[صوت الفجر]

(الحدود) مع كل نسمه يا وطنّا تحيّه و الله نحبك حب ما فيه قدّه يا تاجنا اللي روسنا به قويّه يا نبضنا اللي دمّنا دون حدّه نستاهلك نورٍ ملا العين ضيّه و نبنيك صرحٍ ما انخلق من يهدّه لو عنك نحّتنا الليالي نحيّه جيناك كلٍ زود شوقه يحدّه كلّك دفا يا حضن نجد العذيّه هي بس نجد اللي تزّف المودّه ؟ شف ثغر حايل شف هوا أبها البهيّه شف غرّة الدمام شف كف جدّه شف بيرقك و البرق و السامريّه مجدٍ يلوح و لوحةٍ مستجدّه شف حكمة الراعي و صدق الرعيّه و الخير مقبل و الضغاين مصدّه بحبوحةٍ من سلسبيلك هنيّه يفرق بها التاريخ هزله و جدّه يكفيك بيت الله و منزل نبيّه و شرعٍ من كتاب الولي نستمدّه أطعمك من جوع معبود البريّه و أمنّك من خوف و فجيعه و شدّه النفط من قبله يدينا ثريّه من ينشد التاريخ يقنع بردّه حنّا الوفا حنّا الكرم و الحميّه حنّا هل التوحيد صدقٍ نعدّه قربك و بعدك يا وطنّا قضيّه و أنا من اللي قصّروا فيك مدّه مناخك لحافي و رمضاك فيّه و أقسى تضاريسك فراش و مخدّه يا كم نشدت و رد ظنّي عليّه عودٍ يَمَال الجنه أذكر مردّه كان يحكي لي عن زمانه و غيّه و يقول قلبك يا أبيض القلب لدّه أيامكم يا بوك خضرٍ نديّه ما عشتوا أيام الشقا و المكدّه كنّا نمر الصايبه و الخطيّه نزايعٍ ما بين روحه و ردّه كنّا الى من دارت الشاذليّه كلٍ يدوّر شرب فنجال ضدّه كنّا نسوق الروح يم المنيّه لأجل الرغيف اللي ضرينا بمدّه و اللي خذينا الصبح يوخذ عشيّه و لا نمسي إلا عقب ما نستردّه نسمع من الهودج صياح الصبيّه أم الجديل اللي لها من يكدّه تنخى و نخوتها شبب كل هيّه و تمنّي الصنديد باللي يودّه لا نشف رمح و لا استراحت مطيّه و لا تركنا سهلةٍ مجرهدّه و اليوم أمان و شمس عزٍ جليّه و الدار بين المبغضه و المودّه بقى يوصّيني عليها و صيّه لين جرحتني دمعته فوق خدّه قلت اذكر الله و الحدود محميّه ورث الفطين اللي حفظ ورث جدّه حنّا لها ما دامت الروس حيّه حنّا لها لو بيّح الموت سدّه أي و الله طوال اليدين معصيّه و أقصر يد اللي تهقويه يدّه لعّل مالي غير داري هويّه الورده اللي بالحشا مستبدّه من يوم أنا طفلٍ عظامه طريّه و أنا أرخي الحلم الطفولي و أشدّه صغير ألوّح بالعلم في يديّه حتى (نشيد بلادي) أمشي و أردّه و الى لمحت البدلة العسكريّه أقبض يدي و أرفع بهامي و أمدّه و اليوم أغنّي للوطن سامريّه و الروح تارك علمها دون حدّه (النسا) النسا روح المسا والليل لو فكر يبات - كان مافيه اغنيات - و كان ماله ذكريات وكان مافينا عظيم و ما لامانينا حليف - و ما بنا قلب وليف - ولا لنا قصد شريف النسا نصف الحياة - الا النسا كل الحياة -اه يا اسرار الخوات -اه يا احلام البنات اه ياالطيش الطفولي -اه يالحزن الشفيف - اه يالعشق العفيف - اه يالجنس اللطيف علمن حتى المرايا - والشبابيك اللغات - والرسايل والدوات - صارت اعذب مفردات كم بكن وانكف مبصر - و ضحكن وابصر كفيف - و رمشن واهتز سيف - و همسن وامتد ريف كم غدن لاخوانهن عزوة صناديد عصاة - بين صفق المرهفات - و بين ضبح العاديات طاحت اشناب و كراسي - وانطلق دمع و نزيف - و اعتلى الخف المنيف - و المقابر تستضيف النسا ضلع عوج لولاه كل العدل مالهن عنا فوات ومالنا عنهن غنات تبرق الدنيا علي يديهن ويغرين القنيف نطمع بتكريم ضيف ونوقف بيوم عصيف النسا بحر على موجه منايا وامنيات والنسا مركب نجاة نسال الله الثبات هن لباس وهن فراش وهن معاش وهن رغيف ان فتك جوع مخيف وان حدا الرجال حيف النسا حتى شراب الجنه العذب الفرات تحت ماطا الامهات يالهن من مكرمات كل ماعود من الكد اقبل ابن ادم ضعيف له