السلام عليكم
نعيد و نزيد زمن الرسول كان النساء يركبو الجمال ليش ما منعهم الرسول وقلهم احنا في خلا او صحرا لازم نجيب لكل وحده "صبي" يمسك الجمل بمسمى " محرم" ولا ما ينفع لانو ممكن من تنزلو من الجمل او الحصان بعض من جسمكم يبان ولا ما ينفع لانو ممكن الحصان يهيج وتتعورو ولا ما يحتاج لانو المدينه المنوره صغيره الي عندها مشوار تروح برجولها ولا ولا ..... الخ
في اشياء كتيره عندنا ما كانت موجوده زمان فعشان كدا لازم نحاول نقارن و نربط بين زمن الرسول ودحين و نتخيل زمن الرسول ونتخيل اش حيكون موقف الرسول في دا الموقف لانو ما عندنا دليل من الكتاب و السنه يحرم او يحلل دا الشي وعلى فكره الصحابه ما كانو ملائكه كانو بشر زينا يغلطو و يتوبو
و مو لازم عشان المرأه حتسوق يعني حتفصخ العبايه و تزني انا ما اعرف عن سواقه المرأه في دول الخليج بس متاكده انو في ناس مغطيين و متحجبين و اكييييد احسن من حجاب بعض البنات الي عندنا الي بيكربو معا سواق
و اي حاجه حنمر فيها اكيد مرت على الدول الاسلاميه الي زينا
وبعدين محسسينني انكم حتخترعو قرار ترى كل شعوب العالم المراه بتسوق فيها وترى منتو الوحيدين الي تعرفو ربنا و حتى اهل القرى انا اعرف انو المراه تسوق
و اغلب الاضرار الي ذكرت في الموضوع ممكن تسير برضو ازا البنت كانت معا سواق صح ؟؟
و بعدين مين قال سواقه السياره مجرد كماليات ازا عندك اخوان وسواق فالحمدلله منتي محتاجه تسوقي فتصير كماليات
لكن من تكوني ارمله او ماعندك اخوان و ما عندك القدره على دفع 1000 ريال او اكثر كل شهر فانتي محتاجه سواق و لا يعتبر من الكماليات
و اش تمرد المراه اش التخلف دا من فين جاب العقليه دي الله يشفيه <<مشكله لو الشعب كولو تفكيرو زي كدا
حنرجع لزمن ابو جهل
و الي يقول ملكات ومني عارفه ايش خخخ؟اش التشبيه الفضيع دا؟ ما اعرف يعني تكذبو الكذبه وتصدقوها ؟؟
و بعدين كلنا عارفين انو ركوب المراه معا سائق يعتبر خلوه ؟ ليش حللتوه ليش سامحين فيه ولا عشان حيريحكم من مسؤوليات كتيره
للي ما يعرف ركوب المراه معا سائق اجنبي خلوه يلا اشوف كل واحد يسيب اللاب توب ويروح ينام عشان بكره هوا حيوصل امو واخواتو و اخوانو الصغار و يجيب كم غرض من البقاله؟؟
و في النهايه
الي تبى تعمل حاجه غلط حتعملها سواء كانت سايقه سياره ولا معا سواق ولا راكبه حمار ولا ماشيه على رجولها
و بس :)