السلام عليكم ورحمة الله وبركاته ..
يا بنات في قائمة الشعب عند مادة فقه معاملات حاطين الوقت من 8 الى 9:50 الوقت مرة غريب ليش كدا ؟؟ مع إن المادة أساسا ساعتين بس  ..
وبسأل كيف دي المادة مع الجوهرة ؟؟
وأتمنى من الشباب يفيدوني في الدكتور نازل عندنا في نظم معلومات كيف الدكتور وتنصحوني آخذ معاه ولا لأ ؟؟
وشكرا ..
|
يظهر انو كل طالبات وطلاب البكالريوس مشغولين من بداية العشر الأواخر برمضان ومحد منهم عنده وقت لدخول المنتدى عموما انا شفت موضوعك هدا قبل 4 او 5 أيام بس ماحبيت أرد عليكي وقلت أهل مكة ادرى بشعابها بس لما شفت محد رد عليكي قلت افيدك بالي اعرفو في موضوعك هذا
بالنسبة لمادة فقة المعاملات المحاسبية مع الدكتورة الجوهرة حقيقة أنا مااعرف هذي الدكتورة ولا قد سمعت عنها شي بحكم انها ماتدرس الطلاب طبعا لكن بدي اقلك على حاجة مهمة جدا شوفي طالما انك حتدرسي هذي المادة مع شخص اخر غير الدكتور محمد فلمبان فاتوكلي على الله ولا تترددي ابدا لأنو الدكتور فلمبان مصعب المادة بشكل مو معقول حتى انها صارت اصعب مادة بتخصص المحاسبة كلو عند الي اخدوها معاه في الماضي والي حياخدوها معاه مستقبلا وما اعتقد انو في احد حيكون مثل الدكتور فلمبان ابدا وعشان كدا اتوقع انو الدكتورة الجوهرة حتكون افضل منو بكثير
أما بالنسبة للدكتور عبداللطيف باشيخ فأول شي بدي ابدأ بمادة نظم المعلومات المحاسبية نفسها قبل الدكتور هذي المادة مادة نظرية بحته وفي رايي المتواضع أي دكتور بقسم المحاسبة او حتى اي محاضر ممكن يعطيها لأنو صراحة المادة سهلة وبسيطة ومافيها اي تعقيد كبير ومولازم يكون الدكتور الي بيعطيها متخصص في نظم المعلومات المحاسبية
أما بالنسبة للدكتور عبداللطيف باشيخ فطالما انو المادة نظرية ومافيها حالات تطبيقة او مسائل عملية فأعتقد انو حيبدع في تدريس المادة وعلى فكرة الدكتور باشيخ مشكلتو تكمن في الجانب العملي يعني بالمسائل والحالات العملية صراحة شرحو نص ونص اما الجانب النظري فهو متمكن منو الى حد كبير انا درست مع الدكتور باشيخ مادتين بالماجستير المهني واقول هذا الكلام من واقع تجربة
الدكتور باشيخ عنده حاجة مهمة جدا وهي العرض التقديمي بكل مادة من المادتين الي درستها معاه كان العرض التقديمي شي مهم واساسي جدا وما ادري ادا كان بيتبع نفس الشي مع طلاب البكالريوس او لا ؟ وايضا الواجبات عندو لها اهمية كبيرة جدا وكل واجب لو موعد محدد لتسليمه ويرسلو على موقع عمادة التعليم عن بعد مش على الايميل اما أسئلتو بالاختبار فكلها موضوعية يعني صح وخطا واختيار متعدد والدكتور باشيخ قد اعطى هدي المادة عدة مرات واعتقد انو اكتسب فيها خبرة كبيرة وصراحة حظكم مرة كويس لأنو انا بمرحلة البكالريوس درست هذي المادة مع الدكتور ممدوح باعويضان وكانت كل اسئلته مقالية يعني كلها اشرح وضح تكلم عن ماكان عنده ابدا اسئلة موضوعية وبجد تعبنا معاه كثير لانو الماده هي اصلا نظرية بحته وكلها دش في دش بس الحمد لله عديت منها واخذت 81 فرايي انك تتوكلي على الله وتاخدي هذي المادتين مع الدكتورة الجوهرة والدكتور باشيخ
وعموما خلينا ننتظر ردود الاخوة والأخوات من طلاب وطالبات البكالريوس بعد بدأ الدراسة يمكن يكون عند اي منهم راي اخر افضل وموفقة بإذن الله