[خالد9921]

تعليقي : حتى في الانقاذ صار فيه واسطات ... الله لا يوفقكم واحد واحد

هي جات على هاذي بس ؟! خذ كلامي من شخص اكلها امس !!

بسم الله الرحمن الرحيم

عندما يصبح الانسان بلا قيمة ,, عندما تُهان قوافل البشر وتُدعس فأعلم أنك حتما في جده ,,
هذا انا طال عمركم كنت طالع من الجامعه الساعه 11 وصباح
اضطريت اوقف عند محل امام سوق الجامعه
وماهي الا دقايق حتى نزل المطر بغزارة شديدة غرقت معاها الشوارع
وبالتالي ما قدرت اطلع من المحل اللي انا فيه ولا الناس قدرت تطلع من المحلات
واللي غرق غرق واللي راحت سيارته راحت وانا منهم
شفت سيارتي تغرق قدامي عيني وانا ماني قادر اسوي لها شي
لانو بإختصار نزولي للشارع يعني غرقي ومغامرتي التي قد تكون فاااااشله للغايه !!
المهم استمر نزول المطر بشدة واستمرت معها اتصالات عالدفاع المدني
واللي كان دايما يعطيني الشبكة مشغوله ويا عيني عالتطور !!
وفي مره من المرات شبك الخط ولكن للاسف ما يردوا ,, نعم ما يردوا !!!
مرت ساعتين وانا بنفس المكان ولا شفنا بالشارع اي سيارة تابعه للحكومه ابدا ابدا
وفي لحظة امل مر بالشارع جيب حق قوات الطوارئ
انا هنا ابتشرت خير قلت اكيد خلاص هذا يبغى ينقذ الناس اللي بيقدر ينقذهم
ف نزلت الشارع اصارع الموويه واشرت للجيب يوقف لي ,, تتوقعو ايش صار؟
بكل برود العسكري اللي بالجيب يطالع فيه ويضحك وشاب السيقاره مع زميله وطناااااااش تركني
ولا وقف لأي شخص رغم انو كانت في حرمه تصارع الموت قدامنا وكأن شي لم يكن !!!

مرت ساعتين لين الساعه 3 الظهر خف المطر شويه
قلت خلاص يا ولد مالك الا تسبح لين قدام كلية الهندسه يمكن هناك خفيف
وتلقى اي سياره تاكسي او شي توقفه واركب معاه لبيتي اللي بشمال جده
لانو جلست بمكاني راح اتحاصر مالي الا اسبح !!
فعلا سبحت الين هناك ووقف شاب ابن حلال قالي يلا اوصلك
طلعنا متجهين عالخط السريع ولكن طبعا الخط فوضى عااارمه بشكل مرعب
وكوبري الجامعه مقفل يعني الخط السريع مقفل يعني انسى مالك الا ترجع
فعلا رجعنا على اساس ننزل للشمال من جهة شطر الطالبات و المطار القديم والاندلس مول
وهنا كنت الفاجعه اكبر واكبر جلسنا نغامر بالسياره والناس كلها تغامر
لما توكيلات بالبيد في السليمانيه نزلنا عالشارع اللي هناك
ولكن خلاص هنا كان لازم تنتهي المغامره مننا ومن جميع المتواجدين
لان المويه دخلت السيارات لين غطتنا واحنا جالسين بالسياره
والسياره صارت تمشي لحالها المويه يجيبها يمين ويسار يعني المووت الموووت !!!
هنا قالي صاحب السياره مالنا الا نسبح توكل على الله والسياره خلاص الى مقبرة الجحيم
طلعنا من الشبابيك وسباااحه نهرب من الشارع زي كل الناس اللي هاربه ومنها حريم واطفال !!
لما ارض بررحه كبيره مليانه تراب كانت الملاذ الآمن لحوالي 3000 نسمه !!!
وصلنا للارض وجلسنا فيها مع الناس وقدامنا بالشارع المقابل برضو ناس هربانين لمداخل العماير والبيوت
وطبعا الشارع مرره غرقان انسى فكرة انك تمشي فيه راح تغرق لانو مرره مرتفع ويمشي بسرعه يسحب الرجول كأنو شلال :/
هنا طبعا صارت مواقف لا يمكن انساها عرفتني ايش البلد اللي انا انتمي له !!
جلس الجميع متأمل قشة امل في الانقاذ لساعات وساعات
كل هالالوف من البشر جالسين يصرخوا ويبكو المنظر كان مفجع وكأنو يوم الحشر اللهم يا كافي !!
وفوقها تشوف قدامك ضحايا ما يعرفو مصير الطريق هذا ويغرقو قدامك ويموتو
ولا تقدر تنقذهم ولا في اي فرق انقاذ وتحياتي لامن بلدي تحياااااتي الشديده له
طبعا اول المنظر هذا كان فيه فقط 3 عساكر لا اكثر بدون اي آليات
2 اختفوا خلال خمس دقايق من وصولي ,, وين راحو؟؟ الله اعلم !!! لكنهم هربو مع راعي وايت !!
وواحد تتوقعوا ايش سوا ؟!!
ابدااا جاء واحد راعي تريله مع اطفاله ويقول للناس اللي معاه عائله صغيره يركبهم معايه
طبعا الكل بدأ يصيح علشان ياخذ حريمه وينقذهم
لكن اللي صار انو نزلو من سياره مع سواق اندونيسي 2 بنات فل اوبشن اغراء لأي خروف
في هاذي اللحظة استبسل العسكري اللي كان موجود لحاله بسالة وشجاعة خراااافية
وراح يشيل البنتين من سيارة السواق ويسحبهم معاه لما الشاحنة وركبهم فيها
انا قلت هنا خلاص الحين البنات ركبو خلاص بيرحو والعسكري يجلس معانا لانو مرابط هنا
لكن للاسف بكل وقاحة ركب مع البنات بالشاحنة جنبهم ويضحك للناس في حين انهم جالسين يبكون ويصيحون له انو ما يروح ويساعدهم !!!!
وراحت الشاحنه بضيوفها الجدد
ومن بعدها ما عاد شفنا وجه المليح هذا وجلس الشعب السعودي بأكمله المنكوب بدون اي امن يذكر !!

