--------------------------------------------------------------------------------
اعزائي رواد المجلس لكم مني اجمل وارق تحيه معطرة بالفل والياسمين واعترف لكم بتقصيري واقلالي في المشاركه في هذا المجلس الرائع والذي يضم بين جنباته مجموعة رائعه ومميزه وارجو منكم ان تسامحوني على هذا التقصير وهذه القصيده هي ما اردت المشاركه به رغم تواضعها وامل منكم تقبلها بصدر رحب وارحب بردودكم وانتقاداتكم التي تزيدني طموحا للافضل ولكم جزيل الشكر والامتنان /
يا شيخ اشوفك حاربت عينك النوم $$$$ قل لي علام الجفن حارب رقاده
قل لي عسى منت بحزين ومهموم $$$$ او لك حبيب شاغلك في وداده
هذا سؤال اللي تعلا على القوم $$$$ اللي عرف جفن هنا له سهاده
الصاحب اللي يسأل ويبغي علوم $$$$ وحلفت أنا ان يبلغ مناه ومراده
يالله عسى تفداه الانذال ورخوم $$$$ واللي ليا من مات ما اعلن حداده
فعله يعجّز كل نادر وشغموم $$$$ وكلٍ قصر عن ما بغاه واراده
وان كان تنشد عنه ومن اية القوم $$$$ فهو ........ واسمه اصل السعاده
لا يا سعد لا يشحنك قول مرحوم $$$$ ترى صريع الحب موته شهاده
من سبته كم مات شيخان وقروم $$$$ وترى حياة اهل الهوى للقراده
من حب غرو حط في قلبي وسوم $$$$ اللي سلب عقلي بهون وهواده
الجادل اللي ريحها فل يشموم $$$$ مشيه تثني وخطوته في ركاده
وسط العذارى بدر وما حوله نجوم $$$$ وشعره طويلٍ مدلهمٍ سواده
صدره عريض وتحته البطن مهضوم $$$$ والخصر ناحل زايدٍ في اضطهاده
كنه من العيشه موقف ومحروم $$$$ تحسبه ليا شفته حرم طيب زاده
وعيون حورٍ رمشها يرسل سهوم $$$$ يا ويل منهو باسود الرمش صاده
ومبيسمه خاتم اليا شفته اهوم $$$$ بجمر الشفاة اللي يزيد اتقاده
والخد براقٍ سرى فاسود غيوم $$$$ وجهه قمر والخشم بالحسن زاده
زودٍ على حسنه به الطبع محشوم $$$$ وبعقله على جيله يحوز السياده
كله على بعضه به الزين مرسوم $$$$ كله حلى والحسن فيه بزياده
فأنا اشهد اني بالهوى صرت محكوم $$$$ ولا غير ربي يعتني في عباده
فالله ييسرها علي دايم الدوم $$$$ ويرزقني بصبر جميل وجلاده
وأنا اشهد اني بالهوى صرت مهيوم $$$$ وطرد الهوى ما من وراه اي فاده
فان كان تسألني علامي عن النوم $$$$ وعلى جفني ما اهتنى في رقاده
فهذا عذاب الحب والحب معلوم $$$$ يشغل فكر من حب وايضا فواده
فما نيب انا بالحب والله مليوم $$$$ الله اراد ... وبالغٍ في مراده
وخير الكلام اللي به الهرج مختوم $$$$ صلو على اللي مرسل بالعباده
وسلامتكم وسامحونا ان كان هناك زلل او خطأ وانصحوني بالصواب
تقبلو تحياتي
اخوكم /
الخيال