أحب أشارك معاكم
الكيمياء - ( سليمانيه )
د. إكرام دانش
ماشاء الله شرحها حلو وإسلوبها سلس وممتع , طيوبه تحب تساعد كل البنات خاصه ف الساعات المكتبيه كانت تجاوب ع أسئلتنا بكل تفصيل وأريحيه , كانت دايم تنبهنا ف المحاضره لما نمر على أمثله مهمه وجات ف إختبارات سابقه إنه نركز عليها ف المذاكره ,, وكانت لما يسعفها الوقت قبل الإختبار تسوي لنا مراجعه سريعه لكل اللي أخذناه ,
حتلاحظوا إنها تشرح بتركيز أكثر من كونها تسرع ف إنهاء المنهج لإنها تحرص ع فهم الطالبه ودااايم الله يذكرها بالخير ( أي سؤال ي بنات في أي شيء مو اضح ؟ ) .. وتهتم بالحضور والغياب
على أيامي ماكانت ترضى إن البنات يحضروا لها لإن القاعه تمتلىء ماشاء الله
فهي تتخذذ هذا الإجراء من باب إنه بنات شعبتها أولى بالحضور والتركيز .. بس تقدروا تسألوها ف الساعات المكتبيه حتساعدكم مرا , لكن إن شاء الله ع السنه الجايه ترضى بحضور الطالبات وتقتنع ^^ ..
الحاسب (سليمانيه )
أ. خلود زين العابدين
أستاذه طيوبه وهادئه أخلاقها عسل , تشرح ماشاء الله بالتفصيل .. تهتم جداً جداً بالحضور والغياب ,
وكانت قبل الإختبار تنبهنا ع النقاط المهمه اللي ضروري نركز عليها سواء عملي أو نظري ..
رياضيات ( سليمانيه / شرفيه )
أ. وديان باصفار
درستني نص الترم الثاني تقريبا شرحها روووعه أتعب وأنا أقول ماشاء الله عليها متمنكه من الماده .. وتحب تشرح حبه حبه بالتفصيل الممل وتعيد وتزيد لحد ماتفهمي , وتنبهك على الأسئله اللي جات السنه اللي فاتت , تحرص على إنه البنات يفهموا وتحل معانا السكاشن بحذافيرها ..
فالبنات اللي يحبوا التفصيل والفهم المزبوط أنصحهم بيها .. حتحسي أحياناً إنها بطيئه وهذا شي طبيعي لإنها بتشرح من قلب قلبها الله يسعدها ( مستحيل أنساها الإنسانه هذي ) .. كانت تدرس ف الشرفيه أساساً بس نقلت عندنا ع نص الترم فما أدري إذا حتكون عندنا أو ف الشرفيه السنه الجايه ف أي مكان تكون أنصحكم بالحضور لها ,,
وباقي الأستاذات ذكروهم البنات ماقصروا ..
أهم شي حبيباتي حتى لو ماكنتي عند الأستاذه الفلانيه أو ماتيسر لك تنقلي عندها لا تزعلي عادددي جداً تقدري تجيبي أعلى الدرجات إذا شديت حيلك وذاكرتي أول بأول .. وف النهايه الأستاذه ماهي إلا سبيل لفهم الماده والأساس كله عليكي .. حتقابلي بنات يقولوا لك ( الله يعينك عند فلانه أكيد ماحتفهمي أو تقول لك عظم الله أجرك ف الماده الفلانيه ^^ .. إنتبهي لا تسمعي لهم .. يمكن هي ما تفهم عليها بس مو شرط إنتي كمان ما تفهمي عليها لإن لكل وحده منكم إسلوبها الخاص ف الفهم وتلقي المعلومه .. فلا تلتفتي لأي كلام مثبط واهتمي بالماده وصدقيني حتجيبي الدرجه اللي تبغيها )
>> الله يوفقكم ووييسر لكم يارب ..
إحتراااامي للجميع ..
[/