[LeLou]

المشاركة الأصلية كتبت بواسطة تيفاني السلام عليكم بدون لف يمين او شمال راح ادخل فالموضوع مباشرة يا ناس طفشت من الفيزيا لذلك اريد دكتور خصوصي ويش رايكم؟ فيا ليت لو احد من اخواني أو اخواتي يعرف ينزل اسم الدكتور ورقمه ويا ليت لو احد يوضحلي وش المقصود بفيزياء 110 علما باني دحين داخل السنة التحضيرية وجزااااكم الله خير الجزاء

و عليكم السلام و رحمة الله و بركاته..
حبوّه الفيزياء مرة ظريفة و كتكوتة كمان هي تخصصي << برااا..
قبل كدا اول شي اهلا بك في جامعة عزوز و إن شاء الله تلقى في اسرة المنتدى رد لكل سؤال يجي ببالك..
ثاني شي بالنسبة لفيزو 110 مرررة سهلة و انا عن نفسي ذاكرت من ملخصات طلعت سالم جدًا رائعة و واضحة..
الناس تمدح ملخصات أشرف بركات بس انا ما ذاكرت منها بس ما قد شفت أحد ذمها..
المهم المادة دي جدًا سهلة و بالنسبة ليا اسهل مادة عدت عليا في السنة التحضيرية..
لانه القسم جدًا متعاون و أسئلة دي المادة معقولة مو بذيك الصعوبة..
و كمان ذاكر النماذج القديمة و ملخصات طلعت سالم بتلقى في نهايتها في نماذج محلولة..
أهم شي تفهم الاساس و تبدأ تطبق..
أنا ما افرض عليك تحب المادة بس لا تعقدها زي ما قلت لك منهج التحضيري جدًا سهل اسهل من الثانوي و اسئلته مرة حلوة كمان..

بالنسبة لأيش معنى فيزياء 110 هي فيزياء عامة..
يعني تدرس فيها اسايات الفيزياء..
و تركز 110 على الحركة و المتجهات و الكميات القياسية و الكميات المتجهة و الأبعاد و قوانين نيوتن التي تعتبر اسايات الفيزياء..
بالنسبة لــ 202 اللي يقول عنها الاخ محمد الداوود هي كمان فيزياء عامة و تعتبر من الاساسيات بس 202 اسايات الكهرباء..
و 203 اسايات حركة الموائع و خواص الموائع و الكلام ده..
و بعد كدا راح يبدأ كل شي يتفصل كهرباء و مغناطيسية و دوائر اليكترونية و ديناميكا حراراية و ميكانيكا و الخ..
و في الهندسة لازم تاخذ كم مستوى فيزياء بس ما اعرف ايش هم بالزبط..

بس نصيحتي الاخيرة لا تشيل هم دي المادة لأنه اسئلتها جدًا سهلة و كل اختبار فيه 3 اسئلة بونس و الفاينل 4 اسئلة..
يعني بإذن الله تضمن الدرجة..
أهم شي و قبل كل شي التوكل ثم التوكل ثم التوكل على الله سبحانه و تعالى..
لانه هو سبحانه و تعالى اللي بيده كل شي..
و الله الموفق~
و سامحوني عالاطالة..