[Ma3QoLa!]

لالالالالالالالالا،، كتبت رد طووووويل عريض ومن شدة ذكائي الغبي قفلت النافذة بالغلط

يلا نكتبها مره ثانية لعيون دفعة 13

،،،

قبل كل شيء انا اتكلم دحين عن خطة أ،، مادري عن خطة ب كيف وضعها

1- وش كان توقعك عن التحضيريه قبل ما تدخلها ؟ و هل كان توقعك مثل ماهو او غير ؟ - تكلم بالتفصيل –

اول شيء كان توقعي عنها انها سنة تعجيزية زي ما قالو وصعبة وما راح يمشي فيها الا اللي ع الكتاب 24 ساعة ويصير نفسية لحالو ومدري ايه
بس اكتشفت انها سنة عااااادية جداً وسهلللله،، وما اكذب وربي لو قلت انها ممكن اسهل من ثالث ثانوي

2- لو رجع الزمن فيك سنة لـ ورى ، هل بتدخل جامعه الموؤسس ؟ و ليـه ؟؟

يب راح ادخل،، ولو رجع مره ثانيه راح ادخلها كمان،، ولو رجع مره ثالثه بأتضارب معاه،، لا يفلها مره عاد << انا اللي بأنضرب شكلي
والله ارتحت فيها مررررررره،، وتعرفت ع ناس اعتبرهم اكبر مكسب طلعت فيه من الترم الاول،، صارو اكثر من اخوان والله
وكمان وربي تعتبر يمكن مدرسة اهلية بالنسبة لبعض الجامعات الثانية،، يعني لمن اشوف اصحابي اللي في سعود او البترول او الملك خالد،، ياناس احس اننا مدلعين من ججججد

3- هل كنت محدد ميولك وتخصصك قبل ان تبدآ بمشروع التحضيريه ؟

يب من ثاني ثانوي وانا محدد ميولي الحمدلله

4- رآيك الصريح ف .. / تعاون دكاترة القسم / سهولة المواد / .. "

قسم الماث،، رووووووووووووعه ومتعاونين وروحهم ححححححلوه،، وعلى راسهم منسق الماث 110 البروف حمزه
اما قسم الفيزياء بصراحه سسسسسسيء لدرجة كبيره،، لا دكاتره ولا منسق ولا اي حاجه
باقي الاقسام ماعرف عنها شيء
المواد راح اتكلم عنها في سؤال جاي ان شاء الله

5- دوام التحضيري .. كيف تشوفه ؟ ضغط أو بالنسبة لك أريح ؟

بدون انجلش،، ددددددددددلع
لكن مع الانجلش،، مرررررررره مو دلع

يعني كـ مثال بأقول لكم جدولي كيف كان بدون الانجلش ومع الانجلش
بدون الانجلش،، نص الترم الاول
السبت،، الاثنين،، الاربعاء .. من 8 الى 11
الاحد،، الثلاثاء .. من 11 الى 12 وثلث

مع الانجلش،، النص الاخير من الترم الاول
السبت،، الاثنين،، الاربعاء .. من 8 الى 4 << احلى شيء في الدوام دا،، كان وقت البريك كل يوم نتغدى في ماك
الاحد،، الثلاثاء .. من 8 الى 12 وثلث

6- الاختبارات الدوريه و النهائية .. كيف تشوف مستوى اسئلتهـا ؟

كل المواد كانت سهله
ما عدا الانجلش بصراحه كان متوسط الى صعب << بالنسبة ليا
والفيزياء الدوري الثاني والفاينل،، كانت المشكلة فيهم انو الوقت ما يكفي + اسئلة طوييييله ويبغالها عصر ذهن

7- رأيك بـ اعضاء هيئة التدريس بـ التحضيري ؟ " الادارة / الدكاترة / المعيدين "

الحاسب، الاستاذ. زكي الصبحي
انسان حبوب ومتعاون معانا بدرجة كبيييييييره،، وشرحو ولا احلى واختباراتو ولا اروع

مهارات الاتصال، الدكتور. سعيد نجيدة
هذا الدكتور اقدرو واحترمو بشكل،، من جد انسسسان محترم ورائع وتعاملو معنا ولا اروع،، واحسن شيء يحسسك انو يهتم فيك وما يبغا ينقصك شيء من الدرجات،، وم

الماث، درسوني اثنين
الاول،، نسيت ايش اسمو الاول،، بس اخر اسمو ملاوي
شرح + تعامل + توصيل معلومة،، ككككككككل شيء في قمة الروعه
والغريب،، انو كان ما يحضر وتلاقي الشعبة كلها مليييانه،، بس للاسف درسني اسبوعين وبعدين جا الدكتور الثاني
الثاني،، وليد الحمدان
ما اهضم حقو،، بصراحه شرحو يجي منو،، يعتمد ع الكتاب في كل شيء،، امثلة الكتاب يشرحها،، يعني اذا ما بتجيب كتاب ما راح تستفيد شيء منو
شديد مررره في هرجة التحضير والغياب والمحاضرات والحاجات هذي

الفيزياء،، محمد احمد عبدالمؤمن القناعي الحربي << ناسخ اسمو من الاودس
مادري ايش اقول،، بس سسسسسسسيء بدرجة كبييييييييره،، الله يسامحو بس
واللي يجي عندو،، نصيحة لا يحضر ويتعب نفسو،، بس يجي اخر المحاضرة عشان التحضير،، لانك وربي لو تنتبه معاه وتشتغل بيدينك ورجلك وراسك وكل شيء،، والله ما تستفيد منو شيء