ورا البيبان طيف مثل نسناس المصيف في بلادي يحسبون ان النسا متخلفات في المسا مستوطنات وفي الضحى مستعمرات مادروا عن هالبيارق شمخ العرض النظيف فزهة الدين الحنيف شجرة العز الكثيف غاده وسجاده وكفين وحجاب وصلاة من صبايا محصنات من عروق طيبات اطهر من الفين منظر كلها فتنه و زيف في رجا الصبح الكسيف وأجرة الليل السخيف كم مكان يعرض اعراض آنسات وسيدات والهوى له بايعات والغلاف و لافتات والحسن تشبير عنق وطول وخصر نحيف وشي ماينشاف شيف لاجل الاول والوصيف شهب تشابه رسوم الشاشه المتحركات ما.. لزمتهن طرات ولا لهن ملح وحلات لاربيع فيه خير ولا به الا بروق صيف والشتا مابه رفيف يحي اوراق الخريف لي مناحل لي خلايا كلها سكر نبات لي حصون ناعمات لي غصون شامخات لي قوارير ملاها العقل والدم الخفيف خلفها العمر الكليف ودونها الحد الرهيف يازمن وش جاب حلوى غلفوها باالعباة جنب حلوى للمشاة و للغبار و للشتات شف بدل ماهي لواحد صارت لجمع لفيف .. كيف انا اخبرك كيف شوفها فوق الرصيف (طعم المسا) معك طعم المسا غير .. و معك حتى السوالف غير معك يا حلو تقليب المواجع بين كفّينك تبختر بين دقّات الخفوق و نشوة التفكير ترى كل الحياه اصغر من اللي بيني و بينك احس انّك تجي و العشب ينبت و الطيور تطير و احس ان السحاب يلوح براقه علي يدينك احس بروعة الدنيا و احس ان الزمان بخير و احسّك للحياة اعذب نداء ما انت بمثل عينك اشوف الصبح لا شال الشفق هز الظلام عصير و اشوف الورد يضحك ما بقى الا ينشدك وينك ؟ و اشوف الريح تقبل مستخفّه دمّها و تغِير تنثّر لك شعرك و تنتثر سلّة رياحينك ورا ما ترقص القمرا بقلب ٍ خانه التعبير مثل ما ترقص الالوان في مسرح فساتينك دخيل انشودة العشق و ذنوب ٍ ترفض التكفير دخيل آخر ربيع ٍ مرّني في حضن عشرينك انا اللي نزّلك من برجك العاجي و جاك يسير يمد لك اليمين ولا درى عن لهفة يمينك و اثرك تشوفني في حلمك اللي في رجا التفسير على ذاك الحصان الابيض اللي في ميادينك شعرت بطعم سكّينك من اول ما بدا التقدير تمثنيت العروق و قبّل اكبر جرح سكّينك لقيتك قبل ما ابحث عنك في الابراج و التبصير قريتك قبل اموت بلذّة قراءة فناجينك ابي للناس اسولف بك و اقول اللي يصير يصير و احسّك سالفه لو سولفوها شوّهوا زينك حشا لو تطري الفرقا ما اعدّك راعي التقصير عزاي اني ملكت بوقتها عرش اجمل سنينك يقولون الزمان اغبر و انا اقول الزمان بخير ما دام اللي سكن في ناظرك ما طاح من عينك (هذا قراري) خلاص ابا اترك كل شي ٍ مكانه العشق و العبرات و الحسن و التيه جفا .. ملل .. فرقا .. تغلّي .. خيانه هذا قراري و سمّه اللي تسمّيه ما همّني ذاك المكان و زمانه اغليه ولا علّني ما ارجع اغليه يا سيّد الماضي و ذيك المَكانه انا الذي شوّه بشرواك ماضيه الحب عرّفتك على عنفوانه و الا انت ما تستاهل اصغر معانيه ما شفت طرفك في قساه و حنانه يرقى قصيدي و يتغطرس على يديه ما شفت عودك كم و كم خيزرانه سميتها به .. و انثنت مع تثنّيه ما شفت شعرك كيف علّيت شانه دلّيته الريح و غدى وقتها فيه ما شفت صبح ٍ جاك تضحك ثمانه عقبال ما اصبح يوم و القاك ناسيه قل للعذر ما عاد للعذر خانه لو تبني بدمعك بيوت المشاريه قل للطواري لو تطيح الميانه لا هنت لي صوت ٍ ولا اشتقت ( لبّيه ) امانه .. ان كانك تعرف الامانه لا تذكر انه كان لي عشق ٍ ارجيه جاك الكلام .. و خل قلبك مكانه و العشق و العبرات و الحسن و التيه (ليل العتاب) يالله بعلمٍ يسر و يبهج الخاطر طالت و طال الصبر لعيون خلاني ادري طراة الفتى عزّام و مخاطر اما على شانهم ولا على شاني ما احلى من الغيم لا منه