رد: اختبار ستيب تعجيزي ومشرفات قياس غير مؤهلات
بصراحة انا جدا مستاءة من المشرفات واستهتارهم
يفترض ان مناصبهم امانة ايا كانت حتى لو كانو دكاترة في الجامعة
صحيح نقدر نعيد الاختبار لكن بالمقابل ندفع الكثير من الوقت و القلق النفسي وعلى هذا الاختبار يتحدد قبول في وقت معين من عدمه
في ناس تجي من مدن تانية عشان تختبر واخرها تضيع درجات عشان حضرة المشرفة مو قادرة تستنا نص ساعة لحد ما يخلص السماعي بعدين تمرعلى البنات
بسببها ضاعت عليا محادثتين كاملة باسئلتها و كانت اطول محادثتين
فعلا اختبارات قياس تقيس مدى التخلف والاستهتار من قبل المشرفات على القاعات
احنا بشر ما نملك قدرات خارقة عشان اقدر اركز على سماع المحادثات وبنفس الوقت اكتب بياناتي
اختبار مخصص لجامعيين يعني بيشمل طالبات دراسات عليا واعيات وبعضهم معلمات ووصلنا لمرحلة نقدر نعبي البيانات بدون ما توقف وحدة على راسي كأني في الابتدائية
انا من حقي اكمال تعليمي بدون اي معوقات بالعكس المفروض تتوفر لي كل السبل المساعدة زي ما حرص ملكنا الله يحفظه ووصى بتوفيرها
لكن نجي للواقع وبتشوف ناس ما تملك نص الى تملكو من مؤهلات علمية ويكونو سبب لتحديد مستقبلك فين يكون
والمفروض زي ما يكتبونا تعهدات على عدم تسريب الاسئلة يكتبو في موقعهم تعهد انهم يراعو الامانة في عملهم ويوفرو لنا ناس مؤهلة للاشراف
ونصيحة للكل لا تعتمدو على المذاكرة فقط وقت الاختبار لاني ادركت ان مهما نتعب حالنا بالاخير ما حنكون على الاستعداد المطلوب لو ما كان عندنا خلفية واطلاع مسبق
يعني ذاكرو الانجليزي واشتغلو على حالكم لتقوية اللغة لنفسكم مش عشان الاختبار و اقرؤو كتب دائما ووسعوا ثقافتكم لان هدا الى حيساعدكم مش المذاكرة ليلة الاختبار
الاسئلة انا ما اعيبها بشيء وبالعكس خطوة جيدة لابراز قدرات المتقدمين
لكن عتبي الشديد على سوء التنظيم و عدم التقدير للناس و سعيهم للحضور لتقديم الاختبار
قدمت الاختبار لاول مرة و اتمنى ان تكون الاخيرة وان شاء الله احصل على الدرجة المرجوة
ودعواتي لكاتبة الموضوع وكل من حضر الاختبار بالتوفيق والنجاح
|