رد: معدلك 5 او 4.9 يللا لاااازم تدخل طب x_x
معاك حق اخويا
انا بشوف اغلب البنات اللي معدلاتهم عاليه تقول ابغا طب
اوكي ازا انتي ميولك من الاساس طب الله يوفقك ويسرلك
بس ازا انتي عشان مجرد معدل عالي بتقولي ابغا طب لاكدا ماراح ينفع
وانا بحكي لكم على قصه اختي دحين رابع طب بشري هنا في عزوز تعرفت على وحده من التحضيري وكانت ماشاءالله البنت هادي معدلها عالي واساسا كانت تدرس في مدارس انترناشونال ولغتها مرة كويسه
بس ماكان ميولها ابدا طب بتقول ( عاادي اي شي اللي ربي يسروا ليا ) واخدت معدل ماشاءالله 4.80 اعلى من اختي كمان والبنت هادي شاطرة وممتازة وبتحب تزاكر وبتجيب فعلا درجات عاليه بس حلمها وطموحها وميولها ماكان طب وماكان عندها طوله بال
خلصت السنه التحضيريه وانقبلوا هيا واختي طب مع بعض ولاكن للاسف من اول اسبوع قالت ايش هادا ؟؟؟ ايش كميه المناهج هادي ؟؟ معقوله ادرس واحفظ هادا كلوا؟؟ مع انوا في التحضيري معدلها+a ماشاءالله
بس اختي ماتركتها تحول وسارت تقنعها بالطب اكتر واكتر وعدا شهرين واختبروا وكانت درجاتها للاسف جدا جدا جدا مخسوفه والسبب انها دخلت شي ماتحبوا ولاتتمناه وكانت البنت بتفضل الفهم اكتر من الحفظ
وبعدها بفترة انخطبت وسحبت على الطب بكبروا عشان خطيبها وتقول تبغا تتفرغ لحياتها وبيتها وزوجها واولادها مستقبلا ومعاها حق طبعا هادي حياتها وهيا حرة فيها بس ليه ضيعت عليها سمستر كامل كدا على الفاضي
وبعدها قالت بدخل شي في رياضيات واستخارت بين الحاسب وتخصص رياضيات
بس هيا كمان للاسف ماتحب الحاسب وتشوفوا صعب عليها وحولت رياضيات
ودحين ماشاءالله عليها تطلع من الاوائل على الدفعه وسمعتها في الجامعه مررة كويسه وفعلا تبدع في الرياضيات اكتر من الطب !!!!
نفس الشي دحين معايا الحمدالله موزوني فوق 90 وحلمي وطموحي من زمان صيدله بس ازا متلا الله لايقدر وقفت الصيدله على موزون فوق 95 راح اقول اكيد خيرة وبدخل بإزن الله كليه العلوم بايوكمستري وبكمل فيه ماستر في الكيمياء حيويه السريريه وهوا فرع من كليه الطب عشان اقدر الاقي حاجه تحقق حلمي
ف لازم كل واحد فينا يفكر في اللي هوا يتمناه ويحبوا ويكون ميولوا وطموحوا بغض النظر عن المعدل
وفي نفس الوقت يفكر في معدلوا بحيث يكون معدلوا يحقق الشي اللي يتمناه
يعني متلا طالبه معدلها 3.50 او 4 وتبغا طب او صيدله او علوم طبيه طبعا هادا المعدل مااينقبل فتفكر في حاجه قريبه من الطب والمختبرات والاشياء هادي يعني متلا احياء او بايوكمتسري ولو كانت متلا تبغا اشعه تدخل فيزياء وتحقق حلمها وتبدأ من الصفر وتشد حيلها وتكمل ماستر عشان تلاقي الوظيفه اللي تتمناها والشي اللي بيرضيها
اعذروني على الاطاله
|