الانجليزي،، صابر مدري ايش بعدها حاجه
الموهيم تونسي
يعني كويس في تعاملو معانا وكدا،، لكن شديد في تصحيح البورتفليو وكمان في الاختبارات والتحضير
لكن كويس بامانه

8- معدلك المبدئ .. لـ الترم هذا يوازي طموحاتك ؟ أو اقل من المتوقع ؟ ، و برأيك وش السبب في ارتفاع معدلك او نزوله ؟

يب الحمدلله،، راضي فييييييه تمام الرضا
اكيد المذاكرة + دعوات الوالدين

9- مقررات التحضيري .. في أول سنة هل تشوف انها مفيده ؟ او مجرد مواد عامـة ؟

يب بصراحه مفيدة

10 - بالنسبة لك ، وش اضافة لك التحضيريه حتى الآن من مهارات او اشيآء جديده ؟

اكثر شيء كسبتو من التحضيري،، انو تعرفت ع ناس والله اعتبرهم اكثر من اخواني،، يعني من جد دا اكبر مكسب اخذتو من الترم الاول
وكمان انا انسان تقريباً مو اجتماعي مره،، احس صارت اجتماعيتي افضل من اول،،

11- تكلم عن كل مآده على حدده - بالتفصيل - ؟

مهارات الاتصال+الحاسب،، حطيتهم مع بعض لانهم باختصار
مادتين سهله واتوقع حطوها بس عشان ترفع المعدل
يعني مادتين وربي زي الموووووووووووووويا،، وكمان نفس وزن الفيزياء والرياضيات في المعدل،، بـ 3 ساعات
يعني حححححححرام يروح عليك الـ a+ في المادتين هذي

الماث،، اللي درستو في الثانوي ح تدرسو هنا بس بالانجلش،، وممكن بتوسع شووووويا
سهلللللله مره،، خصوصاً لو استمر البروف حمزه ابو جبل منسق المادة
اذا تبغا تعديها بـ a+،، ذاكر الوورك شوب بس واحضر مراجعات حمزة ابو جبل اللي قبل الاختبارات

الفيز،، بإختصار اللي يصعب المادة هذي هما الدكاتره،، عن نفسي انا ماقيد سمعت عن دكتور كويس في الفيزياء في التحضيري،، يعني مادة لو ما تشتغل ع نفسك فيها صدقني بتاكل هوا
عندك ملخصات العربي افضل شيء انا اشوفها،، او ملخصات بركات وطلعت سالم
طبعاً لو بتاخذ اشرف لازم تاخذ معاه طلعت،، لانو اشرف بس تمارين تمارين تمارين،، وطلعت يفهمك،، يعني الاثنين يكملو بعض

الانجلش،، هذا رد ليا عن الانجلش

المشاركة الأصلية كتبت بواسطة Ma3QoLa! راح اكلمكم عن ليفل 4،، لاني ما دخلت 3 بالمختصر كدا،، ليفل 4 يبغو الطالب يمارس الانجليزي،، يعني ما يدرسوك عشان تحل وتنجح،، يبغوك تمارس،، وراح تلاحظ دا الشيء من المحاضرات ركزو اقوى شيء ع الفوكاب،، مفردات جديده ح تمر عليك حاول تحفظها تمام اما القرامر اكيد تركز عليه،، وتعرف الفرق بين كل قاعدة والثانية ومتى تستخدم القاعدة هذي ومتى تستخدم القاعدة الثانية وحاول تفهم الفرق صحححح بين القرامر لانو ح يجيك اسئلة في الاختبار تحس انو ممكن قاعدتين تنفع بس لو تركز كويس تلاقيها ما ينفع معاها الا قاعدة وحده وكمان السبيكنق حسب علمي يختلف عن الليفلات الثانية،، السبيكنق تطلع تختار ورقة عشوائية وفيها موضوع تفكر فيه لمن يخلص اللي قبلك وتطلع تهرج فيه قدام الكلاس،، وبعدين يا الدكتور يسألك يا الطلاب يسئلوك

11- نصيحة .. ممكن تقدمها للطلاب المستجدين في التحضيري .. ؟

1. خليك قريب من ربك،، ما اقول انا الراجل الذي هوا مطوع اقوى شيء،، حتى انا مقصر مع ربي،، لكن صدقني كل امور حياتك راح تتسهل اذا كنت قريب من ربك
2. طاعة الوالدين اهممممممم اسباب التوفيق،، اهم شيء يكونو راضين عنك
اقولكم الكلام دا عن تجربة
3. لا تسمع كلام احد،، التحضيري صعب،، التحضيري تعجيز،، التحضيري مدري ايه
ترا والله سهلللله،، بس الفرق انو ايام تساهيل المدرسة بتروح،، يعني الجامعة تبغا واحد مجتهد
اوكي بتعدي المادة بنجاح عادي،، لكن اذا تبغا تعديها بمعدل كويس،، لازم تشتغل ع نفسك
ما اقول اهلك نفسك مذاكرة،، بس يعني ادي كل شيء حقو،، المذاكرة اديها حقها،، وناستك اديها حقها،، اهلك اديهم حقهم،،
5. اختار الصحبة الصححح من بداية التحضيري،، لانو صدقني اللي ح تتعرف عليهم في التحضيري هما يمكن ح يكونو صحابك للابد
4. حدد هدفك من قبل ما تدخل التحضيري

والله يوفقكم يارب في حياتكم الجامعية

،،،

حاجز رد من اول،، بس ما قدرت اعدل عليه