.
وعليكم السلام ورحمة الله وبركاته ,
راح أديكم نبذة عن كل مادة حسب وجهة نظري .. وإذا عندكم أي سؤال فـ اسألوا كل اللي نفسكم فيه (:
- Foundation : مادة أساسيات الطب , تتقسم لـ 6 مواد مُصغَّرة .. مصطلحات طبية , مهارات skills , علم وظائف الأعضاء , أدوية , أحياء دقيقة , علم طفيليات .
سهلة جدًا وراح تنبسطوا فيها .. لأن كل مادة من المواد المُصغرة دي حـ تاخدوا فيها كم محاضرة وبس .. فـ بالراحة تقدروا تجيبوا فيها درجة مرتفعة
- Embryology : المادة حلوة وشيّقة وخفيفة .. لأنها زي القصة لازم
تتابعوها من الأول للآخر عشان تفهموا .. هي تحتاج صور ومقاطع فيديو حتى توضح لكم أكتر فـ هنا الأفضل إنكم تبحثوا
عن صور وفيديو زيادة في النت , المادة عليها ساعة وحدة .. ودا معناه إنها ما راح تأثر في المعدل إلا شيء بسيط سواء جبت 100 أو 60 , ودا الشيء ممكن يخلي كتير من الشباب يسحبوا عليها .. لكن صدقوني
راح تستفيدوا منها كتير وتستمتعوا , وقت المحاضرة اسألوا الدكتور عن الكلمات الغريبة وخلوه يشرحها لكم
وسجلوها .
- Histology : مادة كلامها كتير ! عن أنواع الخلايا والأنسجة في الجسم وإيش مميزاتها وخواصها .. مشكلتها الأولى إنهم ضاغطينها في نص ترم , ومشكلتها التانية والأكبر هي دكتورها !
إحنا جانا بـ معظمها رئيس القسم د. محمد باداوود .. و الله لا يوريكم .. شرحه عبارة عن قراءة بحتة .. وممل بطريقة فظيعة وفيه كتابين للمادة من تأليف نفس الدكتور راح يقولكم اشتروه .. الكتاب الأول تعبان
وصوره سيئة , والكتاب التاني للرسم .. عشان ترسموا الخلايا والأنسجة وعليه 5 درجات . المادة مو صعبة .. لكن دكتورها سيء , وأفضل طريقة لها هي مذاكرتها أول بأول واستعارة كتاب لها من المكتبة يكون
فيه صور واضحة وملوّنة .. أنا استعرت لها كتاب ممتاز مليان صور والشرح فيه جدًا واضح بس نسيت اسمه , كنت أذاكر الشرح من كتاب باداوود
- لأنه مختصر - لكن الصور
من الكتاب اللي استعرته من المكتبة .. عمومًا اطلعوا على كتب الهستولوجي بالمكتبة واختاروا اللي يناسبكم .
- Anatomy : من أكتر المواد اللي راح تعجبكم .. خاصة لما تنزلوا المشرحة بعد المحاضرات وتشوفوا اللي درستوه على أنسجة طبيعية قدامكم
والمادة تحتاج
مذاكرة وحفظ أول بأول ,
حسب ما أذكر جانا في معظم المادة د. باداوود
- Biochemistry : رغم كلامها الكتير والتفصيلي .. إلا إنها مفيدة , وأنا بدأت أستمتع فيها عـ النهاية لما بدأت أفهمها .. وعليها 5 ساعات عشان كدا تندرج ضمن المواد المهمة لأنها تأثر عـ المعدل ,
وتحتاج جهد وصبر في المذاكرة والمراجعة .. وفي كل جزئية من المادة راح يجيكم دكتور مختلف عن السابق , بالنسبة للمحاضرات أنا كنت أذاكر أول تلاتة أجزاء منها (بروتينات , إنزيمات , كربوهيدرات) من
أوراق مدرس خصوصي اسمه د. حداد وأوراقه ممتازة جدًا جدًا وخلتني أفهم المادة بعد ما كنت مستصعبها .. بقية المادة كانت شيتات الدكاترة واضحة بالنسبة لي فـ كنت أذاكر منها .
كتير من الشباب دخلوا عند مدرسين خصوصيين .. وعلى رأسهم د. حداد , شرحه ممتاز على حسب كلام اللي أخدوا عنده لكنه نصّاب درجة أولى وجشع وطمّاع ما همّه غير الفلوس , فـ نصيحتي ;
لا تضيعوا فلوسكم عليه واكتفوا بـ أوراقه اللي راح تلاقوها في المكتبة ومنتشرة بين الشباب .
- Pathology : يقولوا إن أكبر معدّل رسوب كان في دي المادة !! ما أدري ليش .. عمومًا أنا ما كنت شايفها صعبة .. بأول اختبار فيها جبت درجة ممتازة ولله الحمد .. كان الاختبار سهل جدًا ,
يمكن مشكلة المادة هي آخر شابتر فيها عن الأورام والسرطانات .. الشابتر كبير ومهم , أعطانا الجزئية الأولى فيه دكتور ممتاز , أما اللي درسنا الجزئية التانية كان سيء وضعنا معاه .
بالنسبة لـ شيت الأورام والسرطانات فـ الدكتور الأول (الممتاز) قالنا ما نعتمد على عروض الباوربوينت لأنها مختصرة وأعطانا شيت طـــــــويـــــــل 164 صفحة !!
وقالنا إنه شامل لكل جزئية شابتر الأورام والسرطانات . وقت المذاكرة كانت الشباتر كلها كوم , وجزئية الأورام دي لوحدها كوم تاني !
وفي الاختبار النهائي بصراحة أنظلمنا ظلم صريح .. المفروض الاختبار ساعتين لكن قالوا لنا ساعة ونص وكانت الأسئلة صعبة جدًا ومستواها أعلى من مستوانا وكمان يا دوب بالقوة الواحد يلحق يراجعها
لأنه مافي وقت ! كان فرق كبير 180 درجة بين الاختبار النصفي
- السهل جدًا - وبين النهائي .
والحمدلله على كل حال
.