[حيــث الهــدوء]

هذي بعض شروحاتي البسيطه لكذا سؤال سألوني فيه البنات

وحبيت اجمعها هنا للفائده

بداية ببدا في ملاحظتي بخصوص مراجعتها في اخر محاظره في السنترا

المشاركة الأصلية كتبت بواسطة حيــث الهــدوء مشكوره أختي great sister ايضاً لاحظت في مراجعتها في آخر المحاضره : من الاسئلة اللي اعطتنا هي كان سؤال يطلب ماهو القرار ؟ وكانت المقارنه بين المحسوبه = 0.09 و الجدوليه =0.970 اذاً هنا المحسوبه اصغر واذا كانت المحسوبه اصغر نقبل الفرض الصفري ونرفض البديل بينما كانت الخيارات هي كالتالي : أ / نقبل الفرض البديل ؟ ب / نرفض الفرض البديل ؟ ج / نقبل الفرض الصفري ؟ د / ليس مما ذكر ؟ وهي اختارت فقرة أ !! ليش ؟ اتوقع انه غلط عموماً انا بروح لها اليوم ( الثلاثاء تاريخ 14 /6 ) وبسألها كم سؤال ومن ضمنها هذي الفقره وان شاء الله أي افادة استفيدها ببلغكم موفقين يارب

عدنا / الجواب الصحيح بعد مراجعة استاذة الماده هو ( الجواب ب او ج ) لأن هذي قاعدته اذا كانت المحسوبه اصغر نقبل الفرض الصفري ونرفض البديل واذا كانت المحسوبه اكبر نقبل الفرض البديل ونرفض الصفري وطبعاً قالت لا تعتمدون على اجوبة المراجعه لأنها بسرعه واكيد بيكون فيها اخطاء .. هي فقط كانت تبي تورينا نماذج عن الاسئله .. طبعاً الاختبار 50 فقره فيها اجزاء نظريه من اول محاظره واجزاء معادلات تطلب مننا نوجد اشياء معينه ( كله اختيار من متعدد ) موفقين يارب

هذا ايضاً سؤال من الاخت الشوق الجارح

مشكوووووره حبيبتي .. ابي اسال عن شغاه ياليت تسالي الاستاذه معاملات الإرتباط (سبيرمان) سؤال 3- 1: في دراسة هدفت إلى التعرف على مدى تأثر التحصيل الدراسي بالقلق لدى طالبات المرحلة الثانوية, صيغي الفرض الصفري و تحققي من صحته عند مستوى دلالة 0.05.وفقا للبيانات التالية: ع اي قاعده سوت الجدول (رتبه س ورتبه ص ) مافمتها شتتني شوي .. الجدول الي في الحل .. جدول التقدير الحين موعندنا 3 ممتاز وفي رتبه س نحط 2 صح >>>هذا تممام طيب في التقدير جيد جدا زودنا 4ونص >>>ليش ..مو 2 وفي خانه القلق بعد بدنا في رتبه ص ب1 ليش مو 2 زي رتبه س .. انشاءالله فهمتي الي اقصد .. واذا لا مومشكله الله يعطيك الف عافيه يارب