نوى الماطر ما اعظم من الحب في تاريخ وجداني لا عاد ليل العتاب و غلطة الشاطر اقفى على وجهه الغالي ولا جاني كان اول يذوب .. كان لشوفتي ناطر كان يتحرّى الغلا .. كان يتمناني يا حسرتي لا تهجّيت اسمه العاطر دوّرني بوقتها .. ما عاد تلقاني الى رجع ما له الا طيبة الخاطر لأشب نصف القصيد لنصفي الثاني (ياقلب لاتحزن) يا قلب لا تحزن .. و لو طال ممشاي خاو الصبر ولا التعب طبع دربي وش بك تحسب خطاي يا حادي خطاي الذنب ذنبك و اصبح الكرب كربي لو عشّمك بالمجد و اهدا لك الراي الهاجس اللي مل طرحي و ضربي لا تاخذك وردية احلام دنياي يكفيني اللي لمّني و انتثر بي و الى سرى ليلك مع راعي الناي الجرح غطّه كل ما هب غربي كلها عشان اذن ٍ شفوقه لشكواي و عيون حساد ٍ تلد النظر بي ادنيت يمّي قاصي ٍ همّه رضاي و ابعدت عني داني ٍ هان قربي اضمى ولا ارجي حاسدي شربة الماي لا قرّب الله من يد النذل شربي حرام اعيش .. و لو شفع طيب مجناي انا ما جعلت ادنى العرب تفتخر بي يا قلب توعدني بالامجاد يمناي و يلوي ذراعي وقتي اللي غدر بي و ان راعتك ظلما على سكّة مناي قلت لقدم رجلي بلا قلب سر بي (الجروح) حبيبي لا تعذّر و الجروح اسبابها الاعذار و انا ادري ما يطيب الحب غير بكثرة ذنوبه يا ليت الجرح ما بيّح نزيفه باقي الاسرار يا ليته كان ذنب بدون عذر و تغفره توبه انا اللي ما خذا منك القصاص ولا طلب له ثار على كثر الحقوق اللي تمنى اقول مطلوبه اهلّي بالمواجع كل ما انساقت من الاقدار و اقول يحلها اللي حطها للقلب مكتوبه حطبت ضلوعي و شبّيت ضوّك يا عذاب النار و انا استر كل هم و كل هم ٍ ضاق به ثوبه تذكر كيف سيّلت المشاعر في هواك انهار عطيتك للفرح صحوه و للاحزان غيبوبه عطيتك وقتي و رحت اترقب قاصف الاعمار و انا سنيني على عمر ٍ نثرته فيك محسوبه حبيبي و ان بغيت الصدق يا شين الهوا لا جار حبيبي و ان بغيت الكذب كل ٍ ملك محبوبه دخيلك لا تعذّر و الليالي خلها تندار يبين النور ولا يا عساه يطوّل غروبه (فلسفتها) فضفضت لي عن سواليف امها اللي كدّرتها و الحزن مثل الحسن لا مر .. لازم ينوقف له جت تفسلسف .. طفلةٍ مكياجها من فلسفتها كمّلت عشرين عام و لا تزال اليوم طفله يشبع الخلخال .. و السلسال جايع برقبتها خيزران ٍ لينها بين انتباه و بين غفله ودّي ادري لا مشت بشعور الارض اللي تحتها و ان تثنّت قلت : وين اللي يقول ان الترف له آه .. لولا خصرها قلت : اسرفوا في تغذيتها ما افقره بين النعيم .. ولا يبي من ينتصف له ! حاجة ٍ تطري عليها .. جايبتها جايبتها نسمةٍ ما تعترف بالباب و الحارس و قفله قلت وش ذا اللي خفق بين الضلوع من اوّلتها قبل اقول ( الضيف جاك ) .. اثره فتح كل الغرف له يوم قدّمته لها ليلة سرت بي سلهمتها قالت : اتشرّف بقلبك يا فتى .. قلت : الشرف له و طرت مع سرب الحمام اللي طلع من حنجرتها ساعتين وهي تسوق الرمش و ابصم و اعترف له تجدل انفاسي و الى حسّت دفاها كسّرتها و اطلقتها للهبوب بكل طيش ٍ تنجرف له لين بآخر طيشها قصّيت اظافر شيطنتها لا تشح بكيدها اللي كيدها ابن آدم ضعف له نسنست عصرية الجمعه و هي تقرا بختها بين جمع من العذارى كل شي ٍ منكشف له كل ما جن يمشطن شرطانها اللي تعّبتها سمّعوها من قصايد خلّها آخر ما انعرف له و لدّت لحلم ٍ تدوّر له و تنشد منظرتها لدّت لبرواز ٍ اسود .. دمعها ياما ذرف له لدّت توصّي مكاتيب ٍ قبل ما زرّفتها ضمّنتها الغاليه دمعة وداع و عطر حفله قلت : اراضيها .. و جيت و جات .. و الدنيا ملتها و الغزل دار و لقى المشتاق .. مشتاق يعزف له كل ما زوّدت .. وردّي السواليف اخجلتها وكل ما زاد الحيا قلت : الحلو وش ينكسف له قالت : امي تفتكرني طفله و تظلم بختها صح انا ماني بطفله ؟ .. صح انا ماني بطفله ؟ (يمه الغربه) يمّه الغربه و فرقاك ملتمّه دمعة العين هذي ما لها داعي يا بعد راسي انتي ليه مهتمّه الوجع لي سواة الناي للراعي آخر اخباري : الذمّه هي الذمّه و الوصايا هذيك تقدّي شراعي ما به الا السواد يحاود اليمّه ولا به الا البياض اللي ورا اضلاعي و اشعل ٍ ما يفارق ليل حضن امّه و اخضر ٍ كل صبح من اول اتباعي يتعب البرق ما اتعبت النظر يمّه حل مرباعي او ما حل مرباعي حدّقي بإمهات الغيد يا يمّه و انشديهن بعد ما قلّت اطماعي انجبن لي عروسة حلم ٍ اضمّه او بعد توّها تشرب عطش قاعي و اذكري كيف كان العود ابو عِمّه يتعلّى صهيله و ارخي اسماعي امنياته بدرب ٍ ودي اتمّه آخره صعب .. و اصعب منه مرجاعي يوم كل ٍ فزع له خاله و عمّه يكفي اني وردت العِد بذراعي ارفع الراس بين الروس ما همّه و اتباهى و انا الغرقان بأوجاعي يمّه .. الحُر طبعه يعشق القمّه و انتي اللي فطمتيني على اطباعي الهواء دام راسي حي و يشمّه والله اني لأسوق هناك ذعذاعي غربة ٍ تلوي ذراع اشجع الخمّه لا تخافينها لو تقلب اوضاعي يمكن تبعثر الرجّال و تلمّه بس بدري عليها تلوي ذراعي (دقايق هالمكان) خذ اللي تطلبه ما دمت اخوي العازم الجزّام لكن ان شفت دمعي .. شف لنا شي ٍ يسلّينا فتى احلام ٍ .. هنا .. كان يتغزّل في فتاة احلام خطفها بين حور البحر و اغلاها من المينا و جاب لها بساط الريح .. قالت للغلا قدّام ولا نحتاج يا مخلوق .. مخلوق ٍ يوصّينا انا ذاك الفتى الصب وهي اجزل و اكرم الاكرام من اللي مد عمره صدق بأولنا و تالينا دقيقه من دقايق هالمكان تساوي مية عام هنا ساعاتنا ما كانت تلحّق ثوانينا هنا ياما تعاهدنا .. هنا ياما غدينا اخصام هنا ياما تعاتبنا .. هنا ياما تراضينا هنا كنّا نصيح و تحتوي صيحاتنا الانسام لطيفه كنّها لامن تجادلنا تهدّينا هنا كان الحمام يطير لكن لا وصلنا حام يحسب انّا من السرب وهو اللي كان ناسينا هنا طلنا حضن نجد و هواء الطايف و تمر الشام و جوز الهند و اعذب دجله و سكر قصب سينا ما ارقّه من مكان .. الله يوم انّا نجيه هيام عطاشى جايعين و كان يطعمنا و يسقينا نجيه بلا هدايا و الخفايا حسبة الايتام و نعود بلا خفايا و الهدايا في مخابينا و لو ينطق تفجّر به نهر كله ذهب و انغام و زم الفل و الريحان و النرجس حوالينا نحبه كثر ما طشنا و قسّمنا فضاه اقسام لأماسينا و اسامينا و امانينا و اغانينا كثر ما ضمنّا و ايامنا ماهي من الايام و دنيانا شبر في شبر تضحك بين اياديناعلى وضح النقا .. وضح النقا .. وضح النقا اللي دام و كن الكون باللي فيه ما والله يعنّينا توادعنا و ودّعنا المكان و حارت الاقدام ولا ملّت شفاه افواهنا ترديد اسامينا إلين الدمع طاح و طاح معه الشال و البسّام يا ليتك تدري بذيك الدقايق وش حصل فينا ورا دمعتك سالت و انت اخوي العازم الجزّام انا ما قلت لك : دوّر لنا شي ٍ يسلينا (عنود الصيد) حبيبي طال موال ٍ يجيب الهم و التنكيد عسى الله ما يخلي لي خليل ان كان خليتك يابو عذر ٍ يشابه ضحكة الاطفال يوم العيد انا ابكيتك ؟! .. حشى و اللي فتنّي فيك ما ابكيتك حرام بعينك الدمعه .. حرام بصدرك التنهيد حرام البرد يمضغ راحتينك ما ترضّيتك تعال .. و كل جرح ٍ فدوتك يا ابرد من التضميد اشوفك من زمان و قدّر المولى و حبيتك من اول مرة ٍ شفتك .. تمنيتك .. و صرت السيد و تمنيت اني اصلا ً يوم شفتك ما تمنيتك تخيل كيف سكّنتك و خليت القريب بعيد و روّح كل عاشق يحلم ببيت ٍ مثل بيتك فداه من البيوت اللي يمل و يعشق التجديد يا