][ وللدفْرنة عُشّاق ][
السلام عليكم ورحمة الله وبركاته ..
كيفكم حاسوبينا وحاسوبياتنا ؟! ي رب تكونو بخير وصحة وعافية 
طبعن زي ماهوا باين من العنوان .. الموضوع حيكون فيه كمية دفرنة مش طبيعية بإذن الله 
الفكرة ومافيها .. انو حنعمل قروب مذاكرة .. كل يوم أو ع بداية كل أسبوع ..
حنعمل جدول عشان نذاكر ونتناقش في اللي ذاكرناه ..
يعني حنفتح موضوع جديد.. ودا الموضوع حيكون مُغلق ^^.. عشان حنحوط فيه الجدول الأسبوعي للمواد.. وطبعن الجدول ممكن أنا أعمله ..
وممكن أي وحدة أو أي واحد منكم يعملوو ويحطو هنا في دا الموضوع ونعتمدوو في موضوع الجداول بإذن الله ..
طبعن ليش حيكون مغلق ؟!! عشان مانبا نكثر ردود ع الموضوع ويصير الواحد لو يبا يدور ع الجدول
يحوس بين المشاركات لين يطفش ويسكر كل شيء :P ..
وبعد مانخلص كل شابتر .. حنفتح موضوع ثاني .. <== المواضيع ببلاش 
دا الموضوع مثلا حيكون اسمو كذا .. "مناقشة شابتر 7" لأنه اول شابتر في مادة البرمجة حنذاكرو إن شاء الله ..
الغرض من دا الموضوع .. انو كل شخص قرا الشابتر .. يحوط النقاط المهمة فيه ..
ولو مثلن احد احتاج شيء في دا الشابتر .. يُكتب سؤاله هناك .. واحنا الدوافير ماحنقصر معاه ان شاء الله  ..
وفي الاخير حنحوط فهرسة للأشياء اللي عملناها داخل موضوع الجداول ..
عشان تكون المرجع الرئيسي للناس الدوافير اللي هما احنا ^^..
يالله نقول بسم الله
طبعن عشان فاتتنا اسبوعين .. فحيكون فيه خيارين للمذاكرة .. واللي يناسبكم اختاروه ^^..
أول خيار ..
ان الدوافير يذاكروو اليوم شابتر 7 للبرمجة ..
وبكرة نذاكر سكشن 3.11 للرياضيات وتحلو معاه اللاب شيت حق البرمجة ..
والسبت حنذاكر تراكيب متقطعة ..
^
انا كتبت دا الجدول للتخصص سي اس .. لأن مااعرف كم الأقسام الثانية خلصو في المواد المش مشتركة ..
لكن مايمنع إنو الآي تي يذاكروو معانا البرمجة والتراكيب ..
والآي اس يشاركونا في البرمجة ^^.. لأن دي المواد الوحيدة المشتركة بيننا دا السمستر
ثاني خيار ..
تذاكرو اليوم نص شابتر 7 .. يعني مثلن توقفو لـ 7.4 .. ونص الرياضيات ..
لأن فيه ناس تتنح من حل المسائل الكثيرة .. أو من الدش الكثير
وبكرة تذاكرو النص الباقي من الاثنين .. بالاضافة لحل بعض تمارين اللاب شيت ..
ويوم السبت تراكيب + تكملو الحل الباقي حق البرمجة ^^.. <== التراكيب الحمدلله سهلة .. يعني يمدينا نحوط معاها أي شيء باقيلنا
طبعن عشان نرتاح في الأخير .. حنضطر نضغط نفسنا دا الويكند ^^..
واحنا اللي جنيناه ع نفسنا ..
وان شاء الله من الأسبوع الجاي .. حتكون المذاكرة أول بأول ..
والاستفسارات حتنحط اول بأول .. وحنصير بجد عُشاق الدفرنة
واللي ليه في الفوتوشوب .. ي ليت يسويلناعبارات حماسية .. زي انا دافورة .. انا دافور .. وغيروو وغيروو ..
عشان ننقل لنفسنا ايحاءات ايجابية .. ونصير دوافير بحئ وحئيئي
^
طبعن لاحظتو اني كتبت دوافير 660 مرة ..
أي أحد عندو تعديل ع الفكرة أو إضافة ؟!!
بانتظاركم
بالتوفيق ي دوافير
* تنسيق الخلفية بعيد عن الدفرنة .. بس الصراحة مافيا اسوي خلفية ثانية .. ومافراسي فكرة تبين محتوى الموضوع ..
في المستقبل القريب حغيرها ان شاء الله 
دمتم بخير 
|
|
الحسد يجعل بعض الناس يلجؤوا الى طرق خبيثة وملتوية للتقليل من شأن ( الناجحين ) بسبب ضعف الشخصية و الإنهزامية لديهم
ودائما الحاسد يظل في المؤخرة ..
لـ/ ـلؤي نسيم || Loai Nassem ..
*.*.*.*.*.*
يقول الرب جل وعلا: " فَاسْتَجَابَ لَهُ رَبُّهُ فَصَرَفَ عَنْهُ كَيْدَهُنَّ إِنَّهُ هُوَ السَّمِيعُ الْعَلِيمُ " سورة يُوسف (34)
|
التعديل الأخير تم بواسطة asma'a ; 16-02-2012 الساعة 12:17 PM.
|