هلا ياقلبي اممم ان شاء الله اكون فهمتك صح بالنسبه لسؤالك ( حسب فهمي ) شوفي حنا الان عندنا قاعده اساسيه لمن نجي نطلع الرتب : 1 / نرتب القيم من الاكبر للاصغر عندنا قيم س ممتاز , جيد جداً , جيد , مقبول صح ؟ نشوف اول ممتاز في س ( نحط جنبه بالقلم الرصاص 1 ) بعدين الممتاز الثاني نحط 2 والممتاز الثالث 3 بعدين نجي نشوف الجيد جداً ( طبعاً حنا قاعدين نرتب بالاكبر ونعطي ارقام عرفتي ؟ ) نجي للجيد جداً ياخذ رقم 4 , ( عندنا تكرار ثاني للجيد جداً ) ياخذ رقم 5 بعدين الجيد ياخذ 6 و المقبول 7 هذي اوووول خطوه حلو ؟ ونرتب قيم ص بنفس الطريقه من الاكبر لين الاصغر وبعدين نعطيهم ارقام ( نفس طريقة س ) نجي للخطوه الثانيه ( اللي هو محور سؤالك ) الخطوه الثانيه : لها قاعده اساسيه اللي هي قيمة الرتب ـــــــــــــــــــ عــــــــددها كيف يعني ؟ يعني : مثلا عندنا القيمه الاولى في س هي الممتاز ( وحنا كاتبين جنبها من اول رقم 1 ) صح ؟ والممتاز الثاني 2 والممتاز الثالث 3 نجي نطبق القانون نجمع قيم الممتاز بالطريقه التاليه 1 + 2 + 3 يعطينا 6 الــ 6 نقسمها على عدد القيم ( عدد القيم اللي هو قيم الممتاز ) كم ممتاز عندنا ؟ ( 3 صح ؟ ) نجي نقسم 6 على 3 = 2 ناخذ الـ 2 هذي ونحطها قدام كل الممتاز نجي للجيد جداً بنفس الطريقه ناخذ الرقم اللي كتبناه جنبه الجيد جداً الاول كتبنا 4 والجيد جداً الثاني كتبنا 5 يلا نطبق القانون الان : 4 + 5 = 9 9 % 2 = 4,5 وش سوينا ؟؟؟ ( اشرح لك كتابة عشان تفهمين اكثر .. اخذنا قيم ترتيب الجيد جداً اللي كتبناها بالرصاص ( 4 و 5 ) وجمعناهم وطلع لنا 9 بعدين قسمنا الـ 9 على عدد القيم ( كم كان عندنا جيد جداً ؟ ) كان عندنا ( 2 جيد جداً ) بعد ماقسمنا الـ 9 على 2 طلع لنا الــ 4,5 فهمتي ؟؟ ناخذ القيمه اللي طلعت لنا ونحطها قدام كل جيد جداً عندنا نجي نشوف الجيد عندنا قيمة وحده للجيد اذا كان عندنا قيمة وحده فقط ( يعني مالها تكرار ) ينزل ترتيبها مثل ماهو في رتب س كان ترتيب الجيد 6 اذاً ينزل في رتبة س بـ 6 والمقبول ايضاً نفس الشي ـــــــــــــــــــــــــــــــــــــــــــــ ,, نجي لرتب ص عندنا 9 , 12 , 10 , 9 , 10 , 7 , 11 نرتبها بالاكبر ( يعني نحط ارقام بالرصاص من 1 لين نخلص آخر رقم ) عندنا الـ 12 اكبر شي ( ياخذ 1 ) بعدين 11 ( ياخذ 2 ) بعدين 10 الاولى تاخذ ( 3 ) 10 الثانيه ( تاخذ 4 ) 9 ( تاخذ 5 ) 9 الثانيه (تاخذ 6 ) 7 ( تاخذ 7 ) نبدا نطبق القانون الـ 12 كم مره تكررت ؟ ولا مره .. اذاً تنزل في رتبة ص مثل برقم 1 ( لان ترتيبها كان 1 ) نجي نشوف الـ 11 .. نفس الشي مالها تكرار ينزل ترتيبها مثل ماهو 2 نشوف الـ 10 تكررت مرتين .. برقم 3 و 4 نجمعهم ونقسهم على عددهم يعني نقسمهم على ( 2 ) يطلع لنا ناتج نحطه قدام كل 10 ... وهكذا لين نخلص فهمتي ؟؟ يارب اكون شرحت لك عدل واذا مافهمتي شي خبريني اعيده لك مو مشكله بالنسبه طبعا لباقي الجدول تعرفين له ما ؟؟

هذا سؤال آخر من الفراشه الخجوله

حيث الهدوء....... ممكن سؤال الله يسعدك شفتي الجداول اللي فيها معامل الارتباط, ووالقيم الحرجه لاختبار ف ,,,,, وقيم مربع كاى كاتربيع المهم الجداول هذي كلها كيف استخدمها الله يسعدك اشرحيلي ع مثال من عندك والله مرررررررره خايفه وهل بتجي في ورقه في الاختبار ولا نحفظها

