[ريفان]

أبغى كل وحده تسأل نفسها بصراحة مين الي تستاهل تبكي عليها صديقة الطفولة,صديقة الثانوية,صديقة الجامعة ؟
انا عن نفسي محد يستاهل وشوفو ليه.
1- صديقات الطفولة كنا نلعب ببراءة ونضحك بدون تكلف نزعل يوم ونتصالح يوم (هبالة يعني)ولما بعدنا نسينا وحتى لو افتكرنا تغيرنا مرة كثير كبرنا وكبرت افكارنا واحلامنا ومواصفات صديقاتنا.
2- أما صديقات الثانوية كنا شلة كل يوم مع بعض ونسأل عن بعض وبعد ماتخرجنا كل واحد راح فحالوا الي تزوجت ونسيت ماضيها والي خايفة على زوجها من صحباتها والي دخلت الجامعة وطفشانة نفسها تقعد بالبيت وتقول متى اخلص والي جلست في البيت تحسد الي دخلت الجامعة والي تكلميها مطنشة والي ماتبغيها تجري وراك والي ترتحلك وتقولك اسرارها ومشاكلها ما تسالك انت مرتاحة والا تعبانة.
3-أما شلة الجامعة العزيزة ماعندهم ماعند جدتي طول الترم جوالك مايهجد بنت تعرفيها ووحدة ماتعرفيها وحدة جابت الرقم من وحدة وكل الدوشة دي عشان التكاليف ,الاختبارات وما الى ذلك وخاصة لوكنت دافورة بس خلي اول يوم في الاجازة يبدا الجوال ساكت تقولي خربان لااتصال ولارسايل ولاحتى رنة ويوم تبدا الدراسة يرجع ينطق الجوال ولكن المصيبة الكبرى بعد التخرج شلل تام للجوال لاصوت ولاصورة بصحيح العبارة انتقل الى رحمة الله .
عشان كدا انا قررت تكون علاقتي موحدة وسطحية وبسيطة مع الكل محد يستاهل تضيعي وقتك عشانو انا عن نفسي الله يخليلي زوجي وبناتي والي عايشة معاناتي تدور لها على شي مفيد تضيع في وقتها بدل هذه العلاقات التي لاتجدي.
وأخيرا انا ماني انسانة متشائمة بس بالفعل هذا الواقع الي صار معايا صح تعبت شوية في البداية بس الحمدالله قدرت اتاقلم مع الوضع الجديد اني اكتفي فقط بالزمالات السطحية ولمن اكون تعبانة ونفسي اشكي ملجأي هو الله.
وطبعا هذه وجهة نظري ولكن مع هذا يظل الخير موجود لدى البعض