1- وش كان توقعك عن التحضيريه قبل ما تدخلها ؟ و هل كان توقعك مثل ماهو او غير ؟ - تكلم بالتفصيل –
كان توقعي انها صعبة وماراح ترتاح من كثر البحوث والواجبات والتكاليف بس بعد ما بديت بخطتي وقابلت الدكاترة وبدينا الدروس اتضح العكس تماما صح يبالها اجتهاد بس مافيها تعقيد كل شي واضح الحمد الله ومافي تكاليف كثير زي ماسمعت باختصار سهلة للي يجتهد ويدرس وصعبة للي يلعب ويسحب على محاضراته وفي النهاية ياكلها على راسه
2- لو رجع الزمن فيك سنة لـ ورى ، هل بتدخل جامعه الموؤسس ؟ و ليـه ؟؟
لا ونعم
لا لو القرار بيدي
بالكامل كان درست برا من الابتدائي
ونعم لأن ماأفكر أدخل غيرها بالسعودية
يعني كذا كذا راح أدخلها
3- هل كنت محدد ميولك وتخصصك قبل ان تبدآ بمشروع التحضيريه ؟
ميول فقط لتخصص أنظمة وكنت محتارة إذا هو تخصصي المناسب لي ,,
4- رآيك الصريح ف .. / تعاون دكاترة القسم / سهولة المواد / .. "
بالنسبة لي كانو متعاونين الحمدالله والمواد سهلة وبعضها سهل ممتنع حتى الآن لأن لسى باقيلي ترم تاني
5- دوام التحضيري .. كيف تشوفه ؟ ضغط أو بالنسبة لك أريح ؟
حتى الآن لم أواجه مشكلة بالدوام والأوقات والضغط الوحيد انه تخلص 4 بس مايسير دا الشي الا نادرا الحمدالله لأن الدكاترة متعاونين فيحاولو يخرجونا بدري حتى لو انه بجدولك مكتوب كذا
6- الاختبارات الدوريه و النهائية .. كيف تشوف مستوى اسئلتهـا ؟
سهل حتى اللي ماذاكر وماجاوب يعرف انها سهله لانه من الكتاب مو من برا و واضحة جدا بس اللي تحتاجه انك تذاكر وتجتهد
7- رأيك بـ اعضاء هيئة التدريس بـ التحضيري ؟ " الادارة / الدكاترة / المعيدين "
حتى الآن جميع الدكاترة والمعيدين متعاونين ويحاولو يوصلو المعلومة لك بس لاتدخل التحضيري وتوقعاتك عنهم توب لأن اللي أقابلهم غير اللي ممكن انهم يدرسوك ورأيي عنهم راح يكون غير رأيك أنا فقط أعطيك النصيحة والفكرة المبدأية وأنت بعدها راح تعيش التجربة وتقرر فلا تستعجل وتعيش تجربتك من خلالي
8- معدلك المبدئ .. لـ الترم هذا يوازي طموحاتك ؟ أو اقل من المتوقع ؟ ، و برأيك وش السبب في ارتفاع معدلك او نزوله ؟
الحمد الله كان متوقع ويوازي توقعات التخصصات اللي ابيها ودا أهم شي
ولو اني كنت ابيه اعلى من كذا بس متفائلة بالترم الجاي السبب بنزوله اني في احدى المواد قللت من شأنها صراحة وماذاكرتها مزبوط بس الحمدالله
9- مقررات التحضيري .. في أول سنة هل تشوف انها مفيده ؟ او مجرد مواد عامـة ؟
مفيدة جدا جدا ولو ان رفعو مستوى الاداء والتطبيق راح يشوفو اغلب طلاب التحضيري انها ماهي مجرد مواد عامة
10 - بالنسبة لك ، وش اضافة لك التحضيريه حتى الآن من مهارات او اشيآء جديده ؟
أشوف انها ما أضافت لي كثير- حتى الأن وللأسف لو أنهم غيروا بعض الأشياء كان ممكن تضيف لي أشياء كثير
11- تكلم عن كل مآده على حدده - بالتفصيل - ؟
خطة (ب):
مهارات التفكير والتعلم : بالنسب لي أصعب مادة بالخطة دي أول ماتشوفوها بتقولو سهللة بس مذاكرتها صعبة خصوصا للنهائي بس الأسئلة تجي سهلة مره امم نصايحي لا تستهينو بيها ذاكرو المادة بشكل دوري يعني كل ماتخلصوا فصل راجعوه أول بأول كمان يعتمد عالدكتورة دكتورتنا تنوووم كرهتني في المادة والمذكره كئيييبة بس يقولو راح تتغير الترم الجاي يعني ياحظكم
الإحصاء : سهلل بس النظري اللي فيه صعب شويه يباله مذاكرة أسبووعية وحل تمارين بالقاعدات وتكتبو ملاحظاتكم في المحاضرة وتذاكرو منها لان بعض القاعدات اللي تكتبها استاذتنا الرموز تختلف عن اللي بالكتاب اممم راح تخرجو من الاختبار وانتو ضامنين درجات حللوة وتتصدمو بالنتيجة بعدين عشان كذا ركزو ولا تستهينو بيها
الاتصال : مرره سهل داكرو كووويسس قبل الاختبار باسبوعين عشان اذا فهمتوا بالمحاضرة مايحتاج اجتهاد كثير ^__^ بس نقصت بالدوري درجتين عشان داكرتو اي كلام والتكاليف كلها عليها 30 درجة يعني لا تستهينو بالتكاليف وبعضها راح تسوها مجموعات يعني اختارو ناس حريصة لان الدرجات عالمجموعة مو عالافراد وراح تحاسبكم على ادق الاشياء في التكليف
طبعا دي طريقتي وناسبتني ومو شرط تناسب الكل يعني خذو بس فكرة ونصايح بسس الباقي انتو راح تعرفوه اذا درستو
كتاب الإحصاء لاترموه لأنه جدا مفيد راح يفيدكم في كتابة البحوث ويمكن في اذا كملتو دراسات عليا
11- نصيحة .. ممكن تقدمها للطلاب المستجدين في التحضيري .. ؟
1- لا تخافو
2- تفاءلوا
3- اجتهدوا و احضرو كل المحاضرات لأنكم اذا ماحضروتو راح تحسوا بأنكم ضايعين حتى لو كانت محاضرة وحدة
4- انتو جايين من نظام مدارس وتقييد وراح تتفاجئون بالحرية اللي تمتلكوها استغلوها بالشي اللي يفيدكم
5- لاتخدعكم مظاهر بعض الطلاب يسحبوعلى المحاضرات ويستغلوك حضرني عند الدكتور الفلاني وماادري ايش
6- احتمال كبير تفترقي عن صاحباتك وتقعدي لوحدك فجهزي لنفسك أشياء تقضي الوقت كتب , أفلام شيقة في جوالك
7- الجامعة فيه ناس من كل طبقات المجتمع صاحبي الصديقة اللي تعينك على مشوارك وتشجعك وتأني باختيارك لها ولاتستعجلي حتى لو قعدتي لحالك سمستر كامل ! أفضل من أنك تنصدمين بصداقات مؤلمة نهايتها
والله يوفقكم ويعينكم ويحققلكم أحلامكم يااارب
لا تنسوني من دعائكم