رد: ابى مساعده لاي احد ياخد مع الاستاذ محمد علي الروايده
نسختلك ردي من الموضوع الثاني ،،،
اهلين اخواتي ،،، ابشركم وصلت للكلام الاخير من الدكتور عن الماده
اولا بخصوص المنهج ،،، يقول براحتكم الكتاب او ملخص بالخيور او ملخصه هو اختاروا واحد وذاكروا منه ،،، المهم انا سألته قلتله طيب انت اسئلة الاختبار حتسويها من ايه واحد فيهم ،،، قلي الاسئلة راح تكون من الي اشرحه ،،، فأنا من رأيي انه الافضل الملخص حق الدكتور نفسه لانه هو الي الدكتور بيشرح منه ،،، وبالنسبه للملخص هو صحيح الدكتور ماخلصه ،،، لاكن هو الان شغال عليه ،،، وكل ماخلص جزء راح ينزله بموقعه في الجامعه وبمكتبة خوارزم ،،، واذا مالقيتوه انا مستعد انزله لكم ان شاء الله فالمكتبة الي تبغونها .
وفي نقاط بيشرحها ماهي موجوده في الملخص لكنها قليله جدا عشان كذا الافضل انكم تشتروا الملخص من الان عشان تتابعوا معاه وتكتبوا الاشياء الناقصه ،،، وانا حكتبلكم النقاط الي ذكرها في المحاضره الثانيه وماهي موجوده في الملخص بردي القادم ان شاء الله .
وبخصوص الاختبارات زي ماقلتلكم اختيارات ،،، وراح يكون الاختبار الشهري الاول في بداية شهر 5 ان شاء الله .
اما بخصوص اسئلته ،،، انا سئلته وقلتله يادكتور الطلاب الي درسوا معاك الترم الماضي خوفونا منك يقولوا اسئلتك صعبه ،،، رد عليه وقال سيبك منهم كل واحد راح ياخذ حقه ان شاء الله والطلاب ماهم زي بعض في ناس تاخذ 90 وفي ناس تاخذ 60 .
ومع كذا انا اقولكم مااعتقد ان اسئلته راح تكون سهله ،،، وشكل اسئلته تعتمد على الفهم وليس الحفظ ،،، لانه ما شاء الله دكتور فاهم ويشرح من قلبه ،،، وبصراحه خساره انكم ماتسمعوه تمام لانه صعب تلاقو دكتور فاهم زي الدكتور محمد ،،،، ما شاء الله عليه نابغه في الاداره ،،، حتى لهجته الاردنيه ابتديت اتعود عليها وافهمها .
وبس سلامتكم ،،، وان شاء الله ما اكون نسيت شي ،،،، واذا عندكم سؤال ثاني انا حاضر .
تحياتي اخوكم طارق
|