1-
وش كان توقعك عن التحضيريه قبل ما تدخلها ؟ و هل كان توقعك مثل ماهو او غير ؟ -
تكلم بالتفصيل
بصراحة مرا كنت متخوفة و الكلام إلي يجيك يخليك تحس أنها بعبع
لكن هيا حلوة و سهله إن شاء الله , أنا درست تعليم مطور
ف حسيييت أن الدروس كلها نفس إلي ف الثنوي مع إضافات بسيطة
2-
لو رجع الزمن فيك سنة لـ ورى ، هل بتدخل جامعه الموؤسس ؟ و ليـه ؟؟
ايه , بصراحة لأنو مافي غيرها حكومية و جمب بيتي :p
3-
هل كنت محدد ميولك وتخصصك قبل ان تبدآ بمشروع التحضيريه ؟
من و أنا في المتوسط كان حلمي أكون شيء في علم الفلك ,
و بعدين بابا هزأني أنو مع رجال و مدري ايش غير أنو ما في هنا
ف أخترت الشيء الأحب لقلبي الحاسب أمووت و أعشق الأجهزة و الحاسب و كل شيء ألكتروني
4-
رآيك الصريح ف .. / تعاون دكاترة القسم / سهولة المواد / .. "
بصراحة فيه و فيه , يعني في دكتورات جدًا متعاونات و في ناس كلام بس :/
المواد سهله جدًا
5-
دوام التحضيري .. كيف تشوفه ؟ ضغط أو بالنسبة لك أريح ؟
الدوام ما فيه شيء غير الساعات الطويلة الممله في الأنقلش و نرجع متأخريين بس بسببه
أنا بصراحة ما كان عندي و لا بريك حتى ساعة الظهر ايام تأخذها الرياضيات بدل المحاظرة بس بالمقابل نرجع البيت بدري
و الباقي تاخذه الأنقلش بس كان عادي صح أنو تذمرنا كثير إذا ما لقينا وقت ناكل
بس أحسن من يكون عندي فراغات كثير بين المحاظرات و ارجع متأخر في بنات معايا كان عندهم بين بعض المحاظرات ساعتين فاضين غير ساعة الظهر
6-
الاختبارات الدوريه و النهائية .. كيف تشوف مستوى اسئلتهـا ؟
بصراحة زي الرياضيات و الفيزياء أذاكر أسبوع و زيادة و سهر و تعب
و في النهايه احس مذاكرتي في وادي و الأسئلة في واد ثاني
مع أني أذاكر من الكتب و المحاظرات و إذا لقيت وقت اذاكر من الأختبارات السابقة
ما أدري من وين يخرجون أسئلتهم ذي :/
7-
رأيك بـ اعضاء هيئة التدريس بـ التحضيري ؟ " الادارة / الدكاترة / المعيدين "
بصراحة استاذاتي كان شرحهم رائع سواء كانو معيدات او دكتورات
و الله المعيدات أحس شرحهم أحسن من الدكتورات
أنا درسوني أستاذه ليندا نبيل رياضيات بس ع أخر الترم بصراحة تمنيت أنها درستني من البداية
جدًا رائعة و ممتعة المحاظرة معاها و تفهم تمام التمام
و استاذة اسماء العمري مهارات أتصال لو بصراحة لقيت فرصة أخذ معاها مادة في المستقبل
بكون جدًا سعيدة
و استاذة هبة البطاطي حاسب كانت رائعة و شرحها ما عليه كلام
و الدكتورة وجود ديري فيزياء شرحها تمام
8-
معدلك المبدئ .. لـ الترم هذا يوازي طموحاتك ؟ أو اقل من المتوقع ؟ ، و برأيك وش السبب في ارتفاع معدلك او نزوله ؟
لا أقل جدًا من المتوقع و لا هو من طموحي الصراحة و أحس نفسي في ضيقة منه
بس أملي ف الله كبير وإن شاء الله أدخل التخصص إلي أبغاه و تنزل نسبة الكليةعن السنه إلي فاتت :p
بصراحة إلي نزل معدلي الأنقلش بدأت أنا من المستوى الثالث و كانت درجتي فيه 85
و الرابع بعد جات أنزل و أنزل 80 بس الحمد لله ع كل حال المشكلة انو من متطلبات كلية الحاسبات الأنقلش و الحاسب
و بصراحة درجات الفيزياء أنا أنصدمت جدًا منها جات 85 مرا ما توقعت و الأختبار النهائي
كان أسهل الإختبارات و توقع أقل درجة ممكن تكون 90
و باقي المواد الحمدل لله فوق ال90
9-
مقررات التحضيري .. في أول سنة هل تشوف انها مفيده ؟ او مجرد مواد عامـة ؟
هي بصراحة مجرد مواد عامه
و زي مثلا مهارات اتصال كان كله معاد أخذناه بالثنوي في مواد مختلفه فكان شويا ممل
10 -
بالنسبة لك ، وش اضافة لك التحضيريه حتى الآن من مهارات او اشيآء جديده ؟
الصبر
11-
تكلم عن كل مآده على حدده - بالتفصيل - ؟
نبدأ بالرياضيات
أنا بصراحة أحبها مرا و حسيت الدروس فيها ممتعة لو كنت فاهمتها تمام
الفيزياء
أنا عموما ما أحب الفيزياء بس كان الكتاب و المحاظرات تقريبا المذاكرة ما فيه شيء سهله إن شاء الله
حتا أحس تمشي فيه بسرعة لو من دون تمارين
بس الفيزياء يجب و يجب و يجب حل تمارين خارجية كثير و اسئلة اختبارات و إلا مصيرك الإخفاق
يعني بصراحة الكتاب تاخذ منه الكلام النظري و الشغل الباقي عليك
مهارات الحاسب
جدًا سهل و محد يشيل مهمه لو كنت واعي في المحاظرة و بعض الأشياء كويس لو طبقتها
مع الأستاذة عشان تبقى ف عقلك
أول باب متعب لأنو فيه معلومات كثيرة فيبغا لو شوية تركيز
و بعدين باقي الأبواب برامج ما فيها شيء جديد كلها درسناها معدا الأكسس هوا البرنامج الوحيد إلي كان جديد
مهارات الأتصال
هذي المادة حلوة و خفيفه بصراحة أنا دخلت الأختبار النصفي قراءة فقط و النهائي يا دوب أمداني
أقراء الأبواب إلي ما دخلت و درجتي كانت حلوة
بس كل واحد و مذاكرتو كيف و انا بالنسبه لي كانت سهله لأنه كله قد مر عليا من قبل
11-
نصيحة .. ممكن تقدمها للطلاب المستجدين في التحضيري ..
لا تشيلو همها أبدا سو إلي عليكم و ذكرو , أقرأُ كثير عن تجارب إلي قبلك أنا مرا أفادني ذا الشيء
و لا ترددو دائم إذا عندكم أسئلة أسألوا
دائم أبدأُ ذاكرو قبل الإختبارات بفترة كافية أسبوع أسبوعين عادي مو مشكلة لو مشيت بطئي عشان كذا أبدأ بدري مشيء بشويش أهم شيء تكون فاهم كل شيء و الأهم و المهم أقرأُ كثيييير أسئلة إلي قبلكم
أنتو لو بديتو بدري حتلقو وقت تراجعو و تسألوا الأستاذة لو فيه شيء مو فاهمينه و تلقو وقت للأسئلة
أمنيه تمنيتها : لو كانت التحظيرية في نفس التخصص
يعني و بعدين إلي درجاتو مو كويسة يطلعونو مرا تمنيت ذا الشيء
