السلام عليكم ورحمة الله وبركاته
تقبل الله صيامكم وقيامكم ~ رمضان كريم ~
مبروووووووووك ع القبول في الجامعة وعقبال التخرج يارب
في البداية : حبيت اقلكم كلمتين عن السنة التحضيرية ،، لا تخافوا وتشيلوا هم هيا سهلة بس يبغالها شدة حيل ،، محا تدرسوا شي جديد كلو درستوه في السنوي بس دحين حيكون بشكل ابسط ومختصر . الجديد هوا المزاكرة بالانقلش بس فترة وحتتعودوا فنصيحة في بداية الترم حاولوا تزاكروا اول بأول عشان تتعودوا ع طريقة المزاكرة قبل الاختبارات الدورية . انا ما كنت ازاكر ع طول بس كنت احاول قبل كل محاضرة اشوف الأشياء الي اخدناها في المحاضرة الي قبلها واراجع المصطلحات بالانقلش .
نصيحة : لازم تحضروا المحاضرات وكدا حتسهل عليكم المزاكرة ،، خاصة لو اتعودتوا تكتبوا الاشياء المهمة وقت الشرح .
فكرة مختصرة عن كل مادة :
خطة " ب"
كيمياء :
اكتر مادة يبغالها تركيز وفهم في دي الخطة ،،وازا ربي كتبلكم تكونوا عند دكاترة كويسين مرة لا تشيلوا هم لانو دا اهم شي .
المزاكرة : كنت اعتمد ع المحاضرات والأشياء الي اكتبها فيها + الكتاب : اقرا الدرس واحل التمارين المطلوبة مننا ،، بعض الدكتورات ينزلوا عروض فكنت اقراها كمان ،، وقبل الاختبار احل اسئلة السنة الي فاتت .
بالنسبة للدكتورات : كانت تدرسني "د.إلهام باعيسى" كويسة وشرحها تمام .
بس دكتورة إكرام مررررة كويسة ما شاء الله عليها حاولت احضر معاها في الاوقات الي كنت فاضة فيها ،، مرة شرحها حلو وتفهم حبة حبة وما تخرجي الا والمعلومة مثبتة في راسك . في اسئلة تحطها قبل كل اختبار ((مهمة)) قريبة من اسئلة الاختبار.
إحصاء :
الز مادة *_^
محاضرات + ملاحظاتي + الكتاب + التمارين + اسئلة السنوات الي فاتت
دكتورتي : "نهلة عبد الجبار " وحدة لزوووووووووزة مرة وشرحها مرة حلو ما شاء الله .. ومرة حلوة المادة معاها
أحياء :
كنت ازاكر من التست بانك ،،بس لازم تتأكدوا ممكن يتغير النظام
وبالنسبة للدكاترة ما احس يفرق كتير بس د.حنان الشاذلي ،، ود.عواطف يمدحوا فيهم
خطة " أ "
ماث :
اكتر مادة يبغالها مجهود في السنة التحضيرية ،، بس مع التمارين والحل حتسهل كتير وتحسوها ممتعة
مزاكرتي : من الكتاب + ملخصات أشرف (( في الابندكسات )) + طلعت سالم ((حل تمارين ))
مرررررررة مهم انكم تحلوا التمارين وتتعودوا عليها ،، صح كانت تاخد اغلب وقتي بس استفدت منها كتير
الدكاترة : درستنا دكتورة غادة في بداية الترم لين الدوري الاول ،، بصراحة ما اتوقع في احسن منها ما شاء الله اخلاق وطيبة وشرح ،، تشرح من قلبها وتفهم وتجيب نماذج من السنوات الي فاتت ،، ما شاء الله احسها وحدة فاهمة من جد ايش بتقول ،، وازا احتجتوا أي شي ما تقصر
وبعدها درستنا أ. منية في البداية حسيتها بطيئة بس بعدين اتعودت ،، مرة طيبة وقلبها ابيض وتتقبل كل حاجة
فيزياء :
ما اعرف ايش اقول عنها بس مافي مقارنة بين فيزياء السنوي وحقت الجامعة
في الجامعة مرررررة عبيطة وسهلة .. اممم ما حسيت فيها شي يتزاكر
كنت اقرا الكتاب بس مافي معلومات كتير اهم شي القوانين والتمارين الي يحلوها وقت المحاضرة + ملخصات أشرف استخدمتها فترة
درستني دكتورة " سناء اباظه " احسن وحدة في الفيزياء ،، شرحها حلو
وفي كتير مدحوا د.وجود
مهارات الاتصال : بالعربي *_^
مادة من حياتنا ،،ما يحتاجلها حفظ ،، قراءة بتركيز وفهم تكفي ،، جاتنا اسئلة في الاختبار تقيس الفهم
الاختبار الكتروني
في كم درجة في يد الدكتورة نسيت كم بالزبط بس اتوقع 30
عملنا عرض + سيرة ذاتية + خطاب تقديم + طلبت مننا ننزل مقطع من اليوتيوب ونقول الايجابي والسلبي + اختبار لمهارة الاستماع +اختبار لمهارة القراءة
الحاسب :
ما يحتاج كلام بس وقت الاختبار زاكروا بتركيز في اسئلة بين السطور
الاختبار الكتروني
ان شاء الله اكون قدمتلكم شي مفيد ،، وبازن الله دي اليومين ارفعلكم الاشياء الموجودة ع جهازي
ربي يوفقكم ويديكم العافية والقوة =)
شكر خاآااص لحبيبة القلب
~ran~ جزاك الله كل خير ع الموضوع