[الباسل3003]

أنا عن نفسي قبل الزواج بحط شروط واللي تقبل بها , أكون من اسعد الناس لارتباطي بها لأن الحريصة على يسر زواجها و التسهيل على زوجها المستقبلي تكون إنسانة صالحة بإذن الله.

بعد الحصول على وظيفة بإذن الله , واذا كان الراتب مايتعدى 6 الى 7 الاف فالشروط كالتالي:
1- المهر 30 الى 40 ألف ريال.
2- الزواج في إستراحة (أفضل استراحة ماتتعدى 5 الاف الليلة.)< بأتكلم عن هذا الشرط لحد يحكم عليّ من الحين.
3- شهر العسل في ربوع بلادي الحبيبة :)

يمكن اللي يشوفها يقول اني ابالغ في الاقتصار لكن احسبوها معاي وشوفوا :
مهر+مكان ليلة الفرح (الإستراحة)+عشاء الضيوف + شقة + أثاث + سيّارة + شهر عسل
35 + 5 + 30 + 25 + 30 + 80 + 15 < الأرقام بالآلاف

220 ألف ريال ياعالم , واحد في بداية مشوار حياته الزوجية و بأقل التكاليف يطلع عليه 220 ألف ريال.

اما بالنسبة للإستراحة بدل قصر الأفراح , فهذي حصلت في بعض المدن و أحد أقاربي حضر زواج في استراحة يقول الصراحة انبسطنا هناك اكثر من الزواجات اللي في قصور الأفراح.

يعني ليلة وحدة استأجر صالة أفراح مع العشاء مع الطقاقات يـ 70 الى 80 ألف ريال؟ و اقعد اقصّد 4 ولا 5 سنوات حق ليلة وحدة؟ صارت غلطة العمر مو فرحة العمر.


واحد من أقاربي تزوّج قبل 4 سنوات راتبه قرابة 7500 ريال , يحلف لي انه الآ مايصفى له اكثر من 2500 شهرياً كلها تروح أقساط , وين الراحة النفسية في زي هالحال؟ كيف يصفى ذهنه لتربية ابناءه و الاهتمام بزوجته؟ أي عيشة تعيشها عائلة في زمن الغلاء هذا بمثل هذا الدخل الشهري؟ وهذا حال كثير جداً اذا مو الغالب من ابناء الوطن حديثي الزواج.

في الأخير احب اقول ان الزواج كل ماقلّت تكلفته كلما زادت بركته, و ربي يبارك للجميع.