[تونيا]

يا ضحا يا الصمت


الحل بيدنا إحنا



أنا اليوم كنت في الجامعه وكلمت مديرة الانتساب د. إقبال الصالح عن موضوع الظلم ,وقالت ماحد معصوم من الخطأ وقالت مسموح لكل طالب وطالبه انهم يطالبوا بحقهم

ومن حقهم انهم يشوفوا ورقة الاسئله والاجابه والدكتور/ه أو الاستاذ /ه مطالبين كمان يوضحولهم أخطاءهم ويبينوها لهم

ويردوا على كل استفساراتهم , وقالت أنا كمان أعطي مواد , وأطبق هذا النظام مع طالباتي

قالت هذا النظام ماكان موجود زمان , لكن اليوم صار متاح للجميع ,, وقالت انتي جربتي وعارفه , قلت ايوه بس أنا في المره الأولى عانيت ومو بهذي السهوله رجع حقي , وكمان مع الدكتور ... ما قدرت أسوي الي قلتي عليه , قالت في هذي الحاله يرجع للإداره , والإداره ما تقصر, وهذي انتي جربتيها وما عانيتي وبسهوله بعدها رجع حقك ..
قلت يعني افهم منك انه لو الطالب /ه لقي رفض من الدكتور /ه أو الاستاذ /ه يرجع للإداره

قالت طبعا والاداره اجراءاتها سريعه والنتيجه مضمونه


خرجت أقول ,, شكله احنا الظالمين (لأنفسنا ) , لأننا سكتنا وما طالبنا بحقوقنا , او حتى لما طالبنا من أول عقبه استسلمنا


يظل الموضوع , مشكله كبيره , لكن هذي المشكله طالما انها تخصنا لازم احنا نستخدم كل الحلول عشان نحلها

وطالما زي ما انت قلت والدكتوره اقبال أكدت انه الحل بيد الإداره , لازم نعرف كمان انه الاداره ما راح تجلس تدور علينا عشان تردلنا حقوقنا , لازم احنا نسعى ونجتهد ونروح ونجي ألين نجيب كل حقوقنا ..

(وأن ليس للإنسان إلا ماسعى , وأن سعيه سوف يُرى )