[LeLou]

عشانـ يكونـ الموضوع واضح بالنسبه ليا .. إنتيـ قصدك إنه أعطيـــتيـ ناس أكثر مما أخذتيـ منهم - والبعض ما بادلك شيء نهائيا فيصير أخذ وما أعطاكيـ بالمقابل - :) أنا أشــوف طبيــعتك ( كونك إنسانه مستمعه لهموم الغير ) سبب رئيسي في عدم توازن الأخذ والعطاء .. الأشخاص اللي حولكـ يشوفونكـ ملجأ لهم وقت الهموم - فهما يجونكـ وقت ما يحتاجونك - وأتوقع إنهم ما يفكروا بالمقابل إنك راح تحتاجيهم فيـ بعض الأوقات " وما راح يعرفوا إنك محتاجتهم بدونـ ما تتكلمي " .. كلاميـ هذا زيـ الأم وولدها الصغير .. الأم يوميا تجيـ وتشوف ولدها إذا هوا أكل وشرب ولبس ووقت النوم متغطيـ كويس عشانـ ما يبرد .. فالولد الصغير يكبر على هالعاده والاهتمام - وفرضا وصل 20 سنه - أمه على نفس الحال تجيـ وتهتم بكلـ هالامور .. فالولد هذا تأقلم إن أمه مصدر إعطـــاء مو أخذ ومو متوقع إن أمه راح تتشكى عدم مبادلته الاهتمام :) فـ إنتيـ ممكن تتقبلي هالشيء طبيعي .. لأنـ فيـ هالدنيا فيه ناس تاخذ كثير وتعطيـ شويه , وناس تاخذ شويه وتعطيـ كثير , وناس فيها نوع من التوازن - وهذي الفئه مرره نادره ولكنها محظوظه لأنها تهتم ويـٌـــهتم فيها - ..

أهلا ماجد..
صراحة إنت نظرت لجانب من شخصيتي مو نفس اللي أتكلم عنه..
أنا ما جبت سيرة إني أسمع للناس و أعطيتهم من غير مقابل..
بس ما أنكر أنه هذا الجانب حقيقي في شخصيتي<< من فين جبت الفراسة هذي ..
بس عمومًا أنا ما أهتم لهذي النقطة لأنه الخير لربنا مو للناس..
إللي يبغى يرد جزاه الله خير و هذا إنسان عنده أصل و معدنه طيب،، أما إللي ما يبغى يرد هذا برضو جزاه الله خير..
و سماعي للناس كمان يزيد من خبراتي و أتعلم من تجارب غيري..
أنا أهم شي عندي ما تنرد بإساءة،، و اتق شر من أحسنت إليه بالمزيد من الإحسان إليه..
و عمومًا أنا الحمد لله كل ما صارت لي مشكلة ربنا يسخر لي اللي يساعدني رغم أنه عادة يكونوا ناس لا عالبال و لا عالخاطر و أكون ما سويت لهم شي..
و اللي أكون ((و من غير من)) مساعدتهم في أشياء كثيرة يتفرجوا عليا هذا إذا ما كانوا هما إللي حطوني في المشكلة..
دايمًا أقول الحمد لله ربنا ما يظلم أحد..
و أنا كل فترة قبل لا أنام أقعد بيني و بين نفسي و أقول يا رب أنا مسامحة كل اللي غلط معايا بقول أو بفعل من و رايا أو من قدامي و محللتهم..

كلامك دا صح ميه ميه و أنا حاسة فيه و مجربته..

بس أنا إللي أتكلم عنه الاهتمام و الحب ((أيًا كان نوع الحب))،، و زي ما قلت أنا أبادل الناس الحب و في مقدار من الحب لو انعطى ليا أرده من غير حدود أو شروط أو قيود..

ما راح أطولـ عليكيـ راح أجاوب على أسئلتك - طبعا وجهة نظر مو أجوبه علميــه - :-

لا عادي خذ راحتك و أنا كمان طولت..
//
و مو مشكلة أنا ما سألت أسئلة علمية في المقام الأول..
و أنا أحب أسمع وجهات النظر عشان أستفيد منها..

كيف أحكم على الإحساس أنه حب؟! إذا كانتـ العاطفه راجحه على العقل .. والأفعال أغلبها تكونـ بدون تفكير وتخطيط مسبق

أيش الفرق بين الحب و الإعجاب؟! الحب هوا تعلق بالشخص أو بالشيء .. أما الإعجاب هوا لفت وشد إنتبـــاه الشخص لـ حاجه معينه ( تستمر فتره طويله أو قصيره على حسب ) وبعدها يفقد هالشيء بريقه وينتهي الإعجاب وقتها .. الحب يستمر - غالبا - والإعجاب فتره مؤقته

هذي معاك حق فيها..
تصدق ما عمري نظرت بدا المنظور رغم انه يجي على بالي..
أنا أي فكرة عشان أعترف بيها لازم أكتبها و أعلقها أو أقولها لنفسي،، راح تزيد معايا الأوراق خخخ..

هل من الممكن أن يكون الحب و الاهتمام منفر،، متى ؟! يب أكيـــــــــــــد .. الاهتمام إذا كانـ في غير وقته أو الحب إذا كانـ لشخص غير مناسب في غير وقته مثلا اتصلتيـ على وحده من صاحباتك وكلمتيها بالساعات وهيا ما قدرت تقولك آسف بس بذاكر عنديـ بكره كويز .. فـ ما تكلمت وقالت هذي صاحبتي مو مشكله اتصلتيـ عليها يوم ثاني وبرضوا كلمتيها بالساعات وهيا فيها نوم وقالت يلا النوم يهونـ لعيونها .. ومو شرط اتصالـ ممكن تقولينـ لها بجي عندك البيت بسأل عنك وأشوفك - وهيا ما تقدر تقولـ لا لكيـ - .. فـ مره ومرتين وثلاثه تبدا هالبنت تنــفر منك وتصيري مصدر إزعاج لها وإنتيـ العكس ..

بصراحة أنا بديت أشك مؤخرًا أنه اهتمامي باللي أحبهم منفر..
رغم أنه عمري ما أحد اشتكى لي أو اشتكى لأحد أعرفه من دي النقطة،، بالعكس أحينًا في ناس تخليني شوية و ببكي لما تشكرني على اهتمامي بيها..

بس قبل كم يوم في الــ Mood scanner هذي لعبة طلع لي فيها:~
Polite in a way that seems disgusting
أو ما ادري:
Polite in a way that disgusts
شي زي كدا..

قامت أختي الكبيرة تقول لي إيوا إنت كدا ..
جاني اكتئاب صراحة حسيت كأني انضربت كف على وجهي..

أنا ليا فترة مقللة اهتمامي بالناس،، و أحس أنه أحسن كدا..
و جالسة أسوي برنامج لنفسي و إعادة برمجة عشان أقلل من الشي ده..

أما الحب لمن يكونـ لشخص غير مناسب بصراحه حالات كثيره ليـ عوده إن شاء الله عشان أتفرغ لها

من جد هذي ما فهمتها ممكن توضحها ليا أكثر..

شكرًا مين قال الإجابات مو علمية صراحة مرة دخلت مزاجي و شكلي بطبعها أو بكتبها و بعلقها..

يا ربي أذن الفجر و أنا لا خلصت فنجان القهوة و لا فرشت أسناني و لا شربت موية ..

و شكرًا جدًا جدًا لمشاركتي رأيك||~