بقا الناس محاصرين بالساعات في هذا المكان
واحنا نشوف بالسماء 3 هيلكوبتر فقط 3 هيلكوبتر تجوب جده وبالتحديد الشرق
وكل ما جات فوقنا نأشر لها نصيح لها نقولها ناس بتموت تحت ابدا وكأنهم ما يشوفونا طناااااااش

بعد كذا جات الساعه 8 العشاء تقريبا ومن لطف الله منسوب المياه بدأ يخف
هذا ما يعني انو خلاص المشكله راحت بس يعني فيه امل بسيط انك تسبح !!
طلع الناس في مسيرات للسباحه زي ما تشوفو بالصور ماسكين ايادي بعض لانو لو تسبح لحالك راح يجرفك المويه
لانو خلاص جلستنا زي كذا مالها فايده اما اننا نغرق او اننا نغامر ونطلع ونعيش
لانو مافي لا امني ولا امنك ولا دفاعي ولا دفاعك كلووو بكش يا رجل كلوو بكش دوله ضعيييفه !!

نسيت اقولكم راعي السياره اللي وصلت معه لهالمكان اختفى فجأه ,, دعواتكم ربي يلطف به
المهم سبحنا وسبحنا لما نزلنا ع امتداد شارع الستين بدينا نشوف سيارات تمشي
وقفت اقرب سياره وركبت معاها ولكن للاسف الطريق السريع مقفل والستين مقفل وكلووو جده مقفله حصااااار حصااااار
وبالاخير صدمنا بشاحنه مجبر اخاك لا بطل وتعطلنا !!!
وصلت الساعه 10 الليل وانا ما زلت اسبح وامشي وادوري اي طوق للنجاه
اخر شي قلت مالها يا ولد الا تسبح لين شمال جده وتبعد عن الاحياء المنكوبه
وفعلا جلست اسبح لما وصلت الدانوب شارع الاربعين هناك المويه قليل
شايفين المسافه قد ايش بس ؟!!
وطبعا رجولي تجرحت انواع الجروح والشوز حقي اتقطع وانتم بكرامه وصرت حفيان :/
وصلت للمكان هذا الساعه تقريبا 2 ونص الليل وانتظر نص ساعه لما جاء تاكسي
ولا شعوريا فتحت الباب بقوه رميت نفسي ورميت له خمسين ريال وديني بيتي بسرعه وديني !!

ورجعت البيت ومازال ابويه واخواني محاصرين بخط مكه وجنوب جده ولكن الحمدلله وصلوا البيت قبل ساعه من الآن !!!

قبل ما اختم كل المعاناه هاذي كانت بدون اكل وشرب
بدون اي محل مفتوح وبدون حتى اجهزة صراف تشتغل
وبدون اي جهاز حكومي امني يساعد الناس فقط الله ورحمته ولطفه .. ثم المغامره اموت او اعيش !!

وعلى غرار اللي تعلمته بوطني اوجه ردي هذا ع طريقة

نسخة لــ خطابات وعيد وتهديد للمقصرين .. واهيه وضعيفه ولا لها اي نتيجة
نسخة للاجهزة الحكومية الامنية الضعيفة والتعبانه واللي مالها وجود وقت الشدايد !!
نسخه للدفاع المدني الظريف اللي يرسل مسجات عن المطر الساعه 6 المغرب !!!!!!!!!
نسخه لـ فئه ولا معطيه اي اهتمام للشعب وارواح الناس غير بالكلام والضحك عالدقون

( لا يُلدغ المؤمن من جحر مرتين ) !!


نسخه تحيه وتقدير وإحترام للشعب الجداوي مواطنين ومقيمين قامو بمساعدة بعضهم البعض
ايضا نسخه اخيره للشعب الجداوي اقول فيها

كم أنتا صبور كم أنتا صبور كم أنتا صبور
اصبحت في كل عام تغرق بكل برووووود
ف متى سـ ستثور ؟! متى سـ تثووووووور ؟!!!!

كان الله في العون واعذروني غيض من فيض ولكن اكييييد ماهوب العن من فيض امس !