 ماأدري من وين أبدأ؟ ومن وين انتهي ؟ لكن قبل لاتقرأ أعرف أني في الصف الي يمدح باشنيني
أنا درست عند باشنيني 117 و 213 ولو لقيت مادة يدرسها غيرهم راح أنزلها عنده .
باشنيني باختصار " رجل محافظ " يعطي كل شئ حقه بدون زيادة ولا نقصان .
أوضح لكم :-
باشنيني شخصياُ :-
- مايغيب إلا لظرف طارئ .
- دائماً تجده قبلك في القاعة .
- دائماً باب مكتبه مفتوح ( روح القسم وشوف ) .
- لو كانت في يده درجات يوزعها على الاختبارات ويوضح طريقة توزيعها ( يعني مابينك وبينه إلا الثلاثة الاختبارات : الدوريين والنهائي ) .
- دائماُ مهتم بهيئته ( لبسه ونظافته ولو قرب منك تشم عطره ، مو زي بعض الدكاتره تحس أنه عامل صيانه ) .
باشنيني مع المنهج :-
- يشرح من السلايدات ويركز على النقاط المهمه وبعض الفصول يعيدها كاملة أكثر من مرة لدرجة أني أحفظها بعض الاحيان ( وهذه الطريقة أشوفها أفضل للتعليم الجامعي ، يعطيك رؤوس الأقلام وشوية شرح وأنت تحل التمارين وتراجع الدكتور إذا تبغى تتأكد من حلك ، أما التعليم بالتلقين أقصد الطباشور والسبورة وحل التمارين ويعطيك واجب نهاية الحصة ويلا ياولد فين الواجب طلع دفترك << أحس أني طفل ، هذه الطريقة لإبتدائي و المتوسط .. يارجل حتى الثانوية تجاوزا المستوى هذا وروح وشوف ثانوية الثغر وراح تفهم كلامي ) .
- آخر محاظرة قبل الاختبار يفتح باب الأسئلة والمراجعة ( ولو واحد من الطلبة سأل سؤال مهم يركز عليه ويعيده زي الي يقول هذا راح يجي في الاختبار ) .
- يحل الاختبار على السبورة في أول محاظرة بعد الاختبار ويهيئك لتقبل درجتك .
- مايتأخر في حل الاختبار وينزل الدرجات على الأودس ولا يناقشك فيها لدرجة أننا ماندري مين فينا المجتهد ؟ ومين فينا المضيع ؟ ( برأيي هذه أفضل طريقة لتنزيل الدرجات ، حتى الدافور ماينصاب بعين .. والمضيع ماينحرج )
باشنيني مع الطلاب :-
باختصار إذا كنت مجتهد ومحافظ على مظهرك الجامعي وحضورك المبكر أبشر بخير .
أما إذا كنت من شعب البلاك بيري والتكوة في آخر الفصل .. " عند باشنيني ماتمشي "وهذه ضربه على الرقبة .
وربي أنه شنب مايخاف من كلمة الحق حتى أن بعض الدكاتره يقولون له : انتبه لاتقطع رزق بلسانك .
|
بيض الله وجهك هذا الكلام المزبوط تماماً .
وانا اشوف خبرتك زيي معه لكن واحد يقول قعد عنده محاضرة ..!! ماظنتي انها كافية للحكم على الرجال .!
على العموم صدقت
غالباً اللي يكرهونه هم اهل الكدش والصفات اللي بالي بالك .
مع كل التقدير .