[T@RIQ]

المشاركة الأصلية كتبت بواسطة بيييسان مشكور اخوي ماقصرت هي السالفه انو اول ترم دخولي للجامعه نزلت لي 5 مواد وماكانت اعرف طريقة المذكره ولا الملخصات ولاشي وكنت مالي نفس مقهوره انوا القدرات بسببها مادخلت الجامعه وماذكرت كويس واصلا ماذكرت كنت بدخل الامتحان ع الله كدا نجحت نجحت رسبت رسبت المهم بعدين طلعت علي مادتين رسوب وزعلت مره وقررت ارضى اني انتساب وارضى بالمكتوب وعسى ان تكرهوا شيئا وهو خيرا لكم والحمدلله كملت وتوكلت ع رب العالمين ونجحت بالترم بمعدل وصار معدلي من 2.4 الى 3.14 والف حمد وشكر لك يارب وكان الترم فيه 4 مواد وبعدين دخلت الادراه كملت واخذت المواد الي كانت علي ومادتين تخصص والحمدلله المهم اخوي هذي قصة خوفي من 5 المهم انا قررت بعد كلامك بهذا الجدول عربي2 3ساعات ثقافه2 ساعتين قانون ادري 3 ساعات مبادي علوم سياييه 3 ساعات سلوك تنظيمي 3 ساعات 14 ساعه وبتوكل على رب العالمين دعواتك اخوي والف شكر لك ماقصرت والله يعيطك العافيه

هلا اختي كل واحد فينا له قصه مع هذي الجامعه ،،، طيب بقولك قصتي انا عشان تعرفي ليه انا كنت قاسي عليكي شويه ،،، انا بعد ماتخرجت من الثانوي وهذا وانا عدت ثالثة ثانوي مرتين رفضتني الجامعه ووقف القبول قبلي بنسبتين فقط ،،، المهم دخلت انتساب اول سنة مرت معايه تمام وكان معدلي عالي وثاني سنة رسبت في اغلب المواد وانعدم المعدل ،،، المهم قررت اني اترك الجامعه وسحبت ملفي ،،، في الوقت الي سحبت ملفي كان فيه تقديم في الجامعه انتظام قلت ياولد خليني اجرب يمكن يقبلوني ،،، وفعلا قبلوني انتظام بعد سنتين انتساب لكن قالولي ترجع من البداية ،،، قلتلهم ذحين تقبلوني انتظام بعد ماتوظفت المهم دخلت في الجامعه واستمريت بعملي لكن بنفس طريقتك الجامعه مشيت معايه مشيت مامشيت مو فارقه ،،، ورسبت في مادتين اول ترم ومعدلي كان 1.80 ،،، بعد الترم هذا انا صحيت لنفسي والحمدلله وقررت اني ارفع المعدل والحمد لله مابقي الشي الكثير على النسبة الي اتمناها ،،، وان شاء الله اقدر احققها .

المهم انا حبيت اني اشد عليكي عشان تصحي لنفسك لا اقل ولا اكثر وماابقاكي تدخلي الجامعه بدلع او خوف او كسل او تردد ،،، وابغاكي تستمري وانتي تبغي اعلى معدل في الجامعه 5 خليه هو طموحك ،،، وان شاء الله ربنا يحققلنا امانينا جميعا .

وبخصوص عدد المواد كل ترم ،،، شوفي اختي حاولي دائما جدولكي مايزيد عن ستة مواد وماينقص عن خمسة ،،، خليه خمسة لما تكون عندك مواد صعبة ،،، وستة لما تكون اغلب موادك سهلة زي ذا الترم ،،، لكن اذا كان مسموحلكم بصيفي او انتي عندك استعداد تاخذي ترم اضافي او ترمين فوق الاربعة سنين خلي جدولكي مابين 5 و 4 بنفس الطريقة الي شرحتها .

وبالنسبة للجدول الي قررتيه انا اشوف انه ممتاز ومتوازن لشخص يبغى يرفع معدله ،،، لكن المهم انه ممكن يرفع المعدل للنسبة الي انتي تبغيها ولاتنسي نقص الثلاثة نسب الناتجة عن زيادة عدد ساعاتك الي ماقلتيلي عليها ،،،اذا كان مناسب خلاص وانا اخوك توكلي على الله واعتمدي الجدول ،،، ولاتنسي تسألي البنات عن الدكتورات الممتازات .

ونصيحه خاصه لكي ،،، لاتتحطمي من ايه حاجه ،،، انتساب انتظام مو مشكله المهم تجيبي نسبه ترفعين فيها راسك ان شاء الله .

بالتوفيق ان شاء الله ،،، وتشرفت بمعرفتكي ،،، وايه خدمه انا حاضر ،،، ومشكورة على دعواتك الصادقة والله يسمع منك ان شاء الله ،،، وان شاء الله مااكون قصرت معاكي بايه حاجه ،،، اخوكي طارق