عمري شف و هو قلبي متاني فيه وصّيتك اسج و تنقلب ضوضاء الشوارع في عيوني بيد و اجيك و يرتعش في خافقي عصفور لا جيتك دخيل الطلّه اللي كل ما جت فوق ذاك الجيد دريت انك طموحي يا طموح ٍ ما تعدّيتك حشى ما مرني يوم ٍ صبوح .. الا انت بالتحديد تراك الصبح في عيني من اول ما تهجيتك نسيت ان الرسايل كانت من ايدي تسافر لإيد تكحل لك مساك و عطرها يحييك و يميتك نسيت انك ظفرت بزفرة ٍ تستاهل التمجيد ولا تلحق جزاها لو تجمع لي تناهيتك نسيت اني وضعت الشمس في كفّك و عفت الغيد و حطيت القمر في كفّك الثاني و خاويتك انا لي ذنبك .. و للذنب عذر .. و للعذر تنهيد و لك خيل الرضا تصهل بصوتي يوم ناديتك تمتع بالغلا يا اللي يسمّونك عنود الصيد ولا يا كثر ما غرّتني حروفي و سميتك حبيبي .. لا سقا الله عرفي اول قبل اجيب العيد سقا الله يوم طشت .. الا سقا الله يوم حبيتك (المهر والمهره) على قوافل اهل المجد و اهل الشهره يا شيخ جتنا هداياك و قبلناها ضاقت علينا و سقت المهر و المهره اللي شيوخ القبايل تطلب رضاها يا نوم عين اجودي ٍ شد بك ظهره اما نشرت القصص ولا نشرناها ما والله يجوز راع الحب من طهره ولا تفقد العين غير اللي نثر ماها البارحه في المنام قلوب منصهره صكت عليها الضلوع و جابت اقصاها و حكاية ٍ بالغلا و الشوق مزدهره و ضعون اجاويد نتعب لا ذكرناها خلوا لنا الليل و اخذوا معهم السهره و رحنا نعد النجوم ولا حسبناها لو عشّمونا زمان بكوكب الزهره اهون من احلام و بيوت ٍ بنيناها كانت كوابيس تشبه وجه ابن فهره و اليوم جاء من يبشّرنا بمنفاها يا حلو عز ٍ تدفق يمّنا نهره ليه الزغاريد ما تملى زواياها خواطر مكسّره و عيون منبهره و عيون مدري من اللي ضاق و اعماها و الليله اللي نسى فيها الشقي دهره احلى الليالي الى قالوا وش احلاها (طفله) يمّه اذنبت و نزحت من العشيره و ان تمنّوا توبتي ماني بتايب مابي لدنيا الغنادير اي سيره طايح ٍ من عام الاول في مصايب يمّه .. اللي حب له طفله صغيره وش يسوّي لا غدى فيها طلايب طفلة ما كانت بحبي جديره بس كانت غير عن كل الحبايب كنت اسميها العنود المستذيره ليت اهلها العام سمّوها عجايب كنت اجيها مثل الامطار الغزيره كنت اضيع بجوّها مثل الهبايب و اطلب الله هي متى تصبح كبيره تفهم شلون المكان يصير ذايب ان تغنّت صارت الطرقه قصيره و ان تغلّت صارت جروحي عطايب و ان بكت ناش الفضاء طهر الستيره و ان شكت راح الحكي مثل الذهايب و ان توارت مثل الاسرار الخطيره صار لوني مثل الايام العصايب ديرة ٍ ماهي بها ماهي بديره لو ثراها عشب و اعلاها سحايب يمّه .. تحبين .. طايلة الظفيره آه .. والله يا عليها اشقر ذوايب ان تحرك له سواليف ٍ كثيره و ان ركد روّح مثل لمّة قرايب عرّفتني الليل و نجوم الظهيره بللتني بأغنيات و رحت طايب كل عرق ٍ في خفوقي تستثيره خايف ٍ تصبح مراجيحه نصايب صنتها مثل البحر لأبعد جزيره ما تركت علومها لأهل الركايب قالت : ان جاء الراس شايب فيه خيره قلت : يا بنت الحلال الراس شايب قالت : الا الحب وش هو ؟ وش مصيره ؟ قلت : انا استاهل و انا كل السبايب ما جزا اللي حب له طفله صغيره غير قبر .. و ضحكها فوقه نصايب (جبل طارق) البيرق اللي على قمة جبل طارق عار ٍ حنى الهامه اللي طال عاتقها جيت اسأله يوم شفته بالحزن غارق و اقول شف حابس العبرات مطلقها يا ورثنا اللي من المسروق للسارق يا اغلى المراقيب لو ما كنت شاهقها ما بين مغرب رضاك و غيضك الشارق ذكّرتني حصة التاريخ ما اصدقها ما كنّك اللي مرق من جانبك مارق للوادي اللي فلول الذل فرّقها من طيب حظك ومن تفكيره الخارق ساق المناوي و قال الله