[asma'a]

المشاركة الأصلية كتبت بواسطة قلب ينبض لله ~ عذرًا ع المداخله =$ لكن بغيت اسألك آسومآ .. إنتِ ماكنتِ فِ كليّة الحاسبات وحوّلتي لها بداية السنة ؟ وإذا حوّلتي لها كيف الطريقه ؟ من فين أقصد بالضبط ؟ عن طريق الأودس والا من العماده لأن انا قدّمت تحويل من العمادة بداية السنة وماتحولت الحمدلله ودرست ترم اللحين وبعد الترم هذا قدّمت من الاودس وانتظر الترم يخلّص وتطلع النتيجة .. ولو حوّلت مرآ ما أقدر ادرس حوسبة وبرمجه واساليب =( ؟؟ يعني اتخصص مع دفعة 12 =( !!

نوو بروبلم يختشي

يب يب ماكنت في كلية الحاسبات وحولت ع ثاني أسبوع في الترم دا

رحت العمادة ودخلت عند سكرتيرة الدكتورة نورة باذياب الأستاذة نادية وأعطتني ورقة تحويل .. عبيتها ودخلتها عندها .. وبعدين انتظرت لين جات الدكتورة ورجعنا وقفنا سرا ثاني عشان نشوف نتيجة المعاملة ^^..

وطبعن كانت نتيجتي الرفض ^_^..

1- أول سبب عشان خلصت 74 ساعة .. <== طبعن الساعات مالي يد فيها لأن في تخصصي القديم ينزلي الجدول إجباري :P .. وخلصت في ذيك السنة .. 24 ساعة الترم الأول + 23 ساعة الترم الثاني

2- حسيت سبب الرفض مو منطقي .. لأنهم قالولي لو تبي تحولي حنحولك بس ع كلية الفيصلية .. قلتلها انا ابا هنا .. بيتي هنا واضرب مشوار لهناك .. وغير كذا تعودت ع جو السليمانية

قلتلها مافي حل غير كذا ؟!! وقلتلها ليش ماتحولوني على هنا ... مدام قبلتو تحويلي ع كلية ثانية ؟!! قالتلي عشان الحاسب في السليمانية اكتفوو ؟؟!! <== طبعن دي الجملة مامشيت عليا

وقالتلي لوو تبي تحولي هنا .. حنحولك اي قسم ثاني ؟!! قلتلها يعني لو قدمت طلب تحويل ع ادارة واقتصاد ينفع ؟!؟! قالتلي اكتبي المعاملة ونشوف..

وطبعن دي المعاملة مرت ع العميدة وكلهم أعطووها اكس .. وقالولي الاقتراحات اللي ذكرتها فوق ^_^..

3- قالولي ليه ماقدمتي بدري ؟!؟! قلتلها اول شيء انا كنت علاج .. والتخصصات الطبية ماعندنا خيار اعتذار وتحويل .. كلوو يتم يدوي .. وقلتلها ثاني شيء .. انا كنت معتذرة والاوديس حقي مقفوول .. يعني حتى لو فيه خانة التحويل مايمديني

الموهيم قلتلها بكرة اجيكي ان شاء الله اكون مقررة التخصص اللي اباه واجي اقدم تحويل.. قالتلي اهم شيء ماتتأخري لنهاية الاسبوع .. قلتلها اوكي ^_^..

خرجت من عندها بعد ماكئبتني وطبعن كانوو لاطعيني من الصباح .. بس الحمدلله ع كل حال ..

وبعدين حولت عن طريق الرجال بضغطة زر جاتني رسالة ع الجوال

"جامعة الملك عبدالعزيز تم تغيير حالتك الدراسية بالجامعة " <== عشان كنت معتذرة فشغلولي الاوديس ^_^..

"جامعة الملك عبدالعزيز تم تغيير بيانات ملفك الدراسي بالجامعة " <== صرت حاسب

وترى الحمدلله كل شروطي موافقة لشروط التحويل ماعدا الساعات ^_^.. دا اللي فهمتو من السكرتيرة ^^..

^
هذي قصة حياتي هع

وبالنسبة لطلب التحويل .. لازم تراجعي العمادة .. لأن لو ماراجعتي ممكن ينسوو معااملتك أو يهملوها .. لأن فيه ناس كثير كانو واقفين لما رحت .. وكلهم ردت عليهم برد واحد .. ليه ماراجعتوو المعاملة ؟؟!!

وكمان بالنسبة لسؤالك الثاني .. يب يب ماحتتخصصي غير مع الدفعة الجديدة ^_^.. بس انتي مو خسرانة شيء .. لأنك الترم الثاني حتخلصي احصاء بإذن الله + مواد حرة أو مواد عامة

إن شاء الله أكوون أفدتك :p ..

بالتوفيق ي عسل

دمتـِ بخير