[يلدرم]

موقفي مع اعظم الدكاترة اللي ماراح انساه طول حياتي

في بداية التخصص سجلت اولى المواد المخصصه لي في الخطة وطبعا كنت من اول يوم السبت الساعة 8 مستنر في القاعة

دخل عليا احد الاخوان من قسمي وقال تعرف مين دكتور المادة؟

قلت لا

قال الدكتور الفلاني وجلس يحكيني عنه حكاوي ولا حكاوي النمنم اللي كانو يخوفونا منه واحنا صغار

من الحكاوي : يقلك واحد من الطلاب من كثر خوفه من الدكتور دا كان يحلم بيه في الليل

قلت حشا دا مو دكتور دا وحش ويبغونا ندرس عنده يالله حولنا من القسم ياولد

المهم جا الدكتور وبدون ذكر اسم او جنسية والشعبة كلها على بعضها 10 اشخاص في مبنى اللغة الانجليزية وممكن يعرفوه الشباب

المهم الرجال من اول دخل بدا يشرح وشرحه بزعاق وصوته جدا عالي ولمن أي طالب مايجاوب يجلس يهزأ بصوت عالي ويجب سيرة الاهل في كلامه واحنا زي البسس

وتمر الايام والرجال نفسه نفسه صوته عالي ويزعق علينا لمن مانجاوب وياما اتهزأت منه وكل محاضرة يمسك واحد فينا وهاتك حش الين الطلاب كلهم يضحكو

قلت في نفسي والله من حقه اللي كان يحلم بيه من جد دكتور يخوف

سالنا عن الدكتور قالو دا الدكتور جابوه يوم ماحطوا اساسات المباني حقتكم يعنى درس كل دكاترة قسمكم ومحد يقدر يقله لا حتى عميد الكلية

جا يوم الاختبار النصفي وكان من 10 درجات وكان عبارة عن مسالتين في عملية الاحتراق وكان فيها معدلات كيميائية ( ميثان وايثان)

السؤالين هما نفسهم لكن المطلوب مختلف في السؤالين والرجال ماشرح كيف نفك معادله فيها ميثان وايثان مع بعض

واذا ماحليت السؤال الاول ماراح تحل الثاني

وهدا المهندس يلدرم يفحط يمين شمال في الورقة وتخريف على كيف كيفك وخد الصفر ولا تبالي فإن الصفر من شيم الرجال

خرجنا من الاختبار وكل واحد يطالع في التاني وجا المحاضرة اللي بعدها ويهزأ في الشباب وانا ماحضرت المحاضرة دي واعطى كل واحد ورقته وشرح الاختبار وقال حلو الاختبار وتعالو

وقال فين فلان وكان يقصدني وما كنت فيه فاتصلو بيا الشباب ألحق الدكتور يبغاك

رحت للدكتور في مكتبه ومعايا واحد من اصحابي وكان الدكتور جالس يكتب في ورقه بالمرسام

بس قلت يادكتور

قام انفجر فيا وقال انت ابوك وامك ماربوك انت ماتشوفني مشغول يالله اجلس في الكرسي ولمن اغلق اتكلم

طبعا صاحبي شرد من المكتب وسابني لوحدي الاقي مصيري المحتوم

قام جا يقول انت زيك زي اصحابك جايب صفر في الاختبار ومشخمط الورقة شخمطه وانت تجلس تسرح في الكلاس
ماتعرف تسوي معادله سهله ( ياشباب كانت المعادلة تنحل في صفحة لوحدها والدكتور يقول سهله)

انت لازم ترجع تدرس في مدرسة حسان بن ثابت الابتدائية

والله خرجت والدنيا قافله في وجهي وقلت خلاص الرسوب جاهز مادام الرجال معصب

والحمدلله اجتهدت بعد كدا وعديت المادة ونجحت فيها كيف مااعرف

والله كنت اخاف منه احيانا لمن اشوفه في احد الاسياب اغير طريقي

اخاف اروح اتهزأ ولا اكل كلمه على الطاير منه

برغم دا كله الا ان هذا الدكتور من الدكاترة اللي افتخر اني درست على يدهم وكان يمزح معايا دايما بره الكلاس