يحقّقها ما تذكره يوم مر الماء كما الزارق لمّيت جنده ولم السفن و احرقها ما تذكر الخطبه اللي سرّت البارق و الخيل و الريح و العزّه و بيرقها ما تذكر الغاده اللي غصنها وارق من سربة الحق ترجي ثار خافقها ما تذكر الفرقتين و شاسع الفارق و السبع الايام ما تذكر دقايقها الموت مثل الحياة اطماع و مزارق و الاندلس تنتظر ميعاد عاشقها بوابة ٍ قبل ما تنشد من الطارق هبايب المسك ساقت ريح طارقها لين ارجهنّت و غنى شوقها الحارق من اول ابراجها لآخر حدايقها يا اغلى المراقيب انا رحّال و مفارق و الكلمه اللي تزيد الهم ابا انطقها طارق و روّح تصبّر يا جبل طارق لو رزّت القوم في راسك بيارقها (اعشق مية مره) شف بعد فرقاك وش كثر عشّاقي من على خبرك و انا اعشق مية مرّه كل مرّه يرجع الود لعناقي و ارجع افتح جيب الاشواق و ازرّه اتناسى بعد ما اسرعت بفراقي ما علي لو كبد ابو زيد محترّه كل جرّه لا نفخ روحها ساقي عوّد و جدّد على قبرها جرّه كنت ذوقي و كثرت بعدك اذواقي كم فتون ٍ طاب لي حلوه و مرّه كنت امد الكف و اشواقي .. اشواقي كنت بين العفه و بين اخو مُرّه كنت اهدي روع طرفي و خفّاقي و انتصب للجيد و الثغر و الغرّه و تغدي بي بينها و بين مسباقي ضحكة ٍ يندهلها الغيم و تمرّه و كل ما اظهر درّه تحاول اغراقي يقطع البحّار و البحر و الدرّه امتليت من التوابيت بأعماقي و السحايب في سماء العين محمرّه يوم بثيّت اعذب الحب لآفاقي جيت المّه ما طلعلي ولا ذرّه احسب انه ما بقى للهوا باقي و احسب اني كنت ناسيك بالمرّه اكتشفت ان الهوا اللي لعشاقي كان كذب و كنت احبك مية مرّه (لارحتي ولاجيتي) يا اللي بمرباعي الموعود مهتمه انتي مطر صيف لا رحتي ولا جيتي رحلت لا امدح زمان اول ولا اذمّه الا اني اضحك على سابق تناهيتي يا مقبله ليه خليتيني اليمّه يا حلوها لو بدل ما اقبلتي .. اقفيتي ياما تمنيتي العشق يحكي فمّه حتى حكى العشق فوق اللي تمنيتي عمر ٍ نثرتيه رحت انساك و المّه و الى تذكرتك .. اذكر عمر تشتيتي انتي وقتي و حظي ما لكم ذمّه ياما على ونتي غنّوا و غنّيتي واجرحي اللي نفذ صبري و انا اضمه كيف تناسى صوابي لو تناسيتي ما انتي بذيك اللي الشوق اهدرت دمه و انا اللي اظن بين ضلوعها بيتي يا ليتني قبل اكذّب راعي النمه سويت في طفلنا اللي فيه سوّيتي انا الوفا بين اخوه و بين ابن عمه و انتي الجفا وين ما رحتي و حلّيتي يمكن نخيتي الزمان و شح بالّلمه او شفتي الصدق زوّدها و ملّيتي كذّاب لو قلت قلبي راح ما همّه و الفين كذّاب لو ما قلت حبيتي يا اللي تركتي الهوا غرقان في دمه جيتي غريبه و رحتي مثل ما جيتي (مهزله) تدرين يا حلوه متى العاشق يحس بمهزله ! لا جاه شي ٍ مثل شي ٍ قام يحداني حدي ما اقسى من دموع اليتيم الى ذكر ضحكة اهله ولا يهد من الفراق الا الفراق السرمدي يا الورده اللي في شرايين الحشا متغلغله يا روحي اللي لو تبرّت مني اختل جسدي كونت لك عالم غرام ٍ ما دخله البلبله إلا هدير ٍ ينتهي بين الضلوع و يبتدي حتى اقرب اصحابي من اللوعه سهيت و قلت له : يا الاجودي كف العذل ما في العواذيل اجودي انا اللي استاهل عناقيد العنب يا مدللة ليتك دريتي كيف عيني تذكرك في مرقدي يا ادنى من الغيم ان تغطرس و اطول من السنبله يا اقرب كثير من الحكي و ابعد شوي من الجدي ان جيت رحتي مقفيه و ان رحت جيتي مقبله كم مت .. وليا قلتي ( احبك ) تجدد مولدي دنياي انا لو تجتمع لذاتها في مكحله والله ما اشهر لأي عين ٍ غير عينك مرودي يا ذابحتني كل شي إلا الجفا ما اتحمّله يا كبر كذبة عزتي لو قلت ابا ابعد و ابعدي قلبي لو اغديتيه في الصحراء بليا بوصله ما تاخذين