[طالبة متزوجة]

انا زيك اعاني بس مو مع اهلي
معاناتي كلها مع زوجي يلي شايف ان دراستي مالها داعي واني لوكملت دراستي رايحة اتكبر علية وعلى اهلة وان بيتي رايح يتخرب وعيالي رايحين يتشردوا وووووووووو الواوات كثيرة
وكل سميستر ينكد عليا ويخليني في ضغط كبير مايعلم بية الا الله
تخيلوا انا بيتي في جدة قريب من الجامعه وايام الاختبارات والدورة اتشرد واروح بيت اهلي في مكة ويوميا اطلع وانزل من مكة للجامعة (مع العلم اني ما احضر كل المحاضرات احضر بس للمواد العلمية والصعبة والباقي على الله )
وعانيت كثير من اول مااتزوجت وانا مشردة طالعة ونازلة من مكة (وانا اتوحم _وانا حامل _وانا على وش ولادة)
واجلت كثييييييييييييييير ويلي كانوا معايا كلهم اتخرجوا من زماااااااان وانا لسع
وللعلم اني قبل ما ادرس في جامعة عبد العزيز كنت ادرس تمريض ولما فضلي سنه ونص اتزوجت وزوجي اجبرني اترك دراستي التمريض وتركتها وجلست في البيت بس ماقدرت اتجننت وكنت كل شي لزوجي ووفرتلة كل شيء بس للأسف هوا ماكان شايفني اصلا و لما حسيت انه بدأ يخونني ما قدرت استحمل ورحت وسجلت في الجامعه ويلي يصير يصير ولا اني افضل تحت رحمة زوجي بدون شهادة وفي اي لحظة ممكن يخونني او يسيبني وانا افضل ساكته واستحمل لأن ماعندي شهادة اضمن بيها نفسي وعيالي

بس تصدقي ان كل هذا العذاب حسسني بقيمة الدراسة وعلقني فيها اكثر وخلاني اصر واعاند اني اكمل دراستي والحمد لله اهي بتعدي وانا دحين حامل وبرضي رايحة اتعذب
بس مهما اتعذبت ومهما سمعت كلام ومهما صارتلي مشاكل بسبب الفلوس والجامعه إن شاء الله اكمل لأن كل هذي المشاكل بتقوينا اكثر

بس ياريتهم يخلوا الدراسة ببلاش عشان نفتك من الذل حق الازواج والاهالي

أسفة طولت عليكم بحكايتي الكأيبة بس انا حبيت اكتب قصتي عشان اقوي كل وحدة زينا بتعاني
وشكرا