[d.rose]

على الرغم من انه هذا الاختبار مو اول مره تقيمه قياس وبتسويه كم مره بالسنة لكنه كالعاده يفتقر للاحترافية.
الليسيننج لو كان الصوت واضح ومافي اي ازعاجات جانبية يعني لو كانت سماعات راس جيده انا متاكده انه الغالبية راح تحل هذا الجزء لانه كان اسهل جزء في الامتحان وحرام انه يضيع
والمشكلة المراقبة تقول مسموع الصوت. صح هو مسموع بس زي المكتوم كانه من تحت المويه بيتكلم قعدت احاول اركز بكل جهدي لدرجة قعدت مغمضة عيني عشان اعصر التركيز عصر. ولو واحده كحت والا عطست انا ايش ذنبي يروح عليا سؤال؟؟ والا قلبت الاوراق كوم تاني تخيلوا لما فوق مئة طالبة في مدرج يقلبوا الصفحة في نفس اللحظة والتسجيل شغال!! ايش تتوقعوا تسمعوا؟؟ طيب انا كيف اسيطر على الظروف المحيطة؟؟ عشان كدا مو عدل الليسيننج مو عدل مو عدل حتى لو كان سؤال واحد مو 35 سؤال!!

آما القدرات فورقة التوقيع كانت ازمة!! جاتني المراقبة في الجزء الكمي اللي انا حايسه فيه وتقول لي عبي الورقة. عبيتها وانا اطالع في الوقت شويه راحت ورجعت تراجع رقم الهويه قالتلي انتي كاتبته في حته غلط وقعدت تشوف الورقة حق الاجابة والهويه وورقة التوقيع واكتشفت اني نقلته لورقة التوقيع غلط نعم غلط بالرغم اني حافظته والبطاقة قدامي نقلت منها. المهم قالتلي عدليه عدلته وبرضه غلط وانا اطالع في الهويه مو مستوعبة ليش الرقم مختلف... من التوتر والله ما عرفت اكتبه وشوفوا كم دقيقة راحت في الجزء الكمي حسبي الله ونعم الوكيل مع العلم كان اول مره اختبر قدرات فالرهبه والخوف كان مسيطر عليا حتى هي بنفسها شافتني قبل الاختبار ارجف وقعدت تهدي فيني.
المهم طبعا لما انزنقت في الوقت قلبت الحل حازي بازي وفكيت نفسي!
اما في اختبار الستيب فجزاها الله خير المراقبة جات وجلست في الكرسي اللي بيني وبين زميلتي واخذت البطاقة وقعدت عبت اسمي والرقم وخلتني بس اوقع ما ضيعت عليا غير ثواني التوقيع وسوت كدا مع الكل. صراحة مره اروق وافضل وماكان في الليسيننج الحمد لله والا كان ضعنا
واللي سوولهم هو في الليسيننج ظلموهم ظلم شديد لا حول ولا قوة الا بالله
لازم قياس يتميزوا بالاحترافيه ويحددوا متى يكون التوقيع وكيفيته ولازم احد من قياس يجي يشوف انه التعليمات بتتنفذ بالحرف والا ما يصير عدل ابدا

معليش طولت عليكم بس طلعت اللي في نفسي