إلا وهو لأقصى ضلوعك مهتدي و ان خاب ظني و آخر المشوار جاء مثل اوله با اغمض عيوني و ابا احلم و اقهر الحظ الردي بأحلامنا حتى آخر المريخ نقدر نوصله الله لو نطلع بساط الريح و يدك في يدي تخيلي روض ٍ من اقصاه اجمل الورد احمله و اهديه لإيدين و ظفاير شيخة الورد الندي تخيلي نهر ٍ بالاحجار نتمثنى جدوله نبقى على جاله جلوس شوي و شوي نعدي تخيلي بيت ٍ دفاه من المواجع و الوله ضحك و سواليف و سهر و مزوح و بساط احمدي تخيلي عشق ٍ عجزت استوعبه و اتخيله كانه على هالحال ما عز الله ابشر بسعدي يا سيدة عشقي و انا راعيه راعي الاوله ما هي كثيره لو تقولين .. انت والله سيدي ترى الله اللي حط لك ذاك الغلا و المنزله ولا الهوا لا ورث ابوي ولا ذخرته لولدي حبيبتي ما يقهر الرجّال في مستقبله إلا الهوا اللي مرة ٍ يقبل و مرات يغدي حتى الوفا لا زاد عن حده يعوّد مهزله يا ليتني خنتك ولا اللي قام يحداني حدي (الفقيره) يسعد صباح الفقر يا اللي تذمّينه في ذمتي ما انتي من الفقر معذوره ما شلت هم الرغيف اللي تشيلينه كل الهموم لسواد العين مذخوره ما انتي فقيره تقولين اليسر وينه يا قطعة السكر من الملح ميسوره من علم الجوري انشدوة بساتينه من هز ريش النعاس اللي كسا حوره من ذكر الخيزران اللي نسى لينه من جدل الليل لين اختال ديجوره سلسالك الفضي - اصلا - لو تزمّينه ما راحت اكثر عقود الماس مغروره و الازرق الرث يا ملحه و يا زينه ابها من ارض ٍ نهار العيد ممطوره مستورة الحال بس القاف تغرينه ليه اتنحّى و اخلي الحال مستوره والله لأغني لفقر ٍ غنت سنينه لين ايسر المترفات تموت مقهوره قالوا لي ان الجديل اللي تربينه معه تربين حلم ٍ فاحت عطوره قالوا بذاك الركن سر ٍ تخبينه و مراية ٍ من رداة الحظ مكسوره لا ينكسر مثلها الخاطر و تشقينه تمنظري في المرايه حي هالصوره مذكور جرح ٍ ورا الاضلاع تخفينه و تحت المخده رسالة عشق مذكوره اثر الهوا جاي يسوق الشوق بإيدينه غصن ٍ جفاه اليباس و زف عصفوره يا من يكون الحبيب اللي تحبينه يا اللي بوجه الليالي ثروه و ثوره وقت مضى ملمس اللعبه تمنينا و اليوم خضر القلوب العاب منثوره الحزن .. ليه العيون السود في عينه و البحه اللي ترد الروح مذعوره فقر ٍ ستير ٍ ولا ازكى من رياحينه ولا نعيم ٍ فضوح ٍ تغرق زهوره و الميت اللي يبي دعوات حيّينه كنتي وصاته و نزفه و آخر شعوره يا زمة الغيم و رخاية هدب عينه ما قلت لك ما انتي من الفقر معذوره (همس الغمام) قلت من ذيك الصبيه .. قالوا : من احلى الصبايا قلت : اقول الله يخليها لعين ٍ ترتجيها طلة ٍ ما استوعبتها لا العيون ولا المرايا كم تعدّتني و انا ما كنت والله مهتويها ما دريت الا و هي مثل النفس بين الحنايا ان شهقت اموت منها و ان زفرت اموت فيها اثرها يوم اني اجمّع ما بقى لي من بقايا عشعشت في بالي المحروسه اسم الله عليها طفلة ٍ قدامها طفل ٍ سرق همس الشفايا كل همّه كلمة ٍ ما كل الافواه تحكيها كنّها في ضحكها عيد و زغاريد و هدايا كنّها في حزنها عين ٍ حورها مكتسيها بانها اللي فارد ٍ طوله مسوي بي سوايا و ارتشافة قهوة انفاس ٍ تعوّدت احتسيها نهر حسن ٍ ضفته ستر و تواريخه عرايا صب بعروقي و قامت ترتويه و يرتويها عندل ٍ بفراقها تكشيرة انياب المنايا كيف ما ابيع النفيس و ضحكة العمر اشتريها حاولت لحظه من اللحظات تنثرني ضحايا كنها اللي تنتصر لجروح حواء و تحميها و الخفوق اللي رميته بينها و بين الخطايا تشتهي جرحه وهو في عز جرحه يشتهيها كم بدت طفله تحب احلى القصص و احلى الحكايا قلت امر اشكي عليها الهم و اصبحت اشتكيها كم على الماء و الذهب و الرمل و البيض