[Dr.Passed]

السلام عيكم ورحمة الله وبركاته
كيف حالكم ...؟



أنا شفت موضوع في الصباح يخص الwriting
وكتير بيشتكي انو بينقص وهو اتفه شي ينجاب درجات في..

طيب...ايش النقاط المهمة الي ازا سوينها وانتبهنالها محننقص؟

1. نبدأ الموضوع بجملة افتتاحية ( يعني من خش في الكلام على طول) بعدين لازم نسيب مسافة قبل مانبدأ النص, المسافة هادي عند اول سطر اسمها>>>Indentation

2. نبدأ نكتب جمل ( بداية الكلام وجمل توصل للقارئ انت قاعد تتكلم على ايه) ابدؤوا حطوا جمل تبدأ تتكلم عن الحدث اول المشهد الأول من موضوعكم.

3. البراقراف الي بعدو حيكون مشهد تاني او الجزء التاني من القصة او الموضوع.

مثال/ كنت في النص الأول باتكلم على المطار وايش سار في المطار لمن سافرنا اجازه. النص تاني حيكون عن ( عند عودتنا الى المنزل) فاهمين عليا؟ ( مجرد طريقة تنسيق الأفكار).

4. لاتغلطو في القرامر الي اختو ( حتحاسبو عليه) الأفعال مهمة والتركيز عليها ضروري + انتبهو من الأخطاء الإملائية..مافي داعي تجيبو كلمات مو عارفين تكتبوها عشان بسرعة تقفلو على الموضوع. اللغة في الف مرادف, وفي طريقة صياغة وافكار تانية ممكن تستعملو كلمات انتو عارفين تكتبوها..

5. احنا عارفين انو بداية كلي جملة capital letter ونهاية كلي جملة نقطة..( هادا مرة ضروري) والنقصان عليها بنص..وازا كانت في جملتين متتاليتين تدور حول نفس الفكرة او تابعه ليها نحط ( فاصله) بينهم.

6. ننهي الموضوع بجملة ختامية. ( جمله مافي بعدها كلام) يعني لمن القارئ يقراها مايقول بينو وبين نفسو ".....وبعدين؟ " .......فاهمين كيف؟

7. طبعا اخر شي نحط العنوان بحيث انو مايكون مباشر تماما...يعني مايكون الموضوع عن الChildren تقولو العنوان Children كده وبس....شوفو انتو اطرقتو لي ايه في الموضوع وجيبو فكرة عامة وطلعو منها عنوان للموضوع.



ختاما............انا بس حبيت افيدكم واسهل الهم دا عليكم. والي يبغا يكتب موضوعو وينزلو ونصححو ( عشان تتدربو كمان) مافي مشكله. والي عندو مشكلة في القرامر ولا الإملاء برضو ححاول اساعدكم بقدر الإمكان...( بس بداية الأسبوع الجي حختفي عشان الإمتحانات)...اخر مرة كم وحدة رسلتلي قبل الإمتحانات بإسبوع وماقدرت اساعدها وهادا شي ضايقني صراحة...فيريت نشوف ايش عندكم دحين..

والي عندهم مواضيع يلا اكتبو.. =)

Dr.Passed