هلا حبيبي فراشه /اول شي اعتذر على التأخير يادلبو لأني نادر ماصرت ادخل عشان قع اذاكر و ان شاء الله اكون فهمت سؤالك مضبوط اللي فهمته انك ماتعرفين كيف تستخدمين الجدوال بصفه عامه صح ؟ شوفي حبيبي اوووول شي .. جدول اختبارات كا ( شقـــــــــــــيه ) ماهو معنا الان اللي يهمنا هو الجداول الباقيه بيرسون / سبيرمان / اختبارات ت /وجدول اختبارات ف هذي كيف يجي سؤالها ؟ تعتمد هي على مستوى الدلاله ( يا اما 0.01 او 0.05 ) وايضاً على عدد العينه هذا المعطييات مهمه لإيجاد القيمه الجدوليه وتجي دائماٌ في السؤال ( معطيه يعني ) شوفي : الحين لو تلاحظين بأي مثال اخذناه له تقريباً 6 خطوات للحل وكلها متشابهه ( اللهم اختلافات طفيفه ) وعندنا دائماَ في خطوات حل اي مسأله ( يطلبك ايجاد القيمه الجدوليه ) هذي وش فايدتها ؟؟ فايدتها انك تطلعين ضروري القيمه الجدوليه عشان تقارنينها مع القيمه المحسوبه وتشوفين وش اكبر او اصغر عشان تسوين الخطوه الاخيره اللي هي اتخاذ القرار حلو ؟؟ واتوقع انك فاهمه انا عن وشو اتكلم ( لان سؤالك كان واضح انك فقط تبين تعرفين كيف تستخدمين الجدول عشان تطلعين القيمه الجدوليه ) القيمه الجدوليه عشان نوجدها .. لازم نشوف هي وش طالبه في السؤال يعني عن اي درس تتكلم معامل ارتباط بيرسون ولا سبيرمان ولا اختبارات ت ولا قيم ف لان كل واحد فيهم له قانون خاص فيه عشان نوجد عن طريقه القيمه الجدوليه بعطيك مثال في درس بيرسون قالت لك : لدينا عينه من الطالبات بلغت 10 .. معامل الارتباط لبيرسون كان 0.98 ومستوى الدلاله 0.01 اوجدي القيمه الجدوليه ؟ الحل : لإجاد القيمه الجدوليه يجب علينا القيام بخطوتين : ا / نشوف مستوى الدلاله : كان عندنا مستوى الدلاله ( 0.01 ) 2 / نكون حافظين قانون القيمه الجدوليه لبيرسون ( مهمممم ) سواءً لبيرسون او غيره .. قانون القيمه الجدوليه لأي درس مهم قانون بيرسون يقولك : ن - 2 و ( ن ) هي دائماً عدد العينه .. عدد العينه ننقص منها 2 ( هذا قانون ثابت لبيرسون ) يعني : عندنا عدد العينه = 10 10 - 2 = 8 8 هي درجة الحريه لبيرسون حلو ؟ الان اوجدنا درجة الحريه .. وايضاً عرفنا مستوى الدلاله ( 0.01) الان نروح للجدول الخاص في بيرسون ( وهي بتجيب لنا الجداول جااااهزه مثل ماهي عندك بيدك ومكتوب عليها هذا تبع مين ) نروح للجدول : الخانه اللي فوق ابداً ابداً ابداً لا تطالعين فيها ( لان كل المحاضرات كانت تعتمد على ذيلين ) يعني المهم عندنا هي الخانه اللي تحت ( مستوى الدلاله لأختبار ذيلين ) شوفي : عندك في اليمين شي مكتوب درجات الحريه .... هذي وشي ؟؟؟؟ هذي ياقلبي اللي اوجدناها قبل شوي بالقانون حق بيرسون ن - 2 يعني 10 - 2 = 8 8 هي درجة الحريه تحطين اصبعك عليها ثم تشوفين من فوق جنب كلمة درجات الحريه / ارقام ... الارقام هذي وشي ؟؟؟ هذي مستويات الدلاله اول واحد مكتوب 0.01 / 10. / 02. / 0.5 / 10. الان اللي يهمنا هو اللي مطلوب في السؤال يعني : 0.01 طيب ؟ تجين تحطين اصبعك على درجة الحريه اللي هي 8 وتشوفين وش يقابلها في مستوى الدلاله فقط والنتيجه اللي تطلع ( تسمى نقطة الالتقاء ) وهي القيمه الجدوليه نقطة الالتقاء هنا او القيمه الجدوليه هي ؟ ........ عطيني الجواب انتي بردك اللي بتكتبينه انتظرك طيب ؟ وخذي هذي مسأله ثانيه ابيك تطلعين لي القيمه الجدوليه يقولك : قامت باحثه بتطبيق مقياس عن العنف الاسري والعدوان على مجموعه من الطالبات بلغ عددهن 12 وكان معامل الارتباط لسبيرمان 0.73 ومستوى الدلاله 0.05 اوجدي القيمه الجدوليه ؟

وهذا كان جوابها على السؤالين

الــــــــــــــــــــــــــــــــــــــــــــــــ ــــــــــــــــــــــــــف شكر ياعسل وربي ماادري كيف اشكرك والله ماقصرتي ومنحرجه منك تعبتك واخذت من وقتك كثير سامحيني .....الله يسعدك ويوفقك ويزقك ويدخلك الجنه ويبعدك عن النار والله اني ادعيلك من قلبي نقطة الالتقاء هنا او القيمه الجدوليه هي ؟0,872صح ولاخطأ ياعسل يقولك : قامت باحثه بتطبيق مقياس عن العنف الاسري والعدوان على مجموعه من الطالبات بلغ عددهن 12 وكان معامل الارتباط لسبيرمان 0.73 ومستوى الدلاله 0.05 اوجدي القيمه الجدوليه ؟ 0,591

ان شاء الله تستفيدون جميع

موفقين يارب :)