الضمايا انقشت قلب و سهم و حروف حب ٍ تحتويها كم قرت شعري و لدّت للمرايه و الزوايا الجديل تبعثره و احلى الملابس ترتديها وش ورا همس الغمام ان قلت يا شح العطايا كل شي ٍ من ملامحها يجيني قبل اجيها ما ذبح تفاح انوثتها مغاتير النوايا من قصد قصده شريف ومن ورد ماها يبيها علموها بس ! ولا علموا كل البرايا انها اللي عود امري من يديني في يديها والله ان تبطي وهي تختال من بين الحنايا مره تسمي علي و مره اسمي عليها (الساعه) في بحر سودك ابحر شوق مضنونك شفّه الريح يوم تمازح شراعه زيد في فتنتك لعيون مفتونك يتبعك .. ما تلفّت يم تبّاعه كل ما لد طرفك قلت .. يا عونك انت شيخ الخفوق و كثّر اوجاعه كن ما انت بعلى بعضك .. و انا دونك اتلهف لوعد ٍ عندك وداعه كن الاهداب تشكي رعشة جفونك كن كفّك يتّله منّي ذراعه اشغلت عينك الساعه .. على هونك ودنا نطلع من الوقت لو ساعه لمت صمتك و اثر صمتك من فنونك لا سألتك تصير الكلمه طماعه بس لا جاوبتني هزّة متونك كيف اعاتب خجول ٍ تحكي اطباعه ادري انك رويت العشق بمزونك و ادري ان الغلا في عز مرباعه ما بقى الا اسرق الكحله من عيونك و اتجمل بعين ٍ فيك ملتاعه و ان خذاك الملل حتى من طعونك جرّب الحب مره نقلب اوضاعه قل ما اخونك و اقول ان عشت لأخونك قل ما احبك و اقول السمع و الطاعه اصعب اللي خذيته عقل مجنونك و اسهل اللي عطيته دفتر ابداعه مزنة ٍ ما سبقها بارق سنونك في زمان الشقا ما هي بفزّاعه تحرسك عين من صوّرك و تصونك روح .. ما دام راح الليل في الساعه (الزوبعه) اخيرا جيت مثل الزوبعه لا جت بها الاقدار فراقك عيد و جروحي مابي غيري يعايدها انا ويّا الهوا سمن و عسل و اليوم ملح و نار لا عاد اسمع زغاريده ولا ابغى من يزغردها حبيبي جايني بعد ايش .. بعد الذل .. بعد العار فواتير الزمان اللي تخبره كنت اسددها دخيلك لا تزيد الطين بلّه يكفي اللي صار تراها واصله و ان طعت شوري لا تزودها ما دامك لا انت في بالي ولا انت بمن حمام الدار انا ليه انتخي و اقوم الدنيا و اقعدها ما احبك و اركب اعلى ما بخيلك و ان طرا لك ثار دفعتك في مهب الريح لين تروح في يدها زمان بعود كبريت اتّوعّد .. و الزمان اندار و جيت بغصن زيتون و مواويل ٍ ترددها اذا اعذارك تجمّل قولها .. تدري .. بلاش اعذار بلاش الحجه من الباب للطاقه تورّدها فضحت العشق .. يخرب بيت عشق ٍ ما وراه اسرار بعد ما كنت اسولف له عن احلامي و سيدها انا ياما تعبت ابحر و اعكس الريح و التيار و أبل الشوق و اشرب ميّته و اللهفه اجحدها و اغني للنسا و الشمعدان غناية السمّار على ذكرى الشموع اللي طفت من دون ما افقدها غديت اشتاق والله يا اني اشتاق لجفاك مرار غديت استوعب دموع التماسيح و مشاهدها تبي تصبح لي الماء و الهوا و الشمس و المزمار تبي تغدق علي حب الخليقه و اصبح اسعدها يا شيخ استح على دمّك ترى دم الكرامه فار كشفت المستخبي و الوعود اللي تسرمدها غرام آخر زمن ليت الغرام آخر زمن ما صار و عبرات الندم ( دقه قديمه ) روح جددها (مرثية غازي القصيبي ) من اروع قصائد الشاعر ناصر القحطاني .. الحزن يابو غازي أسرف بالأهداب والصدر وسطه مثل كسر القزازي لا والله إلا كشر الموت بأنياب يومه خذا ليته خذا غير غازي ولا منحنا وقت نفديه بأصحاب لكنه أوجعنا وكان انتهازي الموت طيّح برجنا اللي لوى أرقاب ولا لنا غير الألم والتعازي خسارة للدار ولكل الأعراب من كبرها ما احد درا وش توازي من للمناصب والكراسي والألقاب ترجل الفارس وخلّا المغازي في جعبته خير بلا عد وحساب يلقى حصاده عند رب يجازي لا احد يظن إن الرجولة بالاشناب تبطي النسا ما جابت أشباه غازي