشكلة
الشي الثاني تدخّل الدولة لرعاية الأمر
وذكروا الأخوان أمثلة لمعالجة الدولة لهالقضية
بالإضافة إذا كان الوضع راح يسبب أزمة إجتماعية خطيرة مستقبلاً
لابد إن الدولة تضع ضوابط على الصرفيات والمهور .. الخ

* ماهو سبب عزوف الشباب عن الزواج؟

واحد مسيكين مب لاقي وظيفة ثابتة براتب يؤمن حياته
او وظيفته يادوب بـ 3000
هذا متى بيجمع تكاليف الزواج ؟ والا كيف يسيّر الأمور من وين راح يسكن في بيت و و و .. الخ
هذا أكبر الأسباب ولو فيه تساهيل كبيرة انا متأكد راح نشوف زواجات بالهبل حتّى بعد صلاة الظهر

شكراً لك