[Kung Fo]

المشاركة الأصلية كتبت بواسطة أنـا دايـمـا أنـا السلام عليكم و رحمة الله و بركاته كيف الحال ؟ ان شاء الله تمام ؟ اليوم حبيت أكلمكم عن كم مشكلة في الجامعة - يا كُثر مشاكلها - أولاً : مشكلة تباعد المباني : كلنا - طلاب أو طالبات - مرينا بالمشكلة هذي , و اشتكينا لكن حبايبنا أذن من طين و أذن من عجين , يعني مثلاً الترم اللي فات طلعت روحي فيه , كان عندي محاضرة في مبنى 125 و بعدها في مبنى 40 - هذي تقريبا 6 أو 7 دقايق مشي - و بعدها أرجع مبنى كلية الاقتصاد و الادارة - هذي تقريبا أقل من 10 دقايق مشي - و الله ما كنت أوصل المحاضرات الا و نفسي مقطوع , جربت أروح بالسيارة لكن هذي فيها تأخير أكثر بسبب المواقف و الزحمة داخل الجامعة , و يترتب على هذي المشكلة اني في كثير من الأحيان أتأخر على المحاضرات خصوصاً اذا كان الدكتور في المحاضرة الأولى يطلعك بعد الوقت المحدد , ما أعتقد انه حل هذ المشكلة صعب , يعني مثلاً زي طلاب كلية الاقتصاد و الادارة المفروض محاضراتهم تكون في مبنى 81 و 125 , المشكلة يرمونا في مباني بعيدة مع انه في قاعات متوفرة ,طبعاً هذا الكلام بالنسبة لقسم الطلاب , أما بالنسبة للطالبات هما ممكن يشرحوا مشكلة المباني عندهم و يحطوا الحلول اللي تناسبهم . يعطيك العافية أخوي على الطرح , المشكلة تخيل قبل ترمين قبل (اشتريت سيارة قبل 3 شهور الحمد لله ) ,, كنت أداوم على 125 وبعدها محاضرة في كلية الهندسة وبعدها بساعتين محاضرة في 26 , تخيل الشغل اللي كنت أسويه ..!! أنا في راسي فكرة , بس يبغالها تمهيد ودراسة من الجامعة , أنه يكون فيه الجامعة دراجات ويكون لها مسارات بحيث تصل إلى جميع المباني (مجرد فكرة) , طبعاً الدراجات على حساب الجامعة وتكون في حرم الجامعة ولها مواقف معينة بعد الإستخدام.. ثانياً : مشكلة المشاريع الغير منتهية : طبعاً جميعنا كل يوم نشوف الزحام داخل الجامعة بسبب المشاريع و التكسير و التحطيم اللي ما ينتهي , يعني مثلاً المشروع اللي ما بين الجهة اللي فيها مبنى 81 و الجهة اللي فيها مبنى 26 عند قاعة المؤتمرات , هذا المشروع عطل الحركة هناك بشكل كبير , المشروع في هذيك المنطقة صار له أكثر من سنتين مع انه مشروع تافه المفروض انه يخلص في شهر مو أكثر , في كمان المشروع اللي عند مبنى 26 تحت عند المواقف , هذا المشروع من يوم ما دخلت الجامعة و الى الآن ما انتهى , هذا المبنى كثير مننا حيحتاجه بسبب وجود العمادات و كمان هو خاص بطلاب السنة التحضيرية , كمان في مشاريع ثانية بس هذي أهمها . بالنسبة للمشاريع فحدث ولا حرج عن طول المدة ,, تخيل قصة صارت مع خويي خارج الجامعة : يقول كنت أمر بالسيارة من عند دوار يوجد فيه إصلاحات وحاطين لوحة أنه الإصلاحات بتخلص يوم مثلاً 2\2\1429 وبعدين مر بعد اسبوعين وحصل التاريخ تعدل إلى 30\2\1429 وبعدين مر بعد مدة وما حصل اللوحة , تخيل هههههههههه ,, هذا سبب الفساد الإداري الحاصل هنا ثالثاً : مشكلة الوقوف الخاطئ : سبب هذي المشكلة بالدرجة الأولى هم الطلاب مو الجامعة , لما يجي واحد بكل غرور و بلاهة يوقف غلط و لا يقفل على أحد و بدون ما يهتم بالناس اللي تتعطل مصالحهم بسببه , المشكلة الكل يبغى الموقف الأقرب طيب تعالوا بدري و انت تاخذوها , لكن أنا أول ما دخلت الجامعة شفت شي عجبني , شفت سيارات الأمن الجامعي و سيارات السحب - ما أعرف ايش يسموها - تنبه اللي يمشوا غلط و تسحب سيارات اللي يوقفوا غلط , لكن مع الوقت خف الشي هذا و ما عاد نشوف سيارات الأمن و السحب الا بالغلط . هذي مشكلة وأيضاً ترى بعض المباني المواقف حقتها ضيقة وبعيييييدة رابعاً : مجموعة مشاكل أخرى : زي قلة صرافات سامبا , اللي ما تلاقيها الا في أماكن محدودة و غالباً تكون زحمة بالذات في 25 , يعني مثلاً منطقة مبنى 40 و 44 و كلية علوم و مركز اللغة الانجليزية ما فيها أي صراف سامبا مع انه عدد الطلاب في هذيك المنطقة كبير - أعتقد انه حل هذي المشكلة بنك سامبا نفسه مو بيد الجامعة بالدرجة الأولى - , و كمان مشكلة الكافيتيريات , لأنه عددها مرة قليل , أنا ما أطالب انه ندلع زي البنات و يكون عندنا باسكن روبنز و بيت الدونات و غيره لا , بس يزودوا عدد الكافيتيريات , لأنه في كم كافيتيريا كان تمشي الحال زمان و قفلوها زي اللي عند كلية الآداب و اللي عند مبنى 75 هذي كلها تقفلت - ايش يعني ؟ تبغوا تموتونا جوع ؟ - . المشكلة من سامبا نفسها يعني لو كثروا الصرافات كان أصرف , وأيضاً الصرافات الحالية بالقوة تحصل فيها نقد خاصة اللي عندنا في الهندسة.. * أنا عارف انه في مشاكل في الجامعة أكبر من كذا بكثير , لكن أنا حاولت اني أكتب عن مشاكل كلنا بنلمسها , أرجوا من الجميع إبداء رأيه , و اعذروني على الإطالة .

شكراً لك والمشاكل أكبرر من كذا بكثيـــــــــــــــر ,