[واحد هادي]

السلام عليكم ورحمة الله

أخي (J'adore) مع احترامي الشديد مين قالك ان 65-79 معناه متوسط؟؟؟ 79 تعتبر اعلى من المتوسط... تقريبا جيد جدا مرتفع او على الاقل جيد جدا

اختي (أحلام ورديه333) جميل جدا جدا انك تستعدي للاختبار ونصيحة من العبيكان او جرير اشتري باقة الاستعداد للتوفل مثل ماقالت الاخت (sunset2)... واذا ماتقدري ممكن تطلبيها من النت بس راح تاخذ وقت الين تجيك

اللي حبيت اقوله وهو اهم من هذا كله...

طبعا الختبار مدته طويله ومقسم الى 4 اقسام... استماع باكثر من طريقه (محادثه قصيره وعليها اسئله.. محادثه اطول وعليها اسئله.. محادثه طويله وعليها اسئله) - قواعد - كتابه قطعتين تعبير قصيره - قطع مختلفه وعليها اسئله.

أصعب جزئيه هي القطع والمحادثه وخاصه لو كانت السماعات مو كويسه وعشان كذا اول ما تجلسي جربي السماعات انها شغاله كويس... بخصوص القطع زمان كنا نقول من النقطه للنقطه لكن للاسف هذي القطع تعتمد على الفهم... يعني ممكن السؤال الاول تلاقي جوابه في اخر جمله والثاني خلاصة جملتين او ثلاث وهكذا.

الاختبار على الورق اسهل كثير ولو انه الكمبيوتر اريح كثير.

اهم شي تسويه وصدقيني اقسم بالله اهم شي هو...

1-الاستخارة.
2-تنامي كويس وترتاحي كويس قبل الاختبار.
3-تكوني اكلتي وشربتي كويس بس مو لدرجة التخمه عشان لا يصير خمول.
4-ازرعي في نفسك ثقه كبيره وارتياح ورضاء بقدر الله.

هي الاشياء لو سويتيها راح تشوفي قد ايش الامر راح يصير اسهل لانه مع الوقت راح تبدئي تتعبي وتفقدي تركيزك وراح تلاحظي من النتيجة انه الاجزاء الاخيرة اقل علامات.

بخصوص النتيجة... يكفي انك تطبعيها من النت ومو لازم تأخذيها رسميه لكن الأفضل بما انك راح تحتفظي فيها لمدة سنتين احسن حطي بريد صحيح مثل ماقالت احد الاخوات وراح توصلك عليه ان شاء الله


اتمنى التوفيق للجميع

ابو الجود